நீட் தேர்வு ரிசல்ட்: அகில இந்திய அளவில் தமிழக மாணவர் முதல் இடம்; டாப் 10-ல் 4 தமிழக மாணவர்கள்

நாடு முழுவதும் நீட் தேர்வு முடிவுகள் சற்று முன் வெளியிடப்பட்டன இதில் அதிக மதிப்பெண்கள் பெற்ற மாணவர்கள் பட்டியலில் தமிழகத்தைச் சேர்ந்த 4 மாணவர்கள் இடம் பெற்று சாதனை படைத்துள்ளனர்.

நாடு முழுவதும் இளநிலை மருத்துவப் படிப்புகளுக்கான நீட் நுழைவு தேர்வு கடந்த மே மாதம் 7ம் தேதி நடைபெற்றது. சரியாக 499 நகரங்களில் நடைபெற்ற இத்தேர்வில் 20 லட்சத்துக்கும் மேற்பட்ட மாணவர்கள் கலந்து கொண்டனர். தேர்வு முறைகேடுகளைத் தடுக்க, பல்வேறு கண்காணிப்பு நடவடிக்கைகளை தேசிய தேர்வு முகமை மேற்கொண்டது. பலகட்ட சோதனைக்குப் பிறகே, தேர்வறைக்குள் மாணவர்கள் அனுமதிக்கப்பட்டனர்.

இதில் தமிழகத்தை பொறுத்தவரை விண்ணப்பித்த ஒரு லட்சத்து 44 ஆயிரத்து 516 பேர் தேர்வு எழுதியுள்ளனர். இதனிடையே நீட் நுழைவுத் தேர்வு முடிவுகளை தேசிய தேர்வு முகமை இன்று வெளியிட்டது. இதில் 78 ஆயிரத்து 693 பேர் இந்த ஆண்டு தேர்ச்சி பெற்றுள்ளனர். மேலும் தமிழக ஆந்திர மாநிலங்களைச் சேர்ந்தவர்கள் முதலிடம் பெற்றுள்ளனர்.

அதன்படி தமிழகத்தைச் சேர்ந்த மாணவர் பிரபஞ்சன் மற்றும் ஆந்திர மாநிலத்தைச் சேர்ந்த போரா வருண் சக்கரவர்த்தி ஆகியோர் இந்திய அளவில் நீட் தேர்வில் முதலிடம் பெற்றுள்ளனர். தமிழகத்தைப் பொறுத்தவரை விழுப்புரம் சென்னை பகுதிகளில் வசித்த மாணவர்கள் இரண்டு பேர் முதலிடம் பிடித்துள்ளனர். மேலும் முதல் 10 பேரில் 4 மாணவர்கள் தமிழகத்தை சேர்ந்தவர்கள் என்பது குறிப்பிடத்தக்கது.

க.சண்முகவடிவேல்

தமிழ் இந்தியன் எக்ஸ்பிரஸின் அனைத்து செய்திகளையும் உடனுக்குடன் டெலிகிராம் ஆப்பில் பெற https://t.me/ietamil