வடகிழக்குப் பருவமழை: பள்ளிகளுக்கு கல்வித் துறையின் முக்கிய வழிகாட்டுதல்கள் வெளியீடு

வடகிழக்குப் பருவமழை தொடங்கவுள்ள நிலையில், மாணவர்கள் மற்றும் பள்ளிகளின் பாதுகாப்பை உறுதி செய்யும் வகையில், கல்வித் துறை சார்பில் முன்னெச்சரிக்கை வழிகாட்டு நெறிமுறைகள் வெளியிடப்பட்டுள்ளன. மழைக் காலத்தில் பள்ளிகளில் செய்ய வேண்டிய முக்கியப் பாதுகாப்பு நடவடிக்கைகள் மற்றும் கண்காணிப்புகள் குறித்து இந்த வழிகாட்டுதல்களில் வலியுறுத்தப்பட்டுள்ளது.

பள்ளிகளில் பின்பற்ற வேண்டிய முக்கிய அறிவுறுத்தல்கள்:

சேதமடைந்த வகுப்பறைகளைக் கண்காணித்தல்: மழையால் பாதிக்கப்பட்டு, பாதுகாப்பற்ற நிலையில் உள்ள வகுப்பறைகள் பூட்டி வைக்கப்பட வேண்டும். மாணவர்கள் எந்தக் காரணம் கொண்டும் அந்தக் கட்டிடங்களுக்குள் செல்லாதவாறு தொடர்ச்சியாகக் கண்காணிக்க வேண்டும்.

சுற்றுச் சுவர் பகுதியில் தடுப்புகள்: மழையின்போது, பள்ளியின் சுற்றுச் சுவர் அருகில் மாணவர்கள் யாரும் செல்லாதவாறு உடனடியாக பாதுகாப்புத் தடுப்புகளை அமைக்க வேண்டும்.

ஆபத்தான பகுதிகளை மூடுதல்: பள்ளி வளாகத்தில் உள்ள நீர்தேக்கப் பள்ளங்கள், கிணறுகள் மற்றும் கழிவுநீர் தொட்டிகள் ஆகியவை முழுமையாக மூடப்பட்டு, பாதுகாப்பாக இருப்பதை உறுதி செய்ய வேண்டும்.

கட்டட ஆய்வு: பள்ளியில் உள்ள அனைத்துக் கட்டடங்களின் மேற்கூரைகள் மற்றும் அமைப்புகள் உறுதியாக உள்ளனவா என்பதைப் பள்ளி நிர்வாகம் ஆய்வு செய்ய வேண்டும்.

மின்சாதனப் பொருட்களை அகற்றுதல்: பள்ளி வளாகத்திற்குள் இருக்கும் பழுதுபட்ட அல்லது பயன்படாத மின்சாதனப் பொருட்களை உடனடியாக அப்புறப்படுத்தவும், மின் இணைப்புகள் பாதுகாப்பாக இருப்பதை உறுதிப்படுத்தவும் உத்தரவு பிறப்பிக்கப்பட்டுள்ளது.

இந்த வழிகாட்டுதல்களைப் பின்பற்றி, மாணவர்கள் மழைக் காலத்திலும் பாதுகாப்பாகக் கல்வி கற்பதை பள்ளி நிர்வாகங்கள் உறுதி செய்ய வேண்டும் என்றும் அறிவுறுத்தப்பட்டுள்ளது.