தமிழகத்தின் புதிய பொக்கிஷம்: தனுஷ்கோடி ஃபிளமிங்கோ சரணாலயம் திறந்து வைப்பு

தமிழகத்தின் ராமநாதபுரம் மாவட்டத்தில் உள்ள தனுஷ்கோடி, இனி அழகுமிக்க ஃபிளமிங்கோ பறவைகளுக்கும் எண்ணற்ற பிற வலசை வரும் நீர்ப்பறவைகளுக்கும் ஒரு பாதுகாப்பான புகலிடமாக மாறும். தமிழ்நாடு அரசு, தனுஷ்கோடியில் பிரம்மாண்டமான பெரு ஃபிளமிங்கோ சரணாலயத்தை அதிகாரப்பூர்வமாக அறிவித்துள்ளது.

உலக சுற்றுச்சூழல் தினத்தை முன்னிட்டு (ஜூன் 5, 2025) சென்னை தலைமைச் செயலகத்தில் நடைபெற்ற சுற்றுச்சூழல்துறை, காலநிலை மாற்றம் மற்றும் வனத்துறை சார்பில் நடைபெற்ற விழாவில், முதல்வர் மு.க. ஸ்டாலின் காணொலிக் காட்சி வாயிலாக இந்த சரணாலயத்தைத் திறந்துவைத்தார். 

தனுஷ்கோடி சரணாலயம், மத்திய ஆசிய பறவைகள் வழித்தடத்தில் (Central Asian Flyway) அமைந்துள்ள ஒரு முக்கியமான இடத்தைப் பாதுகாக்கும் நோக்கில் எடுக்கப்பட்டுள்ளது. ஆண்டுதோறும் ஆயிரக்கணக்கான புலம்பெயர் சதுப்புநிலப் பறவைகள் தங்களின் நீண்ட பயணத்தின்போது ஓய்வெடுக்கவும், உணவு தேடவும் தனுஷ்கோடி பகுதிக்கு வருகின்றன. இந்த சரணாலயம், பல்வேறு வகையான பறவைகளுக்கு பாதுகாப்பான புகலிடமாக அமையும்.

Congratulations Tamil Nadu,
Today we take a leap in the conservation journey of Tamil Nadu with the notification of the Dhanushkodi Greater Flammingo Santuary. As announced by the TN Govt. The total Notified area is 524.78 Hectares. Nearly 128 species of birds, 47 plant species… pic.twitter.com/py4abA8CIu

— Supriya Sahu IAS (@supriyasahuias) June 5, 2025

524.7 ஹெக்டேர் பரப்பளவில் அமைந்துள்ள இந்த சரணாலயம், இராமேஸ்வரம் தாலுகாவில் உள்ள வருவாய் மற்றும் வன நிலங்களை உள்ளடக்கியது. மன்னார் வளைகுடா உயிர்க்கோள காப்பகத்தின் ஒரு பகுதியாக இருப்பதால், இது சூழலியல் ரீதியாக மிகவும் முக்கியமான பகுதியாகும். சதுப்புநிலங்கள், மணல் திட்டுகள், சேற்றுப்பகுதிகள் மற்றும் சதுப்புநிலங்கள் போன்ற தனித்துவமான சுற்றுச்சூழல் அமைப்புகளைக் கொண்டுள்ளது. 

இது புலம்பெயர் பறவைகள், கடல்வாழ் உயிரினங்கள் மற்றும் ஆமைகளின் இனப்பெருக்கம் போன்ற பல்வேறு உயிரினங்களுக்கு வாழ்விடமாக உள்ளது. 2023-2024 ஆம் ஆண்டு நடத்தப்பட்ட ஈரநிலப் பறவைகள் கணக்கெடுப்பின்படி, தனுஷ்கோடி பகுதியில் 128 வகையான பறவையினங்கள், சுமார் 10,700 சதுப்புநிலப் பறவைகள் பதிவாகியுள்ளன. இதில் கொக்குகள், நீர்க்கோழிகள், உள்ளான்கள் மற்றும் பெருநாரைகள், சிறுநாரைகள் (Lesser Flamingos) ஆகியன அடங்கும்.

As we close the celebration of this inspiring World Environment Day in Tamil Nadu, our hearts are full with gratitude & renewed commitment. Today was not a only a celebration of our mother earth but also of those who serve her. From launching the Fish Net initiative across 14… pic.twitter.com/OYsX2jzBJl

— Supriya Sahu IAS (@supriyasahuias) June 5, 2025

ஜூன் 4, 2025 அன்று, சுற்றுச்சூழல், காலநிலை மாற்றம் மற்றும் வனத்துறை கூடுதல் தலைமைச் செயலாளர் சுப்ரியா சாகு வெளியிட்ட அரசாணை (G.O.) இந்த சரணாலயத்தின் முக்கியத்துவத்தை எடுத்துரைக்கிறது. 

தனுஷ்கோடி கடல் பகுதியில் காணப்படும் 'அவிசென்னியா' (Avicennia) மற்றும் 'ரைசோபோரா' (Rhizophora) போன்ற சதுப்புநில இனங்கள், இனப்பெருக்கம் செய்வதற்கு அத்தியாவசியமான இடங்களை வழங்குவதுடன், கடற்கரை அரிப்பிலிருந்து இயற்கையான பாதுகாப்பையும் அளிக்கின்றன. இந்த சரணாலயத்தின் அறிவிப்பு, பொறுப்பான சூழல் சுற்றுலாவை ஊக்குவிக்கும், உள்ளூர் மக்களுக்கு வேலைவாய்ப்பை உருவாக்கும், மேலும் ஈரநிலப் பாதுகாப்பைப் பற்றிய பொது விழிப்புணர்வை அதிகரிக்கும் என்று அந்த அரசாணையில் தெரிவிக்கப்பட்டுள்ளது.

இந்த நிகழ்வில், சுற்றுச்சூழல் துறை கூடுதல் பொறுப்பு வகிக்கும் அமைச்சர் தங்கம் தென்னரசு, வனத்துறை அமைச்சர் ஆர்.எஸ். இராஜகண்ணப்பன், குறு, சிறு மற்றும் நடுத்தர தொழில் நிறுவனங்கள் துறை அமைச்சர் டி.எம். அன்பரசன், முதன்மை தலைமை வனப் பாதுகாவலர் (வனத்துறை தலைவர்) சீனிவாஸ் ரெட்டி, தலைமை வனவிலங்கு காப்பாளர் ராகேஷ் குமார் டோக்ரா மற்றும் சுற்றுச்சூழல், காலநிலை மாற்றம் மற்றும் வனத்துறை கூடுதல் தலைமைச் செயலாளர் சுப்ரியா சாகு ஆகியோர் கலந்து கொண்டனர்.