மின் மீட்டர்கள் பொருத்துவதை நிறுத்துவதன் மூலம் விவசாயிகளின் அச்சத்தைப் போக்க முதல்வர் மு.க.ஸ்டாலின் நடவடிக்கை எடுக்க வேண்டுமென தமிழ்நாடு விவசாயிகள் சங்கம் கோரி உள்ளது.
விவசாய சேவை இணைப்பில் மீட்டர்கள் பொருத்தும் பணி மீண்டும் தொடங்கியுள்ளது. அதிமுக ஆட்சியில் விவசாய இணைப்புக்கு மீட்டர் நிர்ணயம் செய்யத் தொடங்கியபோது, விவசாயிகளின் கடும் எதிர்ப்பு காரணமாக நிறுத்தப்பட்டது. அப்போது, திமுகவும் எதிர்ப்பு தெரிவித்து அறிக்கை வெளியிட்டது.
மீட்டர் பொருத்தினால், எதிர்காலத்தில் இலவச மின் திட்டம் கைவிடப்படும் என விவசாயிகள் அஞ்சுவதாக தமிழ்நாடு விவசாயிகள் சங்கத்தின் பொதுச்செயலாளர் சண்முகம் தெரிவித்தார். மேலும் மின்சாரத்துறை அமைச்சர் செந்தில்பாலாஜியின் அறிக்கை, மீட்டர்கள் நிர்ணயம் செய்வதை உறுதி செய்துள்ளது என்றார்.
விவசாய இணைப்புகளுக்கு மீட்டர் பொருத்தப்பட்டாலும் விவசாயிகளுக்கு இலவச மின்சாரம் தொடரும் என்ற அமைச்சரின் கூற்று முற்றிலும் ஏற்றுக்கொள்ள முடியாதது.
ஏற்கனவே, இலவச மற்றும் மானியத்துடன் கூடிய மின்சாரத்தை ரத்து செய்யும் வகையில் மின்சார திருத்த மசோதா 2020இல் மத்திய அரசு கொண்டு வந்துள்ளது. இந்த சூழ்நிலையில், நிர்ணயித்த மீட்டர் அத்தகைய நடவடிக்கையை மட்டுமே மீண்டும் உறுதிப்படுத்துகிறது. விவசாயிகளிடம் கட்டணம் வசூலிக்கும் எண்ணம் அரசுக்கு இல்லை என்றால், அதற்கு ஏன் பல கோடி ரூபாய் செலவிட வேண்டும்? என இவ்வாறு சண்முகம் பேசினார்.
“தமிழ் இந்தியன் எக்ஸ்பிரஸின் அனைத்து செய்திகளையும் உடனுக்குடன் டெலிகிராம் ஆப்பில் பெற https://t.me/ietamil“
