பூர்வீக இடம் முக்கியமல்ல; புலம்பெயர் தொழிலாளர் வாக்குரிமை குறித்த ப.சிதம்பரம் குற்றச்சாட்டுக்கு தேர்தல் ஆணையம் விளக்கம்!

தமிழ்நாட்டில் 6.5 லட்சம் புலம்பெயர் தொழிலாளர்கள் வாக்காளர் பட்டியலில் சேர்க்கப்படுவதாக வெளியான தகவல் தொடர்பாக முன்னாள் மத்திய அமைச்சர் ப. சிதம்பரம் எழுப்பிய குற்றச்சாட்டுகள் பெரும் பரபரப்பை ஏற்படுத்தியுள்ளன.

இந்த குற்றச்சாட்டுகளை தேர்தல் ஆணையம் உடனடியாக மறுத்து, "ஆதாரமற்றது" மற்றும் "தவறான தகவல்" என்று விளக்கம் அளித்துள்ளது.
முன்னாள் மத்திய அமைச்சர் ப. சிதம்பரம் தனது எக்ஸ் தளத்தில், பீகார் புலம்பெயர் தொழிலாளர்கள் தமிழ்நாட்டில் வாக்காளராக பதிவு செய்வது குறித்து சில கேள்விகளை எழுப்பினார். ஒரு புலம்பெயர் தொழிலாளியின் குடும்பம் பீகாரில் நிரந்தரமாக வசிக்கும் போது, அந்த தொழிலாளியை தமிழ்நாட்டில் நிரந்தரமாக குடியேறியவராக கருதுவது எப்படி? மேலும், அவரை தமிழ்நாட்டில் வாக்காளராக சேர்ப்பது எப்படி சாத்தியம்? என்று அவர் கேள்வி எழுப்பினார்.

பீகாரில் நடைபெறும் SIR (Special Identification and Registration) திட்டத்தை புலம்பெயர் தொழிலாளர்களுக்கு இழைக்கப்பட்ட அவமானம்" என்றும், தமிழ்நாட்டு வாக்காளர்களின் உரிமைகளில் அப்பட்டமான தலையீடு" என்றும் அவர் சாடினார்.  மேலும், திமுக மற்றும் அதன் கூட்டணி கட்சிகள், புலம்பெயர் தொழிலாளர்கள் தங்கள் சொந்த மாநிலத்தில் வாக்காளராக பதிவு செய்வதை எதிர்த்த ஒரு நாள் கழித்து, சிதம்பரம் இந்தக் கருத்தை தெரிவித்தார்.

சிதம்பரத்தின் குற்றச்சாட்டுகளுக்கு உடனடியாக தேர்தல் ஆணையம் எக்ஸ் தளத்தில் விளக்கமளித்தது. மக்கள் பிரதிநிதித்துவ சட்டம், 1950-ன் பிரிவு 19(b) ஐ சுட்டிக்காட்டி, ஒரு தொகுதியில் வழக்கமாக வசிக்கும் ஒவ்வொரு நபரும் அந்த தொகுதியின் வாக்காளர் பட்டியலில் பதிவு செய்யப்பட தகுதியுடையவர் என்று கூறியது. தமிழ்நாட்டை சேர்ந்த ஒரு நபர் டெல்லியில் வழக்கமாக வசித்து வந்தால், அவர் டெல்லியில் வாக்காளராக பதிவு செய்ய தகுதியுடையவர். அதேபோல், பீகாரை சேர்ந்த ஒரு நபர் சென்னையில் வழக்கமாக வசித்தால், அவர் சென்னையில் வாக்காளராக பதிவு செய்ய தகுதியுடையவர்" என்று தேர்தல் ஆணையம் தெளிவாக விளக்கியுள்ளது.

தேர்தல் ஆணையத்தின் இந்த விளக்கமானது, ஒரு நபர் எந்த இடத்தில் "வழக்கமாக வசித்து வருகிறார்" என்பதை அடிப்படையாகக் கொண்டே வாக்காளராக பதிவு செய்யப்படுகிறார் என்பதை உறுதிப்படுத்துகிறது. அவருடைய பூர்வீக இடம் முக்கியமல்ல என்பதையும் இது தெளிவுபடுத்துகிறது.
இந்த விவகாரம் அரசியல் வட்டாரத்தில் பெரும் சலசலப்பை ஏற்படுத்தியுள்ளது. திமுக மற்றும் அதன் கூட்டணி கட்சிகள், புலம்பெயர் தொழிலாளர்களின் வாக்காளர் பதிவு விவகாரத்தை ஒரு முக்கிய பிரச்சனையாக கையில் எடுத்துள்ளன.

தமிழ்நாட்டின் மக்கள் தொகை மற்றும் வாக்காளர் கட்டமைப்பில் இது பாதிப்பை ஏற்படுத்தலாம் என்று அவர்கள் கவலை தெரிவிக்கின்றனர். ஆனால், தேர்தல் ஆணையத்தின் விளக்கம், சட்ட விதிகளின்படி இந்த நடைமுறை மேற்கொள்ளப்படுகிறது என்பதை உறுதிப்படுத்துகிறது.