ஜி.எஸ்.டி குறைப்பால் நெய், வெண்ணெய் விலை எவ்வளவு குறையும்? பால் முகவர்கள் சங்கம் விளக்கம்

மத்திய அரசு அண்மையில் பால் பொருட்கள் மீதான ஜி.எஸ்.டி. வரியை குறைத்துள்ளது. இதனால், இனி அனைத்து தனியார் பால் நிறுவனங்களும் தங்களது பால் பொருட்களின் விலையைக் குறைக்க வேண்டும் என்று தமிழ்நாடு பால் முகவர்கள் மற்றும் தொழிலாளர் நலச்சங்கத்தின் தலைவர் சு.ஆ. பொன்னுசாமி வலியுறுத்தியுள்ளார். 

அவர் பேசியதாவது; தமிழ்நாடு பால் முகவர்கள் தொழிலாளர் நலச்சங்கம் சார்பில், தமிழக மக்களுக்கு ஒரு இனிப்பான செய்தியை மகிழ்ச்சியுடன் தெரிவித்துக்கொள்கிறோம்.

மத்திய அரசாங்கம் அத்தியாவசிய உணவுப் பொருட்கள் மீதான ஜிஎஸ்டி வரியை குறைத்துள்ளது. பால் சார்ந்த பொருட்களான நெய், வெண்ணெய், பனீர், பட்டர் போன்ற பொருட்களுக்கு இருந்த 12 சதவீத ஜிஎஸ்டி வரி, தற்போது 5 சதவீதமாக குறைக்கப்பட்டுள்ளது. இதனால் ஒரு கிலோ நெய்யின் விலை சுமார் ₹50 வரையும், ஒரு கிலோ வெண்ணெயின் விலை சுமார் ₹40 வரையும் குறைய வாய்ப்புள்ளது. இது ஏழை, எளிய மற்றும் நடுத்தர மக்களுக்கு மிகுந்த மகிழ்ச்சியையும், பயன்களையும் அளிக்கும்.

மேலும், இந்த வரி குறைப்பால் பால் உற்பத்தி பொருட்களின் பயன்பாடு அதிகரிக்கும், இதன் மூலம் உற்பத்தியும் அதிகரிக்கும். இதனால், பால் சார்ந்த வேலைவாய்ப்புகளும் பெருகும் வாய்ப்புள்ளது. மத்திய அரசாங்கம் எடுத்த இந்த சிறப்பான முடிவுக்கு, தமிழ்நாடு பால் முகவர்கள் தொழிலாளர் நலச்சங்கம் மனமார்ந்த நன்றிகளைத் தெரிவித்துக் கொள்கிறது.

ஆவின் நிர்வாகத்திடம் எங்களின் கோரிக்கை

மத்திய அரசின் வரிக்குறைப்பு செப்டம்பர் 22-ம் தேதி முதல் அமலுக்கு வரும் நிலையில், ஆவின் நிறுவனமும் மற்றும் இதர தனியார் பால் நிறுவனங்களும் இந்த வரிக்குறைப்பின் பலனை உடனடியாக வாடிக்கையாளர்களுக்கு கொண்டு சேர்க்க வேண்டும்.

மத்திய அரசு தீபாவளி பரிசாக ஜிஎஸ்டி வரியைக் குறைத்ததைப் போல, தமிழக அரசும் ஆவின் நிர்வாகத்தின் மூலம் பால் பொருட்களின் விலையைக் குறைத்து, மக்களுக்கு தீபாவளி பரிசை அளித்து மகிழ்ச்சிப்படுத்த வேண்டும் என்று தமிழ்நாடு பால் முகவர்கள் தொழிலாளர் நலச்சங்கம் சார்பில் வலியுறுத்திக் கேட்டுக்கொள்கிறோம்.

மத்திய அரசின் இந்த விலை குறைப்பை பின்பற்றி, மாநில அரசும் பால் பொருட்களின் விலையை குறைத்தால், அதனை எங்களது சங்கம் வரவேற்றுப் பாராட்டும் என்பதையும் தெரிவித்துக் கொள்கிறோம்', என்று அவர் கூறியுள்ளார்.