ரூ.888 கோடி லஞ்சமா? நகராட்சிப் பணி நியமனத்தில் முறைகேடு புகார் - அமைச்சர் கே.என். நேரு விளக்கம்

சென்னை:

நகராட்சி நிர்வாகம் மற்றும் குடிநீர் வழங்கல் துறையில் நடந்த 2,538 பணியிடங்களுக்கான நியமனங்களில், ரூ.888 கோடி லஞ்சம் பெற்று முறைகேடு நடந்ததாக எழுந்த புகார் குறித்து, அத்துறை அமைச்சர் கே.என். நேரு இன்று (அக்டோபர் 29, 2025) விரிவான விளக்கத்தை அளித்துள்ளார். இந்த நியமனங்கள் குறித்த அமலாக்கத் துறையின் கடிதம், திராவிட மாடல் அரசுக்கு அவப்பெயர் ஏற்படுத்தும் அரசியல் உள்நோக்கத்தோடு செயல்படும் முயற்சி என்று அவர் குற்றம் சாட்டியுள்ளார்.

இது தொடர்பாக நகராட்சி நிர்வாகம் மற்றும் குடிநீர் வழங்கல் துறை அமைச்சர் கே.என். நேரு வெளியிட்டுள்ள செய்திக்குறிப்பின் முக்கிய அம்சங்கள் பின்வருமாறு:

1. அமலாக்கத் துறை கடிதம் உள்நோக்கம் கொண்டது

பல ஆண்டுகளுக்கு முந்தைய வங்கி வழக்கு ஒன்றினைத் தூசு தட்டி எடுத்து, அதனை ஊதிப் பெரிதாக்கும் முயற்சியில் தோற்றுப் போன மத்திய அரசின் அமலாக்கத் துறை, இப்போது அரசியல் உள்நோக்கத்தோடு மேலும் ஒரு முயற்சியை எடுத்துள்ளது. அதுவே நகராட்சி நிர்வாகம் மற்றும் குடிநீர் வழங்கல் துறையின் பணி நியமனம் குறித்த நேற்றைய கடிதம்.

இந்தக் கடிதம் திராவிட மாடல் அரசுக்கு அவப்பெயர் ஏற்படுத்த வேண்டும் என்ற நோக்கத்துடன் வெளியிடப்பட்டுள்ளது.

2. வெளிப்படையான நியமன செயல்முறை

பணியிடங்கள் நிரப்பக் காரணம்: 2011 முதல் 2021 வரையிலான பத்தாண்டு அ.தி.மு.க. ஆட்சிக் காலத்தில் போதுமான நியமனங்கள் செய்யப்படாததால், காலிப் பணியிடங்கள் அதிகமாகி நிர்வாகச் சிரமங்கள் ஏற்பட்டன. இதனால், 2,569 பணியிடங்களை நேரடி நியமனம் மூலம் நிரப்ப அறிவிக்கைகள் வெளியிடப்பட்டன.

வெளிப்படைத் தேர்வு: இந்தப் பணியிடங்களை வெளிப்படையான, ஒளிவுமறைவற்ற முறையில் நிரப்புவதற்காக, அண்ணா பல்கலைக்கழகம் மூலமாகத் தேர்வுகள் நடத்தப்பட்டன.

2,00,499 விண்ணப்பங்கள் தனியாக உருவாக்கப்பட்ட இணையதளம் மூலம் பெறப்பட்டன.

38 மாவட்டங்களில் உள்ள 591 மையங்களில் அண்ணா பல்கலைக்கழகம் மூலமாகத் தேர்வுகள் நடத்தப்பட்டன.

ஆட்சேபணை இல்லை: எழுத்துத் தேர்வு முடிவுகள் இணையதளத்தில் (20.9.2024 அன்று) வெளியிடப்பட்டன. லட்சக்கணக்கான விண்ணப்பதாரர்களிடமிருந்து ஒரு ஆட்சேபணை கூட பெறப்படவில்லை என்பது குறிப்பிடத்தக்கது.

3. அண்ணா பல்கலைக்கழகத்தின் பங்கு

பட்டப்படிப்பு மற்றும் பட்டயப் படிப்புப் பதவிகளுக்கு 13 தேர்வுக் குழுக்களினால் 7,272 தேர்வர்களுக்குச் சான்றிதழ் சரிபார்ப்பும் நேர்முகத் தேர்வுகளும் நடத்தப்பட்டன.

இறுதியாக 2,538 பேர் தேர்வு செய்யப்பட்டு, முதலமைச்சரால் பணியாணைகள் வழங்கப்பட்டன.

பல்கலைக்கழகத்தின் சுயாட்சி: இத்தேர்வுகளை நடத்திய அண்ணா பல்கலைக்கழகம், உலகில் தலைசிறந்த சுயாட்சிப் பல்கலைக்கழகங்களுள் ஒன்று. இது நகராட்சி நிர்வாகத் துறையின் எந்தவிதக் கட்டுப்பாட்டிற்கும் உட்பட்டது அல்ல.

பழைய நடைமுறை: முந்தைய அ.தி.மு.க. ஆட்சிக் காலத்திலும் (2012, 2013, 2014, 2015, 2017) பல்வேறு பதவிகளுக்கு இதே அண்ணா பல்கலைக்கழகம் மூலமாகத்தான் தேர்வுகள் நடத்தப்பட்டன.

4. அமைச்சர் மறுப்பு: "கூற்று நகைப்புக்குரியது"

"கடந்த 2024 ஆம் ஆண்டு நடைபெற்ற தேர்வுகளில் மட்டும் நகராட்சி நிர்வாகம் மற்றும் குடிநீர் வழங்கல் துறை அலுவலர்கள் தலையிட்டதால் தவறுகள் நிகழ்ந்துள்ளன என்ற கூற்று நகைப்புக்குரியது," என்று அமைச்சர் கே.என். நேரு திட்டவட்டமாகத் தெரிவித்தார்.

2 லட்சம் தேர்வர்கள் விண்ணப்பித்து, ஒளிவுமறைவற்ற முறையில் முடிவுகள் வெளியிடப்பட்டு, 2,538 பணியாளர்கள் பணியமர்த்தப்பட்ட நிலையில், இவ்வாறு களங்கம் கற்பிக்கும் முயற்சி எக்காலத்திலும் வெற்றி பெறாது.

5. சட்டப்பூர்வ நடவடிக்கை உறுதி

அரசியல் நோக்கத்தோடு மேற்கொள்ளப்படும் இதுபோன்ற நடவடிக்கைகளை வன்மையாகக் கண்டிப்பதாகவும், அவற்றைத் தோற்கடிக்கத் தேவையான அனைத்து சட்டபூர்வ நடவடிக்கைகளையும் நகராட்சி நிர்வாகம் மற்றும் குடிநீர் வழங்கல் துறை மேற்கொள்ளும் என்றும் அமைச்சர் கே.என். நேரு தமது செய்திக்குறிப்பில் தெரிவித்துள்ளார்.

க.சண்முகவடிவேல்