நெய்வேலி அனல்மின் நிலையத்தில் பாய்லர் வெடித்து விபத்து; 8 தொழிலாளர்கள் படுகாயம்

நெய்வெலியில் உள்ள என்.எல்.சி இந்தியா நிறுவனத்தின் அனல் மின் நிலையத்தில் வியாழக்கிழமை திடீரென பாய்லர் வெடித்து விபத்துக்குள்ளானதில் 8 தொழிலாளர்கள் படு காயமடைந்தனர்.

கடலூர் மாவட்டம், நெய்வேலியில் உள்ள என்.எல்.சி இந்தியா நிறுவனத்தின் அனல் மின் நிலையத்தில் உள்ள (டிபிஎஸ்) IIவது அலகில் உள்ள பாய்லர் இன்று திடீரென வெடித்துள்ளது. அப்போது, அங்கே பணியில் இருந்த ஒரு நிரந்தரப் பணியாளர் மற்றும் 7 ஒப்பந்தப் பணியாளர்கள் உள்பட மொத்தம் 8 பேர் படுகாயம் அடைந்தனர். காயம் அடைந்த தொழிலாளர்கள் நெய்வேலியில் உள்ள என்.எல்.சி மருத்துவமனையில் சிகிச்சைக்காக அனுமதிக்கப்பட்டுள்ளனர். இந்த விபத்துக்கான காரணம் என்ன என்று இன்னும் தெரிவிக்கப்படவில்லை.

இந்த விபத்தில் காயமடைந்த தொழிலாளர்களின் குடும்பத்தினர் மற்றும் உறவினர்கள் தொழிலாளர்களுக்கு உரிய பாதுகாப்பு வழங்கக் கோரி ஆர்ப்பாட்டத்தில் ஈடுபட்டனர்.