செப்.5-ம் தேதி மனம் திறந்து பேசுவேன்: செங்கோட்டையன் பரபர பேட்டி

2026 தமிழ்நாடு சட்டமன்றத் தேர்தலுக்கான களம் சூடுபிடித்துள்ள நிலையில், ஆளும் கட்சியான திமுகவும் அதன் கூட்டணிக் கட்சிகளும் தேர்தல் ஆயத்தப் பணிகளில் ஈடுபட்டு வருகின்றன. அதே நேரத்தில் எதிர்க்கட்சியான அ.தி.மு.க.விலும் உட்கட்சிப் பூசல்கள், கூட்டணி இழுபறிகள் எனப் பல்வேறு நிகழ்வுகள் அரங்கேறி வருகின்றன.

அ.தி.மு.க. பொதுச் செயலாளரும், எதிர்க்கட்சித் தலைவருமான எடப்பாடி பழனிசாமி (இ.பி.எஸ்.) 'மக்களைக் காப்போம்; தமிழகத்தை மீட்போம்' என்ற பெயரில் தேர்தல் பரப்புரையை மேற்கொண்டார். இ.பி.எஸ்ஸின் இந்த முயற்சிக்கு மூத்த நிர்வாகியும், முன்னாள் அமைச்சருமான செங்கோட்டையன் ஆதரவு அளிக்காதது அ.தி.மு.க. வட்டாரத்தில் பேசுபொருளாகியுள்ளது.

செங்கோட்டையன், இ.பி.எஸ். மீது கடந்த ஆறு மாதங்களாக அதிருப்தியில் இருப்பதாகக் கூறப்படுகிறது. ஈரோடு மாவட்ட சட்டமன்றத் தொகுதிகளில் இ.பி.எஸ். பிரச்சாரம் செய்யாதது இந்த அதிருப்திக்கு மேலும் வலு சேர்ப்பதாகத் தெரிகிறது. செங்கோட்டையன் தனது ஆதரவாளர்களுடன் செப்டம்பர் 5-ஆம் தேதி ஆலோசனை நடத்திவிட்டு, பின்னர் செய்தியாளர்களைச் சந்திப்பதாகக் கூறப்படுவது, அ.தி.மு.க.வில் புதிய சர்ச்சையை ஏற்படுத்தும் என எதிர்பார்க்கப்படுகிறது.

இந்நிலையில் கோபிசெட்டிபாளையத்தில் முன்னாள் அமைச்சர் செங்கோட்டையன் செய்தியாளர்களை சந்தித்தபோது, "செப்டம்பர் 5 ஆம் தேதி அனைத்து விவரங்களும் முழுமையாக தெரிவிக்கப்படும், மனம் திறந்து பேசுவேன்" என கூறியுள்ளார்.

அ.தி.மு.க.வை மீண்டும் ஒன்றிணைக்க வேண்டும் என்ற சசிகலாவின் கருத்தை முன்னாள் முதலமைச்சர் ஓ. பன்னீர்செல்வம் (ஓ.பி.எஸ்.) வரவேற்றுள்ளார். இது அ.தி.மு.க.வை ஒரே அணியாக ஒருங்கிணைக்க ஒரு வாய்ப்பாக அமையும் என்று அவர் நம்புகிறார். அதேவேளையில், நடிகர் விஜய் புதிதாகத் தொடங்கிய தமிழக வெற்றிக் கழகத்துடன் (த.வெ.க.) கூட்டணி அமைப்பது குறித்துப் பேசியபோது, "எதிர்காலத்தில் எதுவும் நடக்கலாம்" என ஓ.பி.எஸ். குறிப்பிட்டது, அவரது அரசியல் நிலைப்பாடு குறித்துப் பல கேள்விகளை எழுப்பியுள்ளது.

அதேபோல், அ.ம.மு.க. பொதுச் செயலாளர் டி.டி.வி. தினகரன், தங்கள் கட்சியின் கூட்டணி குறித்த அறிவிப்பு வரும் டிசம்பர் மாதத்தில் வெளியாகும் எனக் கூறியுள்ளார். இது அ.தி.மு.க.வின் எதிர்கால அரசியல் பாதையில் மேலும் குழப்பத்தை ஏற்படுத்தியுள்ளது. இந்த அரசியல் மாற்றங்களுக்கு மத்தியில், நடிகர் விஜய் தனது தமிழக வெற்றிக் கழகத்தின் மூலம் முதல் முறையாகத் தேர்தலில் களம் காண்கிறார்.

புதிய கட்சி, புதிய முகம் என்ற நிலையில், விஜய்யின் வருகை அ.தி.மு.க. மற்றும் திமுக என இரு கட்சிகளின் வாக்குகளையும் எந்த அளவுக்குப் பாதிக்கும் என்பதைத் தேர்தல் முடிவுகளே தீர்மானிக்கும். ஒட்டுமொத்தமாக, 2026 சட்டமன்றத் தேர்தல் களமானது, அ.தி.மு.க.வில் நடைபெறும் உட்கட்சி மோதல்கள், ஓ.பி.எஸ். - சசிகலா - தினகரன் ஆகியோரின் அரசியல் நிலைப்பாடுகள், மற்றும் விஜய்யின் புதிய கட்சியின் வருகை எனப் பல்வேறு காரணங்களால் மிகவும் சிக்கலாகவும், எதிர்பாராத திருப்பங்கள் நிறைந்ததாகவும் மாறியுள்ளது.