முகத்தை மறைக்க வேண்டிய அவசியம் எனக்கு எள் முனை அளவும் கிடையாது: குற்றச்சாட்டுகளுக்கு இ.பி.எஸ் பதிலடி

அ.இ.அ.தி.மு.க. பொதுச்செயலாளர் எடப்பாடி பழனிசாமி, தனது எழுச்சிப் பயணம் முதல் டெல்லிப் பயணம் வரை பல்வேறு விவகாரங்கள் குறித்து சேலத்தில் செய்தியாளர் சந்திப்பில் விளக்கமளித்தார். தி.மு.க. அரசின் மீது குற்றச்சாட்டுகளை முன்வைத்தும், தனக்கு எதிரான விமர்சனங்களுக்கு பதிலளித்தும் அவர் பேசினார்.

சமீபத்தில் 153 சட்டமன்றத் தொகுதிகளில் தான் மேற்கொண்ட எழுச்சிப் பயணத்திற்கு மக்கள் கொடுத்த ஆதரவு, வரவிருக்கும் சட்டமன்றத் தேர்தலில் அ.இ.அ.தி.மு.க. கூட்டணிக்கு வெற்றி உறுதி என்பதை உணர்த்தியதாகப் பழனிசாமி தெரிவித்தார். தி.மு.க. அரசு மீது மக்கள் மத்தியில் அதிருப்தி இருப்பதாகவும், ஆட்சி மாற்றத்தை மக்கள் விரும்புவதாகவும் அவர் கூறினார்.

முதலமைச்சர் மு.க.ஸ்டாலின் இரட்டை வேடம் போடுவதாகப் பழனிசாமி குற்றம் சாட்டினார். தி.மு.க. எதிர்க்கட்சியாக இருந்தபோது பிரதமர் மோடி சென்னைக்கு வந்தபோது கருப்புக் கொடி காட்டிய ஸ்டாலின், இப்போது ஆளுங்கட்சியாக இருக்கும்போது அவரை வரவேற்று நிகழ்ச்சிகளை நடத்தியதைக் குறிப்பிட்டுக் காட்டினார். இது தி.மு.க.வின் அரசியல் நிலைப்பாட்டில் உள்ள முரண்பாடுகளை வெளிப்படுத்துவதாகவும் அவர் விமர்சித்தார்.

அமைச்சர் செந்தில் பாலாஜி விவகாரத்தில் தி.மு.க.வின் நிலைப்பாட்டை அவர் கடுமையாக விமர்சித்தார். எதிர்க்கட்சியாக இருந்தபோது செந்தில் பாலாஜியை ஊழல்வாதி என ஸ்டாலினே விமர்சித்த நிலையில், ஆட்சிக்கு வந்த பிறகு அவருக்கு முக்கிய துறைகளை வழங்கியது ஏன் என அவர் கேள்வி எழுப்பினார். இது தி.மு.க.வின் ஊழல் குறித்த நிலைப்பாட்டில் உள்ள முரண்பாடுகளைக் காட்டுவதாக அவர் குறிப்பிட்டார்.

டெல்லிப் பயணத்தின்போது மத்திய உள்துறை அமைச்சர் அமித் ஷா உடனான சந்திப்பின் போது தனது முகத்தைத் துடைத்ததை ஊடகங்கள் தவறாக சித்தரித்ததாகப் பழனிசாமி குற்றம்சாட்டினார். ஒரு முதலமைச்சராக மு.க.ஸ்டாலின் கூட இந்த தனிப்பட்ட விஷயத்தைப் பற்றிப் பேசியது சிறுபிள்ளைத்தனம் என்றும், தனக்கு எந்தவொரு சட்டவிரோத செயல்களையும் மறைக்க வேண்டிய அவசியம் இல்லை என்றும் அவர் விளக்கமளித்தார்.

மறைந்த முன்னாள் முதலமைச்சர் ஜெயலலிதா மற்றும் பசும்பொன் முத்துராமலிங்கத் தேவர் ஆகியோருக்கு பாரத ரத்னா விருது வழங்க வேண்டும் என்று உள்துறை அமைச்சரிடம் கோரிக்கை விடுத்ததாகப் பழனிசாமி தெரிவித்தார். நீட் தேர்வை ரத்து செய்ய முடியாது என முதலமைச்சர் ஸ்டாலின் ஒப்புக்கொண்டதன் மூலம், தி.மு.க. அரசு மக்களை ஏமாற்றியது அம்பலமாகிவிட்டதாக அவர் கூறினார்.

தனது ஆட்சிக்காலத்தில் மத்திய அரசு அளித்த உதவிகளால் சிறப்பாகச் செயல்பட முடிந்தது எனத் தெரிவித்தார். மேலும், அ.இ.அ.தி.மு.க. மற்றும் பா.ஜ.க. கூட்டணி குறித்து அமித் ஷா தெளிவுபடுத்தியதால் மீண்டும் மீண்டும் அது குறித்து கேள்வி கேட்க வேண்டாம் எனவும் ஊடகங்களைக் கேட்டுக் கொண்டார்.

மேலும் நான் முகமூடி அணியவில்லை, டிடிவி தினகரன் தான் முகமூடி அணிந்து அதிமுகவிற்குள் நுழைந்தார். கட்சியில் இருந்து நீக்கப்பட்டவர்களிடம் தொடர்பு வைத்திருந்தால் நடவடிக்கை பாயும் என்பதே சிறப்பு தீர்மானம் என்பதால் அதிமுக சிறப்பு தீர்மானத்தின் படி செங்கோட்டையன் மீது நடவடிக்கை எடுக்கப்படும் என இபிஎஸ் கூறியுள்ளார்.

2011-யில் இவர் அம்மாவால் கட்சியிலிருந்து நீக்கப்பட்டார். அம்மா உயிரோடு இருந்தவரை சென்னை பக்கமே அவர் வரவில்லை. அம்மாவில் இறுதிச்சடங்கிற்குதான் இந்தப் பக்கமே வந்தார். அப்படிப்பட்டவர் இப்போது என்ன உள்நோக்கத்தோடு பேசுகிறார் என எனக்கு தெரியவில்லை என்று இ.பி.எஸ் கூறினார்.

மேலும் விசுவாசத்தை பற்றி ரகுபதி பேசியதற்கு, விசுவாசம் என்றால் என்ன விலை என்று கேட்பவர்தானே நீங்கள். எம்.ஜி.ஆரால் எம்.எல்.ஏ ஆக்கப்பட்டு அம்மாவால் அமைச்சராக்கப்பட்ட நீங்கள், திமுகவில் சேர்ந்துவிட்டு இவ்வாறு பேசுவதை ஏற்க முடியாது என இபிஎஸ் கூறியுள்ளார்.