பா.ம.க. நிறுவனர் ராமதாஸ் மருத்துவமனையில் அனுமதி; காரணம் என்ன?

பா.ம.க நிறுவனர் ராமதாசுக்கும் அவருடைய மகன் அன்புமணி ராமதாஸுக்கும் இடையே மோதல் போக்கு நிலவி வருகிறது. ராமதாஸ், பா.ம.க தலைவராக இருந்த அன்புமணியை அந்த பதவியில் இருந்து நீக்கி அறிவித்தார். மேலும், டாக்டர் ராமதாஸ் பா.ம.க-வின் தலைவராக செயல்படுவார் என்று அறிவித்தார். 

அன்புமணி தானே பா.ம.க தலைவர் என்றும் அவரை நீக்கும் அதிகாரம் ராமதாசுக்கு இல்லை என்று கூறி தனி அணியாக செயல்பட்டு வருகிறார்.

இந்நிலையில், பா.ம.க நிறுவனர் டாக்டர் ராமதாஸ் ஞாயிற்றுக்கிழமை திடீரெனச் சென்னையில் அப்பல்லோ மருத்துவமனையில் அனுமதிக்கப்பட்டார்.

பா.ம.க நிறுவனர் டாக்டர் ராமதாசுக்கு 86 வயது ஆகிறது. முதுமை காரணமாக அவ்வப்போது மருத்துவப் பரிசோதனை செய்வது வழக்கம். அந்த வகையில், டாக்டர் ராமதாஸ் இதயப் பரிசோதனைக்காக மருத்துவமனையில் அனுமதிக்கப்பட்டுள்ளதாக தகவல் வெளியாகி உள்ளது.

மேலும், மருத்துவப் பரிசோதனைகள் நிறைவடைந்ததும் மருத்துவர்களின் ஆலோசனைகளுக்குப் பிறகு, அவர் மருத்துவமனையில் இருந்து திங்கள்கிழமை டிஸ்சார்ஜ் செய்யப்படுவார் என்று தகவல் வெளியாகி உள்ளது.