DMK rally protest updates : இது போர் அணி - பேரணி நிறைவில் ஸ்டாலின் பேச்சு

குடியுரிமை திருத்த சட்டத்திற்கு எதிராக திமுக கூட்டணி கட்சிகள் நடத்திய பேரணியின் முடிவில், திமுக தலைவர் ஸ்டாலின் பேசியதாவது, இது பேரணி அல்ல ; போர் அணி. இந்த சட்டத்தை திரும்பப்பெறும் வரை திமுக கூட்டணி கட்சிகளின் போராட்டம் தொடரும். இந்த பேரணிக்கு ஒத்துழைப்பு நல்கிய அனைத்து கூட்டணி கட்சி தலைவர்களுக்கும், மக்களுக்கும், பாதுகாப்பு அளித்த காவல்துறை உள்ளிட்டோருக்கும்  நன்றி தெரிவித்துக்கொள்கிறேன். இந்த பேரணிக்கு விளம்பரம் தேடித்தந்த அதிமுக கட்சிக்கும் நன்றி தெரிவித்துக்கொள்வதாக அவர் தெரிவித்துள்ளார். இந்த பேரணிக்கு எப்படியும் அனுமதி கிடைத்துவிடக்கூடாது என்பதில் ஆளும் அதிமுக கட்சி அதிக முனைப்பு காட்டியது. நீதிமன்றம், நேற்றிரவு, பேரணிக்கு அனுமதி வழங்கியது என்று ஸ்டாலின் பேசினார்.

சென்னை எழும்பூர் தாளமுத்து நடராஜன் மாளிகை அருகில் இருந்து புறப்பட்ட திமுக கூட்டணி கட்சிகளின் பேரணி, எழும்பூர் ராஜரத்தினம் ஸ்டேடியம் பகுதியில் நிறைவு பெற்றது. பேரணியின் முடிவில், முழக்கங்கள் எழுப்பப்பட்டு வருகின்றன.

இந்தியா இதுவரை கட்டிக்காத்து வந்த அனைத்து நெறிமுறைகளையும் காலில் போட்டு மிதித்துவிட்டு, மோசமான இந்தியாவை உருவாக்க பாஜக நினைக்கிறது அதனால் காஷ்மீர் முதல் கன்னியாகுமரி வரை நாடு முழுவதும் போராட்டத் தீப்பற்றி கொண்டு எரிகிறது என்று திமுக தலைவர் ஸ்டாலின் கூறியுள்ளார்.

குடியுரிமை திருத்த சட்டத்திற்கு எதிரான திமுக தலைமையிலான பேரணியில்  உதயநிதி ஸ்டாலின் கறுப்புச்சட்டை அணிந்து பங்கேற்றுள்ளார். 

திமுக பேரணி தொடர்பான படங்கள்

திமுக கூட்டணி பேரணியில் கி.வீரமணி, வைகோ, திருமாவளவன், கே.பாலகிருஷ்ணன், முத்தரசன், ஜவாஹிருல்லா உள்ளிட்டோர் பங்கேற்று உள்ளனர்

திமுக தலைமையிலான பேரணியில், தொண்டர்கள், குடியுரிமை திருத்த சட்டத்தை திரும்ப பெறக்கோரி முழக்கமிட்டு வருகின்றனர்.

குடியுரிமை திருத்த சட்டத்திற்கு எதிர்ப்பு தெரிவித்து திமுக தலைமையில் அதன்  கூட்டணிக்கட்சிகள் கலந்துகொண்டுள்ள பேரணி எழும்பூரில் இருந்து துவங்கி நடைபெற்று வருகிறது.  பேரணி, திமுக தலைவர் ஸ்டாலின் தலைமையில் நடைபெற்று வருகிறது. 

திமுக பேரணி,  110 கேமராக்கள், 4 டுரோன்கள் மூலம் கண்காணிக்கப்பட்டு வருகிறது.

குடியுரிமை திருத்த சட்டத்திற்கு எதிர்ப்பு தெரிவிக்கும் வகையில் திமுக சார்பிலான பேரணியை துவக்கி வைக்க திமுக தலைவர் ஸ்டாலின் வருகை தந்தார்.

சென்னை அண்ணா சாலையில் இருந்து புதுப்பேட்டை செல்லும் சாலையில் வாகனப்போக்குவரத்து தடை செய்யப்பட்டுள்ளது. எழும்பூர் ராஜரத்தினம் ஸ்டேடியம் செல்லும் சாலையில் வாகனங்கள் ஒருவழியில் மட்டும் அனுமதிக்கப்பட்டு வருகிறது

திமுக பேரணியில் கலந்துகொள்வதற்காக காங்கிரஸ் முன்னாள் மத்திய அமைச்சர் சிதம்பரம், திராவிடர் கழக தலைவர் கி.வீரமணி, முன்னாள் மத்திய அமைச்சர் தயாநிதி மாறன்,  எம்.பி கனிமொழி, விடுதலை சிறுத்தைகள் கட்சி தலைவர் திருமாவளவன் உள்ளிட்டோர் வந்துள்ளனர்.

திமுக சார்பிலான பேரணி, காலை 10 மணிக்கு திமுக தலைவர் ஸ்டாலின் துவங்கி வைப்பார் என்று ஆர் எஸ் பாரதி தெரிவித்துள்ளார். 

திமுக பேரணியில் அசம்பாவிதம் ஏதும் ஏற்பட்டுவிடாமல் தடுக்க அக்கட்சி சார்பில் 2 வளையங்கள் அமைக்கப்பட்டுள்ளதாக ஆர் எஸ் பாரதி தெரிவித்துள்ளார். ஒரு வளையத்தில் கட்சி தலைவர்கள் உள்ளிட்டோரும், மற்ற வளையத்தில் மற்ற தலைவர்களும் இருப்பார்கள் என தெரிவிக்கப்பட்டுள்ளது.

திமுக பேரணியில் கலந்துகொள்ள அரசியல் கட்சிகளின் தலைவர்கள், பல்வேறு அமைப்பினர் உள்ளிட்டோர் வந்து கொண்டுள்ளனர். எம்பிக்கள், எம்எல்ஏக்கள் உள்ளிட்டோர் வருகை தந்துள்ளனர்.

திமுக நடத்தும் பேரணியில், பொதுச்சொத்துக்களுக்கு சேதம் விளைவிப்பதற்கான அபாயம் இருப்பதால், காவல்துறை சார்பில் பேரணி முழுவதும் வீடியோவில் பதிவு செய்யப்பட உள்ளது.

டுரோன்கள் ( ஆளில்லா விமானங்கள்) மூலம், பேரணி கண்காணிக்கப்பட்டு வருவதாக அங்கிருந்து வரும் தகவல்கள் தெரிவிக்கின்றன.

திமுக பேரணி நடைபெறும் பகுதியில் 5 ஆயிரம் போலீசார் பாதுகாப்பு பணியில் ஈடுபட்டுள்ளனர் * அசம்பாவிதங்களை தவிர்க்க 6 கலவர தடுப்பு வாகனங்கள், 3 தண்ணீரை பீய்ச்சி அடிக்கும் வாகனங்கள் மற்றும் தீயணைப்பு வாகனங்கள் தயார் நிலையில் வைக்கப்பட்டுள்ளன.