கலைஞர் பேனா சிலை இடம் மாற்ற முடிவு: மத்திய அமைச்சர் சந்திப்பு காரணமா?

முன்னாள் முதல்வர் கருணாநிதியின் நினைவாக வங்கக்கடலில் அமைக்க திட்டமிட்டிருந்த  பேனா சின்னத்தை, அவரின் நினைவிடத்திலேயே அமைக்க முடிவு செய்யப்பட்டுள்ளதாக தகவல் வெளியாகி உள்ளது.

மெரினா கடற்கரையில் அண்ணா சமாதி அருகே முன்னாள் முதல்வர்  கருணாநிதி உடல் அடக்கம் செய்யப்பட்டுள்ள இடத்தில், அவருக்கு நினைவிடம் அமைக்கும் பணி நடந்து வருகிறது. நினைவிடத்தின் பின்புரம் வங்கக்கடலில்  பேனா வடிவில் நினைவுச் சின்னம் அமைக்க அரசு நடவடிக்கை எடுத்தது. கடற்கரையில் இருந்து 748 மீட்டர் தூரம் பாலம் அமைத்து, 134 அடி உயரத்தில் ரூ. 81 கோடியில் நினைவு சின்னம் அமைக்க அரசு முடிவெடுத்தது.

தமிழக கடலோர மேலாண்மை ஆணையத்தின் அனுமதியை பெற்றது. தொடர்ந்து மத்திய சுற்றுச்சூழல் அனுமதி கோரியது. நினைவுச் சின்னம் அமைக்க பல்வேறு நிபந்தனைகளுடன் மத்திய சுற்றுச்சூழல் ஆணையம் அனுமதி வழங்கியது. இதனையடுத்து, அடுத்தக்கட்ட பணிகளை தமிழக பொதுப்பணி துறை தொடங்கியது. நினைவிடத்தில் பணிகள் நடப்பதை முதல்வர் ஸ்டாலின் சமீபத்தில் 2 முறை பார்வையிட்டார்.

இந்நிலையில், வழங்கக்கடலில் பேனா சின்னம் அமைக்கும் முடிவை தமிழக அரசு , குறிப்பாக முதல்வர் மாற்றிக் கொண்டுள்ளதாகவும் தகவல் வெளியாகி  உள்ளது. கருணாநிதி நினைவிடத்திலேயே சிறிய அளவில் பேனா சின்னம் அமைக்க முடிவு செய்யப்பட்டுள்ளதாகவும் கூறப்படுகிறது.

கடந்த 14ம் தேதி தலைமைச் செயலகத்தில் முதல்வர் ஸ்டாலினை, மத்திய சுற்றுச்சூழல் துறை அமைச்சர் பூபேந்திரா யாதவ் சந்தித்து பேசினார். இந்நிலையில் இந்த சந்திப்பில் பேனா நினைவுச் சின்னம் அமைப்பது தொடர்பாக பேசியிருக்கலாம் என்று கூறப்படுகிறது. ஆனால் இது குறித்து அரசு தரப்பில்  அதிகாரப்பூர்வ தகவல் வெளியாகவில்லை.  

“தமிழ் இந்தியன் எக்ஸ்பிரஸின் அனைத்து செய்திகளையும் உடனுக்குடன் டெலிகிராம் ஆப்பில் பெற https://t.me/ietamil“