தீபாவளியை முன்னிட்டு தனியார் பேருந்து கட்டணம் தாறுமாறாக உயர்வு: சில வழித்தடங்களில் ஆறு மடங்கு அதிகரிப்பு!

தீபாவளி பண்டிகையை முன்னிட்டு சென்னையிலிருந்து சொந்த ஊர் திரும்புவோருக்கு, தனியார் பேருந்து கட்டணங்கள் பல மடங்கு அதிகரித்திருப்பது பெரும் சுமையாக மாறியுள்ளது. வழக்கமான கட்டணங்களை விட, சில வழித்தடங்களில் கிட்டத்தட்ட ஆறு மடங்கு வரை கட்டணம் உயர்த்தப்பட்டுள்ளது. போக்குவரத்து துறை அமைச்சர் சிவசங்கர் எச்சரித்தும், தனியார் பேருந்து உரிமையாளர்கள் கட்டண உயர்வில் இருந்து பின்வாங்கவில்லை என்பது குறிப்பிடத்தக்கது.

கடந்த ஞாயிற்றுக்கிழமை, சென்னை-கோயம்புத்தூர், சென்னை-மதுரை அல்லது சென்னை-திருச்சி வழித்தடங்களுக்கான ஏசி ஸ்லீப்பர் பேருந்து டிக்கெட்டுகள் ரூ.400 முதல் ரூ.1,000 வரை விற்பனையான நிலையில், பண்டிகை கால வார இறுதி நாளான வெள்ளிக்கிழமை முதல் அதே வழித்தடங்களுக்கான கட்டணங்கள் ரூ.1,800 முதல் ரூ.4,200 வரை அதிகரித்துள்ளது.

தற்போதைய கட்டண நிலவரப்படி, ஒரு கீழ்-அடுக்கு ஒற்றை ஸ்லீப்பர் டிக்கெட் ரூ.4,200 ஆகவும், மேல்-அடுக்கு ஒற்றை ஸ்லீப்பர் ரூ.4,100 ஆகவும், ஒரு இரட்டை ஸ்லீப்பர் டிக்கெட் சுமார் ரூ.4,000 ஆகவும் விற்பனையாகிறது. பெரும்பாலான பேருந்துகள் சராசரியாக ரூ.3,000 கட்டணம் வசூலிக்கின்றன.

இந்த கட்டண உயர்வு, அனைத்து ஆம்னி பேருந்து உரிமையாளர்கள் சங்கம் (AOBOA) நிர்ணயித்த அதிகபட்ச கட்டணத்தை விட அதிகமாகும். 

ஏ.ஓ.பி.ஓ.ஏ நிர்ணயித்த அதிகபட்ச கட்டணங்கள்:

சென்னை-மதுரை: ரூ.2,550

சென்னை-கோயம்புத்தூர்: ரூ.1,990

சென்னை-திருச்சி: ரூ.1,490

அமைச்சர் எச்சரித்தும் நடவடிக்கை இல்லை:

இந்த கட்டண உயர்வு, போக்குவரத்து துறை அமைச்சர் எஸ்.எஸ். சிவசங்கர், கட்டண உயர்வில் ஈடுபடும் ஆபரேட்டர்கள் மீது நடவடிக்கை எடுக்கப்படும் என எச்சரித்த பின்னரும் நடந்துள்ளது. இருப்பினும், போக்குவரத்து துறையின் தனியார் பேருந்து அமலாக்கப் பிரிவு இதுவரை கட்டண விதிமீறலில் ஈடுபட்டவர்கள் மீது எந்த நடவடிக்கையும் எடுக்கவில்லை. தற்போது, பெங்களூருவுக்கு சுமார் 600 பேருந்துகளும், தென் மாவட்டங்களுக்கு 800 பேருந்துகளும், மேற்கு மண்டலத்திற்கு 400 பேருந்துகளும் இயக்கப்படுகின்றன.

அரசு தரப்பில் தனியார் பேருந்து கட்டணங்களுக்கு உச்சவரம்பு எதுவும் விதிக்கப்படவில்லை என்று அனைத்து ஆம்னி பேருந்து உரிமையாளர்கள் சங்கத்தின் தலைவர் ஏ. அன்பழகன் தெரிவித்துள்ளார். அவர் கூறுகையில், "அரசு கட்டணத்தை நிர்ணயிக்கும் பொறுப்பை சங்கத்திடம் விட்டுவிட்டது. நாங்கள் ஒரு வருடத்திற்கு 330 நாட்கள் குறைந்த கட்டணத்தில், சில சமயங்களில் சென்னை-மதுரைக்கு ரூ.400 போன்ற குறைந்த கட்டணத்தில் செயல்படுகிறோம். 35 பண்டிகை நாட்களில் மட்டுமே லாபம் ஈட்டுகிறோம்," என்று விளக்கினார். மேலும், தங்கள் கட்டணங்கள் இணையதளத்தில் வெளிப்படையாக பட்டியலிடப்பட்டுள்ளதாகவும் அவர் கூறினார். அதிக கட்டணம் வசூலிக்கும் ஆபரேட்டர்கள் குறித்து பயணிகள் சங்கத்திடம் புகார் தெரிவிக்கலாம் என்றும் அவர் கூறியுள்ளார்.

இதனிடையே, போக்குவரத்து துறை அதிகாரிகள் கூறுகையில், கடந்த வாரம் ஆபரேட்டர்களுடன் கூட்டம் நடத்தப்பட்டு, கட்டணத்தை உயர்த்த வேண்டாம் என அறிவுறுத்தப்பட்டதாக தெரிவித்தனர். "புகார்கள் வந்தால், அது குறித்து ஆபரேட்டர்களுடன் பேசுவோம்" என்று ஒரு அதிகாரி தெரிவித்தார். தீபாவளி பயணத்திற்காக அதிக கட்டணம் செலுத்த வேண்டிய நிலை உள்ளதால், பொதுமக்கள் அதிருப்தியில் உள்ளனர். போக்குவரத்து துறை அதிகாரிகள் கட்டண உயர்வை கட்டுப்படுத்த விரைவில் நடவடிக்கை எடுக்க வேண்டும் என்ற கோரிக்கை வலுத்துள்ளது.