சென்னை வந்தார் பிரதமர் மோடி - விமானநிலையத்தில் உற்சாக வரவேற்பு

மாமல்லபுரத்தில் நடைபெற உள்ள சீன அதிபர் ஜின்பிங் உடன் சந்திப்பு நிகழ்ச்சிக்காக, சென்னை விமான நிலையம் வந்த மோடிக்கு உற்சாக வரவேற்பு அளிக்கப்பட்டது.

மோடி - சீன அதிபர் ஜி ஜின்பிங் இடையேயான சந்திப்பு, 11 மற்றும் 12ம் தேதிகளில் மாமல்லபுரத்தில் நடைபெற உள்ளது. இந்த சந்திப்பிற்கு முன்னதாக, அவர்கள் மாமல்லபுரம் கடற்கரை கோயில், அர்ஜூனன் ரதம், தபசு உள்ளிட்ட கற்சிற்பங்களை சுற்றிப் பார்க்க உள்ளனர். . மாலை 5 மணியளவில் இருநாட்டு தலைவர்களின் உயர்மட்ட அளவிலான பேச்சுவார்த்தை தொடங்குகிறது. இதில், எல்லைப் பிரச்னைகள், பயங்கரவாதம் உள்ளிட்டவை குறித்து விவாதிப்பார்கள் என்று எதிர்பார்க்கப்படுகிறது.

சென்னை வந்தார் மோடி : டில்லியில் புறப்பட்ட பிரதமர் மோடி, முற்பகல் 11 மணியளவில் சென்னை வந்தார். சென்னை விமானநிலையத்தில் கவர்னர் பன்வாரிலால் புரோஹித், முதல்வர் பழனிசாமி, துணை முதல்வர் பன்னீர்செல்வம், அமைச்சர்கள், தேமுதிக பொருளாளர் பிரேமலதா, தமிழ் மாநில காங்கிரஸ் கட்சி தலைவர் ஜி கே வாசன் உள்ளிட்ட அரசியல் கட்சி தலைவர்கள் வரவேற்றனர்.