கிராம சபையில் கேள்வி கேட்ட  விவசாயிக்கு அடி உதை... ஊராட்சி செயலாளர் மீது வழக்குப்பதிவு

ஸ்ரீவில்லிப்புத்தூர் அருகே பிள்ளையார்குளம் கிராமத்தில் திங்கள்கிழமை நடைபெற்ற கிராமசபைக் கூட்டத்தின் போது விவசாயியை அடித்து உதைத்ததாக பஞ்சாயத்து செயலாளர் மீது வழக்குப்பதிவு செய்யப்பட்டுள்ளது.

ஸ்ரீவில்லிபுத்தூர் அ.தி.மு.க எம்.எல்.ஏ இ.எம். மான்ராஜ், வட்டார வளர்ச்சி அலுவலர் மீனாட்சி மற்றும் பிற அதிகாரிகள் முன்னிலையில், பிள்ளையார்குளம் கிராமத்தில் கிராம சபை கூட்டம் நடைபெற்றது. இந்த கூட்டத்தில் கலந்துகொண்டு, ஊழல் வழக்கில் நடவடிக்கை எடுக்காதது குறித்து கேள்வி கேட்ட விவசாயி அம்மையப்பனை ஊராட்சி செயலாளர் தங்கபாண்டியன் மற்றும் அவரது ஆதரவாளர்கள் தாக்கியதாக வட்டாரங்கள் தெரிவிக்கின்றன.

கிராம சபை கூட்டத்தில் கேள்வி கேட்ட விவசாயியை ஊராட்சி செயலாளர் தங்கபாண்டியன் அடித்து உதைத்து தாக்கிய சம்பவம் முழுவதும் கேமராவில் பதிவாகியுள்ளது.

ஊரக வளர்ச்சித்துறை வெளியிட்டுள்ள சுற்றறிக்கையில் குறிப்பிட்டுள்ளபடி பல கிராமங்களுக்கு இடையே சுழற்சி முறையில் கிராமசபை கூட்டம் நடைபெறாதது குறித்து வேப்பங்குளம் கிராமத்தை சேர்ந்த விவசாயி அம்மையப்பன் கேள்வி எழுப்பினார்.

அம்மையப்பன் கூறுகையில், ஒரே கிராமத்தில் பலமுறை கூட்டம் நடத்தப்பட்டதால், மற்ற கிராம மக்கள் தங்கள் கோரிக்கைகளைத் தெரிவிக்க முடியவில்லை.

மேலும், ஊழல் குற்றச்சாட்டுகள் தொடர்பாக பஞ்சாயத்து செயலாளர் தங்கபாண்டியன் மீது நடவடிக்கை எடுக்கப்படும் என உறுதியளிக்க வேண்டும் என்று கோரினார். இதனால் ஆத்திரமடைந்த தங்கபாண்டியன் எழுந்து அம்மையப்பனின் மார்பில் எட்டி உதைத்தார். அவரது ஆதரவாளர்கள் விவசாயி அம்மையப்பனை சரமாரியாக தாக்கினர். இதையடுத்து, பெரும் அமளி ஏற்பட்டு, கிராமசபை கூட்டம் ரத்து செய்யப்பட்டது.

இதைத் தொடர்ந்து, அம்மையப்பன் அளித்த புகாரின் அடிப்படையில் தங்கப்பாண்டியன் மீது இந்திய தண்டனைச் சட்டத்தின் (ஐபிசி) நான்கு பிரிவுகளின் கீழ் வழக்குப் பதிவு செய்யப்பட்டுள்ளது.

“தமிழ் இந்தியன் எக்ஸ்பிரஸின் அனைத்து செய்திகளையும் உடனுக்குடன் டெலிகிராம் ஆப்பில் பெற https://t.me/ietamil“