கோவையில் காலியாகும் நா.த.க கூடாரம்: 200 பேர் தி.மு.கவில் இணைந்தனர்

நாம் தமிழர் கட்சியிலிருந்து விலகிய அக்கட்சியின் கோவை வடக்கு மாவட்ட செயலாளர் ராமச்சந்திரன் தலைமையில் 200க்கும் மேற்பட்டோர் அமைச்சர் செந்தில் பாலாஜி முன்னிலையில் திமுகவில் தங்களை இணைத்துக் கொண்டனர்.

நாம் தமிழர் கட்சியின் கோவை வடக்கு மாவட்ட செயலாளராக இருந்த ராமச்சந்திரன் மற்றும் வடக்கு மாவட்ட நிர்வாகிகள் நாம் தமிழர் கட்சியை சேர்ந்த வடக்கு மாவட்ட வணிகர் பாசறை மாவட்ட செயலாளர் செந்தில்குமார், தொழிற்சங்க பேரவை மாவட்ட செயலாளர் ஏழுமலை பாபு, மாவட்ட பொருளாளர் கமல கண்ணன், மாவட்ட மகளிர் பாசறை செயலாளர் அபிராமி கதிர்வேல், மாவட்ட செய்தி தொடர்பாளர் சக்திவேல், தொகுதி தலைவர் குமரேசன், பேச்சாளர் மற்றும் தேர்தல் வியூகம் வகுப்பாளர் சாதிக் பாட்ஷா, ஆட்டோ தொழிற்சங்க தலைவர் சம்பத்குமார், மாவட்ட ஒன்றிய  பொறுப்பாளர் பிரதீப்குமார், இளைஞர் பாசறை பாலமுருகன மற்றும் கவிதா உள்ளிட்ட பலர் அக்காட்சியில் இருந்து விலகுவதாக அறிவித்திருந்தனர். 

இந்த நிலையில் அவர்கள் தங்களது ஆதரவாளர்கள் 200க்கும் மேற்பட்டோருடன்  கோவையில் தமிழ்நாடு மின்சாரம் மதுவிலக்கு மற்றும் ஆயத்தீர்வைத்துறை அமைச்சர் செந்தில் பாலாஜி முன்னிலையில்,  அவரை சந்தித்து தங்களை திமுகவில் இணைத்து கொண்டனர். 

அப்போது புதிதாக கட்சியில் இணைந்த அனைவரையும் அமைச்சர் செந்தில் பாலாஜி பொன்னாடை அணிவித்து வரவேற்றதுடன் அனைவருடனும் அமர்ந்து குழு புகைப்படம் எடுத்துக்கொண்டார்

அப்போது செய்தியாளர்களை சந்தித்த நாம் தமிழர் கட்சியில் இருந்து திமுகவில் இணைந்த ராமச்சந்திரன் கூறுகையில், கடந்த இரண்டு நாட்களுக்கு முன்பு நாம் தமிழர் கட்சியில் இருந்து விலகி எந்த கட்சியில் இணைவது என்று இருந்த நிலையில் சரியான தலைமை இருக்கக்கூடிய கட்சிக்கு செல்வதாக திட்டமிட்டு இருந்த வேளையில்  சீமான் நடிகர் ரஜினியை சந்தித்து சங்கி எங்களது தோழர் என்று கூறியிருந்தார். சங்கியாக இருப்பதைவிட தோழராக இருப்பதே சரி என எண்ணி திராவிட முன்னேற்ற கழகத்திற்கு வந்துள்ளோம் என்றார்.

திமுகவில் சரியான தலைமை இருப்பதாகவும் பொறுப்பு அமைச்சரும் சிறப்பாக செயல்படுவதால் அவர்களுடன் இணைந்து பயணிக்க திட்டமிட்டு தற்போது திராவிட முன்னேற்ற கழகத்தில் இணைந்திருப்பதாகவும்நாம் தமிழர் கட்சியின் வடக்கு மாவட்ட வணிகர் பாசறை, தொழிற்சங்க பாசறை உள்ளிட்ட அமைப்பினருடன் இணைந்து திமுகவில் இணைந்திருப்பதாகவும்  கடந்த இரண்டு நாட்களில் தான் இந்த முடிவை எடுத்ததாகவும் கூறிய அவர், சீமான் அளித்த பேட்டிக்கு பிறகு தான் இந்த முடிவை எடுத்ததாகவும் குறிப்பிட்டார்.

தமிழகத்தில் நேர்மறையான அரசியல் தேவைப்படுகிறது, அது துணை முதல்வருடன் உள்ளது எனவும் சிரித்த முகத்துடன் இருக்கக்கூடிய தலைமை தான் துணை முதல்வர்.  அதன் காரணமாகவே இளைஞர்கள் அதிக அளவில் திமுக விற்கு  வந்து கொண்டிருக்கிறார்கள் என்றும் என்னை ஈர்த்தது கூட அதுதான் என்றும் சுட்டிக்காட்டினார். 

நாம் தமிழர் கட்சியில் நிறைய பேர் அதிருப்தியில் தான் இருக்கிறார்கள் எனவும் அவர்கள் எங்கு செல்வது என தெரியாமல் இருக்கிறார்கள். அவர்களும் விரைவில் திமுகவில் இணைவார்கள் என்று தெரிவித்தார்.