ஆகாஷ் பாஸ்கரன் வழக்கு: இ.டி-க்கு ரூ.30,000 அபராதம் விதித்து ஐகோர்ட் அதிரடி

தமிழக அரசின் டாஸ்​மாக் நிறு​வனத்​துக்கு தனி​யார் நிறு​வனங்​களிடம் இருந்து மது​பானங்​கள் கொள்​முதல் செய்​யப்​படு​வ​தில் பல்​வேறு முறை​கேடு​கள் நடப்​ப​தாக​வும், இதில் வரி ஏய்ப்​பு, சட்​ட​விரோத பண பரிவர்த்​தனை நடந்​திருப்​ப​தாக​வும் அமலாக்​கத் துறைக்கு புகார்​கள் சென்​றன. இதன் அடிப்​படை​யில், சென்னை எழும்​பூரில் உள்ள டாஸ்​மாக் நிறுவன தலைமை அலு​வல​கம், அம்​பத்​தூர் தொழிற்​பேட்​டை​யில் உள்ள டாஸ்மாக் குடோன், அப்​போது அமைச்​ச​ராக இருந்த செந்​தில் பாலாஜி​யின் நண்​பர் வீடு, அலு​வல​கங்​கள், திமுக எம்​.பி.ஜெகத்​ரட்​சக​னின் அக்கார்டு மது​பான உற்​பத்தி நிறு​வனம், எஸ்.​என்.​ஜே, கால்​ஸ், எம்.​ஜி.எம் உள்​ளிட்ட மது​பான உற்​பத்தி நிறு​வனங்​கள், அதன் ஆலைகளில் அமலாக்​கத் துறை கடந்த மார்ச் மாதம் தீவிர சோதனை நடத்​தி​யது.

சென்​னை, கரூர், கோவை, விழுப்​புரம், புதுக்​கோட்டை என 10-க்​கும் மேற்​பட்ட இடங்​களில் இந்த சோதனை நடத்​தப்​பட்​டது. இதில், பல்​வேறு முக்​கிய ஆவணங்​களை கைப்​பற்​றப்​பட்​டன. இதைத் தொடர்ந்​து, டாஸ்​மாக் நிறு​வனத்​துக்கு மது​பானங்​கள் கொள்​முதல் செய்​தது, பார் உரிமம் வழங்​கியது, மது​பானங்​களை மது​பான கடைகளுக்கு கொண்டு செல்​வதற்​கான போக்​கு​வரத்​துக்கு டெண்​டர் வழங்​கியது உள்​ளிட்​ட​வற்​றில் ரூ.1,000 கோடி அளவுக்கு முறை​கேடு நடந்​துள்​ள​தாக அமலாக்​கத்துறை அறிக்கை வெளி​யிட்​டது.

இதன்பின்னர், தொடர்ந்து ஆவணங்களைக் கைப்பற்றுவதற்காக சினிமா தயாரிப்பாளர் ஆகாஷ் பாஸ்கரன் மற்றும் தொழிலதிபர் விக்ரம் ரவீந்திரன் உள்ளிட்டோரின் வீடுகள் மற்றும் அலுவலகங்களில் அமலாக்​கத்துறை சோதனை நடத்தி, இருவரின் வீடுகளுக்கும் சீல் வைத்தது. இதையடுத்து, அமலாக்கத்துறை நடவடிக்கையை எதிர்த்து ஆகாஷ் பாஸ்கரன் மற்றும் விக்ரம் ரவீந்திரன் இருவரும் தனித்தனியாகச் சென்னை உயர்நீதிமன்றத்தில் மனுத்தாக்கல் செய்தனர். 

இந்த மனு நீதிபதிகள் எம்.எஸ்.ரமேஷ் மற்றும் வி.லட்சுமி நாராயணன் அமர்வு முன் விசாரணைக்கு வந்தது. அப்போது அமலாக்கத்துறை சார்பாகத் தாக்கல் செய்த ஆவணங்களில் ஆகாஷ் பாஸ்கரன், விக்ரம் ரவீந்திரன் ஆகியோருக்கு எதிராக எந்த ஆதாரமும் இல்லை எனத் தெரிய வந்தது. இதனால் அமலாக்கத்துறையின் அடுத்த கட்ட நடவடிக்கைக்குத் தடை விதித்தது. மேலும், ஆகாஷ் பாஸ்கரன், விக்ரம் ரவீந்திரன் ஆகியோரிடம் இருந்து பறிமுதல் செய்த பொருட்களையும் ஒப்படைக்கவும் உத்தரவிட்டது. 

இதனைத் தொடர்ந்து கடந்த 11ஆம் தேதி அமலாக்கத்துறை சார்பாக மீண்டும் ஆகாஷ் பாஸ்கரனுக்கு நோட்டீஸ் அனுப்பப்பட்டது. இதுதொடர்பாக மீண்டும் சென்னை உயர்நீதிமன்றத்தில் முறையிடப்பட்டது. அப்போது சென்னை உயர்நீதிமன்றம் அமலாக்கத்துறையின் இந்த நடவடிக்கை நீதிமன்றத்தை அவமதிக்கும் செயல் என்றும், அமலாக்கத்துறையின் செயல்பாடுகள் கண்டனத்திற்குரியது எனக் கூறியும், வழக்கின் விசாரணை ஆகஸ்ட் 6 ஆம் தேதிக்கு ஒத்தி வைத்தது. 

இந்நிலையில், இந்த வழக்கு இன்று புதன்கிழமை சென்னை உயர்நீதிமன்றத்தில் மீண்டும் விசாரணைக்கு வந்தது. அப்போது அமலாக்கத்துறை தரப்பில் பதில் மனு எதுவும் தாக்கல் செய்யப்படவில்லை. அமலாக்கத்துறை சார்பாக ஆஜரான வழக்கறிஞர், வழக்கில் பதில் மனு இன்னும் தயாராகாததால், கூடுதல் அவகாசம் கோரினார். அதற்கு நீதிபதிகள், ஏற்கனவே 2 முறை அவகாசம் வழங்கிய பின்னரும் மேலும் அவகாசம் கேட்பது தவறு என்று தெரிவித்தனர்.

மேலும், பதில் மனுத் தாக்கல் செய்யாத அமலாக்கத்துறைக்கு ரூ.30,000 அபராதம் விதித்து சென்னை உயர்நீதிமன்றம் உத்தரவிட்டது. இந்த அபராதத்தை உயர்நீதிமன்ற நீதிபதியின் நிவாரண நிதிக்கு செலுத்த உத்தரவு பிறப்பிக்கப்பட்டுள்ளது. இந்த வழக்கை அக்டோபர் 20 ஆம் தேதிக்கு ஒத்திவைத்து நீதிபதிகள் எம்.எஸ்.ரமேஷ், வி.லட்சுமி நாராயணன் அமர்வு உத்தரவிட்டுள்ளது.