நீதிமன்ற அவமதிப்பு வழக்கு; தலைமைச் செயலாளர் சிவ்தாஸ் மீனா நேரில் ஆஜராக உத்தரவு

மூன்று ஆண்டுகளாக நீதிமன்ற உத்தரவை நிறைவேற்றாதது தொடர்பாக, தமிழக தலைமைச் செயலாளர் சிவ்தாஸ் மீனா ஆகஸ்ட் 21 ஆம் தேதி நேரில் ஆஜராக உயர் நீதிமன்ற மதுரைக் கிளை உத்தரவிட்டுள்ளது.

தமிழக தலைமைச் செயலாளர் சிவ்தாஸ் மீனா, நகராட்சி நிர்வாகம் மற்றும் குடிநீர் வழங்கல் (MAWS) துறையின் முதன்மைச் செயலாளராக இருந்தபோது, ​​மூன்றாண்டு கால நீதிமன்ற உத்தரவை நிறைவேற்றாததற்காக, ஆகஸ்ட் 21-ஆம் தேதி உயர்நீதிமன்ற மதுரைக் கிளையில் நேரில் ஆஜராகுமாறு நீதிமன்ற அவமதிப்புக்கு உட்படுத்தப்பட்டுள்ளார்.

இதையும் படியுங்கள்: எஸ்.டி.பி.ஐ கட்சியின் மாநில தலைவர் முபாரக் வீட்டில் என்.ஐ.ஏ அதிகாரிகள் சோதனை

தேனி மாவட்டம் உத்தமபாளையம் டவுன் பஞ்சாயத்து அலுவலகத்தில் இளநிலை உதவியாளர் ராஜேஷ் அய்யனார் முருகனுக்கு 25% ஊதியம் வழங்க நகராட்சி நிர்வாகம் மற்றும் குடிநீர் வழங்கல் துறைக்கு நீதிமன்றம் உத்தரவிட்டது தொடர்பான வழக்கில் தற்போது சிவ்தாஸ் மீனா நேரில் ஆஜராக உத்தரவிடப்பட்டுள்ளது.

தேனி மாவட்டத்தைச் சேர்ந்த ராஜேஷ் அய்யனார் முருகன் என்பவர் மதுரை உயர் நீதிமன்றத்தில் தாக்கல் செய்த மனுவில், தேனி மாவட்டம் உத்தமபாளையம் பேரூராட்சி அலுவலகத்தில் இளநிலை உதவியாளராக பணியாற்றினேன். என் மீதான புகாரின் பேரில் என்னை சஸ்பெண்ட் செய்தனர். இதை எதிர்த்து 2016-ம் ஆண்டு மதுரை உயர் நீதிமன்றத்தில் வழக்கு தொடர்ந்தேன். இதை விசாரித்த உயர் நீதிமன்ற கிளை, என் மீதான நடவடிக்கையை ரத்து செய்ததோடு நான் பணியாற்றாத நாட்களுக்கு 25 சதவீத சம்பளத்தை வழங்குமாறு உத்தரவிட்டது. நீதிமன்றத்தின் உத்தரவுக்கு எதிராக அரசு தரப்பில் மேல்முறையீடு செய்யப்பட்டது. இந்த மேல்முறையீடு மனு ஏற்கப்படவில்லை. ஆனாலும் அதன் பின்பும் நீதிமன்றம் அளித்த அந்த உத்தரவை அதிகாரிகள் முழுமையாக செயல்படுத்தவில்லை. இதனால் நகராட்சி நிர்வாகம் மற்றும் குடிநீர் வழங்கல்துறை செயலாளர் மீது அவமதிப்பு நடவடிக்கை எடுக்க வேண்டும்" என்று கூறியிருந்தார்.

இந்த மனு உயர் நீதிமன்ற மதுரை கிளை நீதிபதி பட்டு தேவானந்த் முன்பு விசாரணைக்கு வந்தது. இந்த வழக்கில் உத்தரவு பிறப்பித்த நீதிபதி, ”மனுதாரர் மீது எடுக்கப்பட்ட நடவடிக்கையை ரத்து செய்து 2020 ஆம் ஆண்டு நீதிமன்றம் உத்தரவிட்டது போதும் அந்த உத்தரவை முழுமையாக செயல்படுத்தாததால் மனுதாரர் இந்த நீதிமன்ற அவமதிப்பு வழக்கை தாக்கல் செய்துள்ளார். 2020ல் தனி நீதிபதி ரத்து உத்தரவை பிறப்பித்தார், மேலும் நகராட்சி நிர்வாக துறையின் மேல்முறையீட்டில் செப்டம்பர் 2021ல் உத்தரவுக்கு தடை விதிக்கப்படவில்லை. நிலுவைத்தொகை வழங்கப்படாததால், அவமதிப்பு மனு தாக்கல் செய்யப்பட்டு ஷிவ்தாஸ் மீனாவுக்கு நோட்டீஸ் அனுப்பப்பட்டது. அவர் நோட்டீசுக்கு எதிர் பிரமாணப் பத்திரம் தாக்கல் செய்யவோ, நிலுவை தொகையை வழங்கவோ இல்லை.

இந்த வழக்கில் எதிர்மனுதாரராக ஒரு ஐ.ஏ.எஸ் அதிகாரி சேர்க்கப்பட்டுள்ளார். ஆனால், அவரது தரப்பில் தற்போது வரை பதில் அளிக்கப்படவில்லை. இது விசித்திரமாகவும் ஆச்சர்யமாகவும் இருக்கிறது. நீதிமன்ற உத்தரவுகளை அதிகாரிகள் எப்படி செயல்படுத்துகிறார்கள் என்பதற்கு இதுதான் உதாரணம். இதற்கு இடையில், கடந்த 17 ஆம் தேதி மனுதாரர் சம்பந்தப்பட்ட உத்தரவை நிறைவேற்றியதாக அறிக்கை தாக்கல் செய்யப்பட்டு இருக்கிறது.

நகராட்சி நிர்வாகத்துறை முதன்மை செயலாளர் பெயரில் இந்த மனு தாக்கல் செய்யப்பட்டுள்ளது. இந்த வழக்கில் எதிர் மனுதாரராக இல்லாத டாக்டர் கார்த்திகேயன் பெயரில் மனு தாக்கல் செய்யப்பட்டுள்ளது, இது குறித்து விசாரித்த போது, ​​இந்த வழக்கில் எதிர்மனுதாரராக சேர்க்கப்பட்ட சிவதாஸ் மீனா, தற்போது தமிழக அரசின் தலைமை செயலாளராக உள்ளார். அதனால் அவரது சார்பில் தற்போதைய நகராட்சி நிர்வாக செயலாளர் இந்த அறிக்கையை தாக்கல் செய்ததாக தெரிவிக்கப்பட்டுள்ளது.

நீதிமன்ற அவமதிப்பு வழக்கைப் பொறுத்தவரை யார் எதிர் மனு தாரராக உள்ளார்களோ அவர்கள் தான் பொறுப்பாக இருக்க முடியும். அவர்கள் தரப்பில் வேறு அதிகாரிகள் பதில் அளிக்க முடியாது. 3 ஆண்டுகளுக்கு பிறகு கடந்த சில நாட்களுக்கு முன்பு தான் நீதிமன்ற உத்தரவை செயல்படுத்தியுள்ளனர்.

எனவே, நகராட்சி நிர்வாகத்துறையின் முதன்மை செயலாளராக இருந்த சிவ்தாஸ் மீனா, நீதிமன்ற உத்தரவை அவமதித்து உள்ளார் என்பது தெளிவாகிறது. எனவே, இந்த வழக்கின் அடுத்தகட்ட விசாரணையின்போது அவர் நேரில் ஆஜராகும்படி நோட்டீஸ் அனுப்ப வேண்டும். வழக்கின் விசாரணை வரும் ஆகஸ்ட் மாதம் 21 ஆம் தேதிக்கு ஒத்திவைக்கப்படுகிறது" இவ்வாறு நீதிபதி உத்தரவு பிறப்பித்தார்.

தமிழ் இந்தியன் எக்ஸ்பிரஸின் அனைத்து செய்திகளையும் உடனுக்குடன் டெலிகிராம் ஆப்பில் பெற https://t.me/ietamil