கூட்டாட்சி என்றாலே மத்திய அரசுக்கு 'அலர்ஜி' - மதுரை மார்க்சிஸ்ட் மாநாட்டில் ஸ்டாலின் பேச்சு

மதுரையில் மார்க்சிஸ்ட் கம்யூனிஸ்ட் கட்சியின் 24-வது அகில இந்திய மாநாடு நடைபெற்று வருகிறது. ஏப்ரல் 6-ம் தேதி வரை நடைபெறவுள்ள இம்மாநாட்டில் “கூட்டாட்சி கோட்பாடே இந்தியாவின் வலிமை” என்ற தலைப்பில் கருத்தரங்கு நிகழ்ச்சி இடம்பெறுகிறது. மாநாட்டில் தமிழக முதலமைச்சர் மு.க. ஸ்டாலின், கேரள முதலமைச்சர் பினராயி விஜயன், மார்க்சிஸ்ட் கம்யூனிஸ்ட் கட்சியின் மாநிலச் செயலாளர் சண்முகம், கட்சியின் ஒருங்கிணைப்பாளர் பிரகாஷ் காரத், மதுரை நாடாளுமன்ற உறுப்பினர் சு. வெங்கடேசன் உள்ளிட்ட பல்வேறு தலைவர்கள் கலந்து கொண்டனர்.

மாநாட்டில் பேசிய முதலமைச்சர் மு.க. ஸ்டாலின், “கூட்டாட்சி என்ற வார்த்தையே மத்திய ஆட்சியாளர்களுக்கு ஏற்றுக்கொள்ள முடியாத ஒன்றாகிவிட்டது. மத்திய அரசின் கொள்கைகளால் அதிகம் பாதிக்கப்படுவது தமிழகத்தும், கேரளமும்தான். மாநிலங்களுக்கு எதிரான நடவடிக்கைகள் தொடர்கின்றன” எனக் கூறினார். மேலும், “மத்திய அரசின் செயல்பாடுகள் மாநில சுயாட்சிக்கு பங்கமூட்டுகின்றன. ஆளுநர்கள் மாநில அரசுகளுக்கு எதிராக செயல்படுகின்றனர். கூட்டாட்சி தத்துவத்தையே கேள்விக்குறியாக்க முயற்சிக்கின்றனர். இது சுதந்திரத்திற்கு பாதகமானது” என்று அவர் தெரிவித்தார்.

நாடாளுமன்றத் தேர்தலுக்கான எதிர்க்கட்சிகளின் ஒற்றுமையை குறிப்பிடுகையில், “2019 முதல் நாங்கள் உறுதியாக ஒன்றிணைந்துள்ளோம். சிலர் இந்த அணியில் பிளவு ஏற்படுத்த முயல்கிறார்கள், ஆனால் அவர்களின் முயற்சி தோல்வியடைய வேண்டும். சமத்துவ சமூகத்திற்காகவே தேர்தல் கூட்டணியை அமைத்துள்ளோம்” என்று முதலமைச்சர் ஸ்டாலின் வலியுறுத்தினார்.