காசி தமிழ் சங்கமம்: சென்னையில் இருந்து வாரணாசிக்கு 7 சிறப்பு ரயில்கள் இயக்கம்

உத்தரபிரதேச மாநிலம் வாரணாசியில், காசி தமிழ்ச் சங்கமம் கடந்த வருடம் நடைபெற்றது. இதில் தமிழகத்தில் இருந்து 2,500 பேர் சிறப்பு அழைப்பாளர்களாக கலந்துகொண்டனர்.

தற்போது மீண்டும் வாரணாசியில் டிசம்பர் 15 முதல் 31 வரை ‘காசி தமிழ்ச் சங்கமம்-2’ நடைபெற உள்ளது. கடந்த முறையை போல்,  இதையும் உ.பி. அரசுடன் இணைந்து மத்திய கல்வி அமைச்சகம் நடத்துகிறது.

இதன் ஒரு பகுதியாக தமிழகம், புதுச்சேரியில் இருந்து சுமார் 1,400 பேர் வாரணாசி, பிரயாக்ராஜ், அயோத்தி ஆகிய இடங்களுக்கு ரயிலில் சென்று வர 8 நாட்கள் பயணம் திட்டமிடப்பட்டு இருக்கிறது.

இந்நிலையில், காசி தமிழ் சங்கமத்தை முன்னிட்டு சென்னை, கோவை, கன்னியாகுமரி ஆகிய ஊா்களிலிருந்து வாரணாசிக்கு டிச.15- முதல் 7 சிறப்பு ரயில்கள் இயக்கப்படவுள்ளன

இது குறித்து தெற்கு ரயில்வே வெளியிட்ட செய்திக் குறிப்பில்; ‘காசி தமிழ் சங்கமத்தின் இரண்டாம் கட்ட நிகழ்ச்சி வாரணாசியில் டிச.17 முதல் டிச.30- வரை நடைபெறுகிறது.

இதற்காக தமிழகத்திலிருந்து முதல் ரயில், சென்னை சென்ட்ரலில் இருந்து டிச.15-ஆம் தேதி காலை 10.45 மணிக்கு புறப்படும். பின்னா், வாரணாசியில் இருந்து டிச.20-ஆம் தேதி இரவு 11.20 மணிக்கு புறப்பட்டு டிச.22-ஆம் தேதி சென்னை சென்ட்ரல் வந்தடையும்.

இரண்டாம் ரயில், கன்னியாகுமரியில் இருந்து டிச.16-ஆம் தேதி புறப்பட்டு திருநெல்வேலி, மதுரை, திருச்சி, தஞ்சாவூா், கும்பகோணம், சீா்காழி, சிதம்பரம், கடலூா் துறைமுகம், சென்னை எழும்பூா், நாக்பூா் வழியாக டிச.19-ஆம் தேதி வாரணாசி சென்றடையும்.

பின் மறுமார்க்கமாக வாரணாசியில் இருந்து டிச.22-ஆம் தேதி புறப்பட்டு டிச.25-ஆம் தேதி கன்னியாகுமரி வந்தடையும்.

மூன்றாம் ரயில், கோவையில் இருந்து டிச.19-ஆம் தேதி புறப்பட்டு திருப்பூா், ஈரோடு, சேலம், ஜோலார்பேட்டை, காட்பாடி, பெரம்பூா், நாக்பூா் வழியாக டிச.21-ஆம் தேதி வாரணாசி சென்றடையும். மறுமார்க்கமாக வாரணாசியில் இருந்து டிச.24-ஆம் தேதி புறப்பட்டு டிச.27-ஆம் தேதி கோவை வந்தடையும்.

நான்காம் ரயில், கன்னியாகுமரியில் இருந்து டிச.20-ஆம் தேதி புறப்பட்டு திருநெல்வேலி, மதுரை, திருச்சி, ஸ்ரீரங்கம், திருவண்ணாமலை, வேலூா், பெரம்பூா், நாக்பூா் வழியாக டிச.24-ஆம் தேதி அதிகாலை 4.30 மணிக்கு வாரணாசி சென்றடையும். மறுமார்க்கமாக வாரணாசியில் இருந்து டிச.26-ஆம் தேதி புறப்பட்டு டிச.29-ஆம் தேதி கன்னியாகுமரி வந்தடையும்.

ஐந்தாம் ரயில், சென்னை சென்ட்ரலில் இருந்து டிச.23-ஆம் தேதியும், மறுமார்க்கமாக வாரணாசியில் இருந்து டிச.28-ஆம் தேதியும் இயக்கப்படும். ஆறாவது ரயில், கோவையில் இருந்து டிச.25-ஆம் தேதியும், மறுமார்க்கமாக டிச.30-ஆம் தேதியும் இயக்கப்படும்.

தொடா்ந்து, ஏழாம் ரயில், சென்னை சென்ட்ரலில் இருந்து டிச.27-ஆம் தேதியும், மறுமார்க்கமாக வாரணாசியில் இருந்து ஜன.1-ஆம் தேதியும் இயக்கப்படும். இதற்கான பயணச்சீட்டு முன்பதிவு விரைவில் தொடங்கப்படும்’ எனத் தெரிவிக்கப்பட்டுள்ளது.

“தமிழ் இந்தியன் எக்ஸ்பிரஸின் அனைத்து செய்திகளையும் உடனுக்குடன் டெலிகிராம் ஆப்பில் பெற  t.me/ietamil“