2-வது நாள் விசாரணை: டாக்டர்- வக்கீலுடன் இ.டி அலுவலகம் வந்த பொன்முடி

அமலாக்கத்துறை விசாரணைக்கு 2 ஆவது நாளாக வந்த தமிழக உயர் கல்வித்துறை அமைச்சர் பொன்முடி, மருத்துவர் மற்றும் வழக்கறிஞருடன் ஆஜரானார்.

தமிழக உயர்கல்வித் துறை அமைச்சர் பொன்முடி வீட்டில் நேற்று (ஜூலை 17) அமலாக்கத் துறை சோதனை நடத்தியது. சென்னை மற்றும் விழுப்புரம் ஆகிய இடங்களில் அமைச்சர் பொன்முடி தொடர்புடைய 9 இடங்களில் திங்கள்கிழமை காலை முதல் அமலாக்கத்துறை அதிகாரிகள் சோதனையில் ஈடுபட்டனர். அமைச்சர் பொன்முடி மகன் கவுதம சிகாமணி எம்.பி வீட்டிலும் அமலாக்கத்துறை சோதனை நடத்தினர். பொன்முடி வீடு, அலுவலகம் மற்றும் அவருக்குச் சொந்தமான கல்லூரியிலும் சோதனை நடைபெற்றது.

இதையும் படியுங்கள்: பொன்முடியை போனில் தொடர்பு கொண்ட ஸ்டாலின்: இ.டி விசாரணையை துணிச்சலுடன் சந்திக்க அறிவுரை

அமலாக்கத்துறையின் சோதனை பி.எம்.எல்.ஏ சட்டத்தின் கீழ் நடப்பதாக கூறப்பட்டது. பொன்முடி மகன் கௌதம சிகாமணி வெளிநாட்டில் செய்த முதலீடு தான் இந்த சோதனைக்கு காரணம் என்று வட்டாரங்கள் தெரிவிக்கின்றன.

பின்னர், 13 மணி நேர சோதனைக்கு பின் அமைச்சர் பொன்முடியை அமலாக்கத்துறையினர் விசாரணைக்கு அழைத்து சென்றனர். பொன்முடியை அவரது வீட்டில் இருந்து அமலாக்கத் துறையினர் நுங்கம்பாக்கம் அலுவலகத்திற்கு விசாரணைக்கு அழைத்து சென்றனர்.

அமைச்சர் பொன்முடியிடம் இரவு 8 மணிக்கு தொடங்கிய விசாரணை விடியற்காலை 3 மணிக்கு முடிவடைந்தது. விசாரணைக்குப் பிறகு அமைச்சர் பொன்முடியை கூறியதை அமலாக்கத்துறை அதிகாரிகள் வாக்குமூலமாக பதிவுச் செய்துக் கொண்டனர். பின்னர் விசாரணை முடிந்ததையடுத்து பொன்முடி தனது வீட்டுக்குச் சென்றார்.

இதனைத்தொடர்ந்து இன்று (ஜூலை 18) மாலை 4 மணிக்கு ஆஜராகுமாறு பொன்முடிக்கு அமலாக்கத்துறை சம்மன் அனுப்பியிருந்தது. அதன்படி இன்று இரண்டாவது நாளாக பொன்முடி விசாரணைக்கு ஆஜரானார். அவரிடம் அமலாக்கத்துறை அதிகாரிகள் விசாரணை நடத்தினர். அப்போது அமைச்சர் பொன்முடியின் மருத்துவர் மற்றும் வழக்கறிஞர்கள் உடன் வந்துள்ளனர். பொன்முடியின் மகன் கவுதம சிகாமணி எம்.பி.யும் விசாரணைக்கு ஆஜரானார்.

தமிழ் இந்தியன் எக்ஸ்பிரஸின் அனைத்து செய்திகளையும் உடனுக்குடன் டெலிகிராம் ஆப்பில் பெற https://t.me/ietamil