என்.எல்.சி போராட்டம்; அன்புமணி உள்ளிட்ட 197 பா.ம.க.,வினர் மீது வழக்குப்பதிவு

நெய்வேலியில் என்.எல்.சி இந்தியா லிமிடெட் நுழைவுவாயிலை முற்றுகையிட்டு மறியல் போராட்டத்தில் ஈடுபட்டது தொடர்பாக பாட்டாளி மக்கள் கட்சி தலைவர் அன்புமணி ராமதாஸ் மற்றும் 197 பா.ம.க தொண்டர்கள் மீது நெய்வேலி டவுன்ஷிப் போலீஸார் வழக்குப் பதிவு செய்துள்ளனர்.

கடலூர் மாவட்டம் நெய்வேலியில் இயங்கி வரும் அனல் மின் உற்பத்தி நிலையமான என்.எல்.சி நிறுவனத்தின் சுரங்கப் பணிகளுக்காக அருகில் உள்ள கிராமங்களில் இருந்து நிலம் கையப்படுத்தப்பட்டது. ஆனால் கையப்படுத்தப்பட்ட நிலத்தில், நிலத்தின் உரிமையாளர்களாக இருந்தவர்கள் தொடர்ந்து விவசாயம் செய்து வருகின்றனர். தற்போது என்.எல்.சி நிர்வாகம் விவசாயம் செய்யப்பட்ட நிலங்களில் குழாய் பதிக்க கால்வாய் தோண்டியபோது, விவசாயிகள் எதிர்ப்பு தெரிவித்து வருகின்றனர்.

இதையும் படியுங்கள்: பா.ம.க கூறுவதை ஏற்க முடியாது; என்.எல்.சி தேவை: மார்க்சிஸ்ட் பாலகிருஷ்ணன்

இந்த நிலையில், பாட்டாளி மக்கள் கட்சி, அதன் தலைவர் அன்புமணி தலைமையில் வெள்ளிக்கிழமை என்.எல்.சி.,யை முற்றுகையிட்டு போராட்டம் நடத்தியது. என்.எல்.சி பிரதான நுழைவுவாயில் நடைபெற்ற முற்றுகை போராட்டத்தின் போது பா.ம.க தலைவர் அன்புமணி ராமதாஸை காவல்துறையினர் கைது செய்தனர். இதனால் அங்கு பா.ம.க.,வினருக்கும் காவல்துறையினருக்கும் இடையே தள்ளுமுள்ளு ஏற்பட்டது. மேலும், அன்புமணி கைதுக்கு எதிர்ப்பு தெரிவித்த பா.ம.க.,வினர் போலீசாரின் வாகனங்களை அடித்து நொறுக்கி வன்முறையில் ஈடுபட்டனர்.

இந்தநிலையில், பாட்டாளி மக்கள் கட்சி தலைவர் அன்புமணி ராமதாஸ் மற்றும் 197 பா.ம.க தொண்டர்கள் மீது நெய்வேலி டவுன்ஷிப் போலீஸார் வழக்குப் பதிவு செய்துள்ளனர். போராட்டத்திற்கு அனுமதி வழங்கப்படவில்லை என போலீசார் தெரிவித்தனர்.

அன்புமணி மற்றும் 197 பேர் மீது IPC பிரிவுகள் 143 (சட்டவிரோதமாக கூடியிருந்தமைக்கான தண்டனை) மற்றும் 341 (தவறான தடைக்கான தண்டனை) ஆகியவற்றை காவல்துறை செயல்படுத்தியுள்ளது.

போராட்டத்தின் போது வன்முறையில் ஈடுபட்டதாகவும், காவல்துறையினர் மீது கல்லெறிந்ததாகவும், காவல்துறை வாகனங்களை சேதப்படுத்தியதற்காகவும் இரண்டு சிறார் உட்பட 28 பா.ம.க.,வினர் மீது நெய்வேலி டவுன்ஷிப் போலீஸார் வழக்குப் பதிவு செய்துள்ளனர்.

புகாரின் அடிப்படையில், பிரிவுகள் 147 (கலவரம்), 148 (கலவரம், கொடிய ஆயுதம் ஏந்தியவர்), 294 (பி) (ஏதேனும் பொது இடத்திலோ அல்லது அருகாமையிலோ ஆபாசமான பாடல், பாடுவது அல்லது வார்த்தைகளைப் பாடுவது, ஓதுவது அல்லது உச்சரிப்பது), 323 (தன்னிச்சையாக காயப்படுத்துவதற்கான தண்டனை), 324 (அபாயகரமான ஆயுதங்கள் அல்லது வழிமுறைகளால் தானாக முன்வந்து காயப்படுத்துதல்), 332 (பொது ஊழியரை தனது கடமையில் இருந்து தடுக்க தானாக முன்வந்து காயம் ஏற்படுத்துதல்), 353 (அரச ஊழியரை பணிநீக்கம் செய்வதிலிருந்து தடுக்கும் தாக்குதல் அல்லது குற்றவியல் சக்தி கடமை) மற்றும் இந்திய தண்டனைச் சட்டத்தின் 506 (ii) (கிரிமினல் மிரட்டல்), 307 (கொலை முயற்சி) தமிழ்நாடு சொத்து (சேதம் மற்றும் இழப்புத் தடுப்பு) சட்டம், 1992 இன் பிரிவு 3 (i) ஆகியவற்றின் கீழ் போலீஸார் வழக்குப் பதிவு செய்துள்ளனர்.

26 பா.ம.க.வினர் கைது செய்யப்பட்டு சிறையில் அடைக்கப்பட்டுள்ளதாகவும், இரண்டு சிறார்களும் கடலூரில் உள்ள அரசு கண்காணிப்பு இல்லத்திற்கு அனுப்பப்பட்டதாகவும் போலீசார் தெரிவித்தனர்.

தமிழ் இந்தியன் எக்ஸ்பிரஸின் அனைத்து செய்திகளையும் உடனுக்குடன் டெலிகிராம் ஆப்பில் பெற https://t.me/ietamil