மதுரை மாநகராட்சி சொத்து வரி ஊழல்: மண்டலத் தலைவர்களுக்கு ஸ்டாலின் உத்தரவு

மதுரை மாநகராட்சியில் நடைபெற்றதாக கூறப்படும் சொத்து வரி மோசடியில் அதிரடி நடவடிக்கை மேற்கொண்ட தமிழக முதல்வர் மு.க.ஸ்டாலின், அனைத்து மண்டலத் தலைவர்களும் உடனடியாக பதவி விலக வேண்டும் என உத்தரவிட்டுள்ளார். இந்த நடவடிக்கை, மாநகராட்சிக்கு கோடிக்கணக்கான வருவாய் இழப்பை ஏற்படுத்தியதாக கூறப்படும் குறைந்த மதிப்பீட்டு மோசடிக்குப் பின்னணியாகும்.

மத்திய குற்றப்பிரிவினர் (CCB) நடத்திய விசாரணையில் இதுவரை 8 பேர் கைது செய்யப்பட்டுள்ளனர். இதில் ஓய்வுபெற்ற உதவி ஆணையர், மண்டலத் தலைவர் ஒருவரின் தனிப்பட்ட உதவியாளர், சில தலையங்கியோர் உள்ளிட்டோர் உள்ளனர்.

தொடர்ந்து விசாரணையில் மண்டல 2 தலைவர் சரவணா புவனேஸ்வரி, மண்டல 5 தலைவர் சுவிதா உள்ளிட்ட திமுகவின் சில மண்டலத் தலைவர்கள் தொடர்புடையதாக கருதப்பட்ட நிலையில்... இதையடுத்து, முதல்வர் ஸ்டாலின் கடந்த வாரம் திமுகவின் “உடன்பிறப்பே வா” நிகழ்ச்சியின் போது கடுமையான எச்சரிக்கையை வெளியிட்டார்.“நடந்த தவறுக்கு யாரும் தப்ப முடியாது. தவறானவர்களை பதவியில் வைத்திருக்க முடியாது” என்று அவர் கூறினார். 

இதனையடுத்து, நான்கு மண்டலத் தலைவர்கள் மற்றும் இரண்டு குழுத் தலைவர்கள் உடனடியாக ராஜினாமா செய்துள்ளனர். இது தொடர்பாக அமைச்சர் கே.என்.நேரு, மூர்த்தி, பழனிவேல் தியாகராஜன் ஆகியோர், மாநகராட்சி ஆணையர் சித்ரா விஜயன் தலைமையில் உயர்மட்ட ஆலோசனை கூட்டத்தில் கலந்துகொண்டனர். மேயர் இந்திராணி பொன்வசந்த் மற்றும் பிற பொறுப்பாளர்களிடம் தனியாக விசாரணையும் நடத்தப்பட்டது.

மேயர் இந்திராணியின் கணவர் பொன் வசந்த், கடந்த மே 29ஆம் தேதி கட்சிக்கு எதிரான நடவடிக்கைகள் மற்றும் நிர்வாகத்தில் தலையீடு செய்ததாகக் கூறி, திமுகவிலிருந்து வெளியேற்றப்பட்டதும் குறிப்பிடத்தக்கது.

இந்நிலையில், முன்னாள் அமைச்சர் செல்லூர் ராஜூ தலைமையில் அதிமுகவினர் மதுரையில் ஆர்ப்பாட்டம் நடத்தினர். ஊழலை கட்டுப்படுத்துவதாகக் கூறும் திமுக அரசு இந்த மோசடியை ஏற்படுத்தியிருப்பதாகவும், இது நிர்வாகத்தின் தோல்விக்கான சான்றாகும் என்றும் அவர்கள் குற்றம்சாட்டினர். மாநிலத்தில் சென்னை மற்றும் கோயம்புத்தூருக்கு அடுத்தபடியாக வளர்ந்து வரும் நகரம் மதுரை என்பதால், இச்சம்பவம் பெரும் அரசியல் பரபரப்பை ஏற்படுத்தியுள்ளது.