தி.மு.க ஆட்சியில் திருச்சி வளர்ச்சி; விரைவில் தொல்லியல் துறை கோவில்களில் குடமுழுக்கு: சேகர் பாபு

மறைந்த திமுக தலைவா் கருணாநிதி நூற்றாண்டு நிறைவு விழாவை முன்னிட்டு திருச்சி தெற்கு மாவட்ட திமுக சாா்பில் மாணவா்களுக்கு வினாடி-வினா போட்டி பரிசளிப்பு விழா திருச்சி சிதம்பரம் மஹாலில் நடைபெற்றது.
இந்த விழாவில் தேதி சொல்லும் சேதி எனும் வரலாற்று தொகுப்பு நூலை வெளியிட்டு அமைச்சா் பி.கே.சேகா் பாபு பேசியதாவது;
திமுக இளைஞரணி தொடங்கப்பட்ட 45ஆவது ஆண்டு தினம், உலக சதுரங்க தினம், நிலவில் மனிதன் கால் பதித்த தினம் என மூன்று பெருமை மிக்க நாளில் கருணாநிதி நூற்றாண்டு விழா நடத்துவது சிறப்புக்குரியது.

சா்வதேச சதுரங்கப் போட்டியை சென்னையில் நடத்தி தமிழகத்துக்கு உலக அரங்கில் புகழ் தேடி தந்துள்ளாா் உதயநிதி ஸ்டாலின். திமுக ஆட்சியில்தான் திருச்சி வளா்ச்சி பெற்று வருகிறது. தற்போது, ரூ.ஆயிரம் கோடிக்கு மேல் திட்டங்கள் அளித்து புதிய பேருந்து நிலையம், சரக்கு வாகன முனையம், வணிக வளாகம், காய்கனிச் சந்தை, மெட்ரோ ரயில் என அடுத்தடுத்து வளா்ச்சிப் பாதையை நோக்கி திருச்சி செல்லும் வகையில் பணிகள் நடைபெற்று வருகின்றன என்றார்.

திருச்சி தெற்கு மாவட்ட திமுக செயலரும், அமைச்சருமான அன்பில் மகேஸ் பொய்யாமொழி பேசுகையில், இந்தியாவில் தரமான கல்வி வழங்கும் மாநிலங்களில் 5ஆம் இடத்தில் இருந்த தமிழகம் தற்போது 4ஆவது இடத்துக்கு வந்துள்ளது என்றாா்.
பின்னா், வினாடி-வினா போட்டிகளில் வென்ற மாணவ, மாணவிகளுக்கு பரிசுகளை வழங்கினா். விழாவில், திமுக தலைமை நிலைய அலுவலகச் செயலா் துறைமுகம் காஜா, மாநகரச் செயலா் மு. மதிவாணன் உள்ளிட்ட நிா்வாகிகள் பலா் கலந்து கொண்டனா்.

இதையடுத்து, திருச்சி திருவெறும்பூரில் திருநாவுக்கரசரால் பாடல்பெற்ற தலமாகவும், காவிரி தென்கரையில் உள்ள 7 ஆவது தலமாகவும் தொல்லியல் துறை கட்டுப்பாட்டிலுள்ள பழமை வாய்ந்த நறுங்குழல் நாயகி உடனுறை எறும்பீஸ்வரா் கோயிலில் இந்து சமய அறநிலையத் துறை அமைச்சர் சேகர்பாபு ஆய்வு மேற்கொண்டார்.
இந்தக் கோயிலில் கடந்த 1998 ஆம் ஆண்டுக்குப் பின் இதுவரை குடமுழுக்கு நடைபெறவில்லை. இந்நிலையில் கடந்த 2 ஆண்டுகளுக்கு முன் இக்கோயிலில் பாலாலயம் நடைபெற்றும் திருப்பணிகள் எதுவும் நடைபெறவில்லை.

இந்நிலையில் அமைச்சா்கள் பி.கே. சேகா்பாபு, அன்பில் மகேஸ் பொய்யாமொழி ஆகியோா் இக் கோயிலில் ஆய்வு செய்து, கோயிலின் அடிவாரத்தில் உள்ள தெப்பக்குளத்தை பாா்வையிட்டு, பின்பு மலைமேல் சென்று சிவபெருமானை வழிபட்டு, அங்கு நடைபெறக்கூடிய திருப்பணிகள் குறித்து ஆய்வு மேற்கொண்டனா். 
பின்னா், அமைச்சா் சேகா்பாபு கூறுகையில், எறும்பீஸ்வரா் கோயில் திருப்பணிகளை விரைவுபடுத்த பள்ளிக் கல்வித்துறை அமைச்சா் கேட்டுக் கொண்டதன்பேரில் இந்த ஆய்வு நடைபெற்றது. விரைவில் அமைச்சா், மாவட்ட ஆட்சியா், தொல்லியல் துறை அதிகாரிகள், இந்து சமய அறநிலைத்துறை அதிகாரிகள் ஆகியோரை அழைத்துக் கூட்டம் நடத்தி, திருப்பணிகள் குறித்து விவாதித்து, விரைவில் குடமுழுக்கு நடத்த நடவடிக்கை மேற்கொள்ளப்படும்.

மத்திய அரசின் தொல்லியல் துறை கட்டுப்பாட்டிலுள்ள 26 கோயில்களில் ஆகம விதிப்படி 12 ஆண்டுகளுக்கு ஒரு முறை குடமுழுக்கு நடத்த தமிழக அரசு, மத்திய தொல்லியல் துறைக்கு விண்ணப்பித்துள்ளது. இதையடுத்து அத்துறையும் படிப்படியாக திருப்பணி செய்து வருகிறது.

திமுக அரசு பொறுப்பேற்ற பிறகு தொல்லியல் துறைக்கு அழுத்தம் கொடுத்து, 6 கோயில்களுக்கு குடமுழுக்கு நடைபெற்றுள்ளது. ஏனைய கோயில்களில் குடமுழுக்கு நடத்த அரசு தொடா்ந்து அழுத்தம் கொடுக்கும் என்றாா்.
ஆய்வின்போது முன்னாள் எம்எல்ஏ கே.என்.சேகரன், இந்து சமய அறநிலையத் துறை இணை ஆணையா் பிரகாஷ், செயல் அலுவலா் வித்யா உள்ளிட்டோா் கலந்து கொண்டனா்.

செய்தியாளர் க.சண்முகவடிவேல்

“தமிழ் இந்தியன் எக்ஸ்பிரஸின் அனைத்து செய்திகளையும் உடனுக்குடன் டெலிகிராம் ஆப்பில் பெற  https://t.me/ietamil“