'காவிரியின் கடைமடை'- மயிலாடுதுறை மக்களவை தொகுதி ஒரு பார்வை

மயிலாடுதுறை, தமிழ்நாட்டின் 39 மக்களவைத் தொகுதிகளுள் 28வது தொகுதி ஆகும்.

மயிலாடுதுறை மாவட்டத்துக்குபட்ட மயிலாடுதுறை, சீர்காழி (தனி), பூம்புகார் ஆகிய சட்டப்பேரவைத் தொகுதிகளையும், தஞ்சாவூர் மாவட்டத்துக்குபட்ட திருவிடைமருதூர் (தனி), கும்பகோணம், பாபநாசம் ஆகிய சட்டப்பேரவைத் தொகுதிகளையும் உள்ளடக்கியது இத்தொகுதி.

தலைக்காவிரியில் புறப்பட்டு தமிழகம் முழுவதும் செழிக்க வைக்கும் காவிரி ஆறு, கடலில் சங்கமிக்கும் பகுதி இது. காவிரி பாசன விவசாய பகுதியான இந்த தொகுதி முழுக்க முழுக்க விவசாயத்தை மையமாக கொண்டு இயங்குகிறது. காவிரியில் நீர்வரத்து இல்லாத காலங்களில் நிலத்தடி நீரை நம்பி விவசாயம் நடைபெற்று வருகிறது. காவிரி ஆறு பல பகுதிகளில் பாய்ந்து வடக்கு கடைமடைப்பகுதியை கொண்டது இந்த தொகுதி. இதனால் காவிரிக்கான போராட்டம் தீவிரமாக இருக்கும் இடம்.

இங்கு வன்னியர்கள் பெரும்பான்மையாக வசிக்கிறார்கள். வெற்றியைத் தீர்மானிப்பதில் அவர்கள் பங்கு அதிகம். பட்டியலினத்தவரும் மீனவச் சமூகத்தவர்களும் கணிசமான எண்ணிக்கையில் உள்ளனர்.

தேர்தல் வரலாறு

மயிலாடுதுறை மக்களவைத் தொகுதியில் 1967-க்குப் பின் காங்கிரஸ் 7 முறையும், திமுக 3 முறையும், அதிமுக. தமாகா தலா 2 முறையும் வெற்றி பெற்றுள்ளன.

வழக்கமாகவே காங்கிரஸ் பாரம்பரிய தொகுதியாகவே இது இருந்துள்ளது.

மயிலாடுதுறை மக்களவைத் தொகுதியில் இதுவரை காங்கிரஸ் 11 முறை வெற்றி பெற்றுள்ளது.

காங்கிரஸ் கட்சியின் மூத்த தலைவர் மணிசங்கர் ஐயர் நீண்டகாலமாக எம்.பி.யாக இருந்த தொகுதி. தற்போது 83 வயதாகும் இவர் இதற்கு முன் இத்தொகுதியில் 1991, 1999, 2004 ஆகிய தேர்தல்களில் வெற்றி பெற்றுள்ளார். 2009 தேர்தலில் போட்டியிட்டு தோல்வியடைந்தார்.

கடந்த மக்களவை தேர்தல்

மயிலாடுதுறை தொகுதியில் 1967, 1971 ஆகிய தேர்தல்களில் திமுகவை சேர்ந்த சுப்ரவேலு எம்.பியாக இருந்தார். கடந்த 1984, 1989, 1991 ஆகிய 3 மக்களவைத் தேர்தல்களில் மயிலாடுதுறையில் போட்டியிட்ட திமுக தோல்வியை அடைந்தது. அதன்பின்பு தொடர்ந்து கூட்டணி கட்சிகளுக்கே இந்த தொகுதியை ஒதுக்கிவந்த நிலையில் 2019 மக்களவைத் தேர்தலில் திமுக நேரடியாக போட்டியிட்டது.

28 ஆண்டுகளுக்கு பிறகு 2019 தேர்தலில், மயிலாடுதுறை தொகுதியில் திமுக வேட்பாளர் ராமலிங்கம் 2,61,314 வாக்கு வித்தியாசத்தில் வெற்றி பெற்றார்.

இதுவரை இந்த தொகுதியில் மக்களவை உறுப்பினர்களாக இருந்தவர்களின் பட்டியல் (Credit- Wikipedia)

1951 இரட்டைஉறுப்பினர் ஆனந்தநம்பியார் கம்யூனிஸ்ட், சந்தானம் காங்கிரசு

1962 (தனி) மரகதம் சந்திரசேகர்- காங்கிரசு

1967 (தனி) சுப்ரவேலு தி.மு.க

1971 (தனி) சுப்ரவேலு தி.மு.க

1977 - குடந்தை ராமலிங்கம் - காங்கிரசு

1980 - குடந்தை ராமலிங்கம் - காங்கிரசு

1984 - இ. எசு. எம். பக்கீர்முகம்மது - காங்கிரசு

1989 - இ. எசு. எம். பக்கீர்முகம்மது - காங்கிரசு

1991 - மணிசங்கர் அய்யர் - காங்கிரசு

1996 - பி.வி. இராஜேந்திரன் - தமிழ் மாநில காங்கிரசு

1998 - கிருஷ்ணமூர்த்தி - தமிழ் மாநில காங்கிரசு

1999 - மணிசங்கர் அய்யர் - காங்கிரசு

2004 - மணிசங்கர் அய்யர் - காங்கிரசு

2009 - ஓ. எஸ். மணியன் - அதிமுக

2014 - ஆர். கே. பாரதி மோகன் - அதிமுக

2019 - இராமலிங்கம் - திமுக                                                                                     

வாக்காளர் விவரம்

2024 ஜனவரி 2 ஆம் தேதி வெளியிடப்பட்ட இறுதி வாக்காளர் பட்டியலின்படி மயிலாடுதுறை மக்களவைத் தொகுதியில் மொத்தம் 15,38,351 வாக்காளர்கள் உள்ளனர்.

அதன்படி, மயிலாடுதுறை மாவட்டத்தில் உள்ள மயிலாடுதுறை, பூம்புகார், சீர்காழி ஆகிய மூன்று சட்டப்பேரவைத்  தொகுதிகளில் 3,71,043 ஆண்கள், 3,79,639 பெண்கள் மற்றும் இதர வகுப்பினர் 23 பேர் என மொத்தம் 7,50,705 வாக்காளர்கள் உள்ளனர்.

தஞ்சாவூர் மாவட்டத்தில் உள்ள திருவிடைமருதூர், கும்பகோணம், பாபநாசம் ஆகிய 3 சட்டப்பேரவைத் தொகுதிகளில் 3,85,803 ஆண்கள், 4,01,797 பெண்கள் மற்றும் 46 இதரர் பேர் என மொத்தம் 7,87,646 வாக்காளர்கள் உள்ளனர்.

“தமிழ் இந்தியன் எக்ஸ்பிரஸின் அனைத்து செய்திகளையும் உடனுக்குடன் டெலிகிராம் ஆப்பில் பெற https://t.me/ietamil“