கீழடி ஆய்வில் கிடைத்த மண்டை ஓடுகள்: 2,500 ஆண்டுகளுக்கு முன் வாழ்ந்த தமிழர்களின் முகங்கள் வடிவமைப்பு

மதுரைக்கு தென்கிழக்கே 12 கி.மீ தொலைவில் உள்ள கீழடியில், சுமார் 2,500 ஆண்டுகளுக்கு முன், அதாவது கி.மு. 6 ஆம் நூற்றாண்டில் ஒரு தொன்மையான நாகரிகம் வளர்ந்ததற்கான தொல்லியல் அகழாய்வு மற்றும் கார்பன் டேட்டிங் ஆதாரங்கள் வெளிவந்துள்ளன. இந்த அகழாய்வுகளின் தொடர்ச்சியாக, தற்போது 2,500 ஆண்டுகளுக்கு முன்பு வாழ்ந்த இரண்டு ஆண்களின் முகங்கள், 3D தொழில்நுட்பத்தின் உதவியுடன் வடிவமைக்கப்பட்டு வெளியிடப்பட்டுள்ளன.

மதுரை காமராஜ் பல்கலைக்கழக ஆராய்ச்சியாளர்கள், இங்கிலாந்தில் உள்ள லிவர்பூல் ஜான் மூர்ஸ் பல்கலைக்கழகத்தின் Face Lab உதவியுடன், இரண்டு மண்டை ஓடுகளின் அடிப்படையில் இந்த முகங்களை வடிவமைத்துள்ளனர். இந்த முக அமைப்புகள் தென்னிந்திய அம்சங்களைக் கொண்டுள்ளன. மேலும், மேற்கு ஐரேஷிய (ஈரானிய) வேட்டைக்காரர்கள் மற்றும் ஆஸ்ட்ரோ-ஆசிய மக்களின் மரபணு தடயங்களும் இவற்றில் காணப்படுவதாக ஆராய்ச்சியாளர்கள் தெரிவிக்கின்றனர். இருப்பினும், மரபணு அடிப்படையில் மூதாதையர்களை துல்லியமாகக் கண்டறிய மேலும் டி.என்.ஏ ஆய்வுகள் தேவை எனவும் அவர்கள் வலியுறுத்துகின்றனர்.

இந்த மண்டை ஓடுகள், கீழடி அகழாய்வு மையத்தில் இருந்து சுமார் 800 மீட்டர் தொலைவில் உள்ள கொந்தகை என்ற ஈமச்சடங்கு தளத்தில் கண்டெடுக்கப்பட்டன.

லிவர்பூல் ஜான் மூர்ஸ் பல்கலைக்கழகத்தின் Face Lab இயக்குநரான பேராசிரியர் கரோலின் வில்கின்சன் இது குறித்து பேசுகையில், "அனாடமி மற்றும் மானுடவியல் தரங்களின்படி முகத் தசைகளை மீண்டும் கட்டமைக்கவும், முக அம்சங்களை மதிப்பிடவும் கணினி உதவியுடன் கூடிய 3D முக வடிவமைப்பு அமைப்பை நாங்கள் பயன்படுத்தினோம்" என்று தெரிவித்தார். முகத்தின் கீழ் பாதி தோராயமாக மதிப்பிடப்பட்டாலும், மேல் பாதியின் வடிவமைப்பு மிகவும் துல்லியமானது என்றார். "மண்டை ஓடுகளின் கீழ் தாடைகள் இல்லாததால், மண்டை ஓட்டு அளவீடுகளை பயன்படுத்தி தாடைகளின் வடிவங்களை மதிப்பிடுவதற்கு ஆர்த்தோடோன்டிக் தரநிலைகளை பயன்படுத்தினோம்" என்று பேராசிரியர் வில்கின்சன் கூறினார்.

உயிரோடு இருக்கும் மனிதர்களின் படங்களை ஆய்வு செய்வதன் மூலம் உருவாக்கப்பட்ட தடயவியல் வழிகாட்டுதல்களை ஆராய்ச்சியாளர்கள் முக வடிவமைப்புக்கு பயன்படுத்தினர். கொந்தகையிலிருந்து கிடைத்த மண்டை ஓடுகளின் சி.டி ஸ்கேன் படங்களைப் பெற்ற பிறகு, நவீன தென்னிந்தியர்களின் வெளியிடப்பட்ட தரவுகளின் அடிப்படையில் மண்டை ஓடுகளின் பல்வேறு பகுதிகளில் உள்ள திசு ஆழத்தை அவர்கள் மதிப்பிட்டனர்.

"80% அறிவியல், 20% கலை"

தசை, கொழுப்பு மற்றும் சருமத்தை மீண்டும் உருவாக்க டிஜிட்டல் சிற்பக்கலை பயன்படுத்தப்பட்டது. அதே நேரத்தில் முக அம்சங்கள் (கண்கள், மூக்கு மற்றும் வாய்) ஆகியவை அளவு மண்டை ஓடுகளின் பண்புகள் மற்றும் அனாடமியின் அடிப்படையில் மதிப்பிடப்பட்டன. ஒரு புகைப்பட தரவுத்தளத்தை பயன்படுத்தி, ஆராய்ச்சியாளர்கள் சருமம், முடி மற்றும் கண்களுக்கு வண்ணங்களையும் அமைப்புகளையும் கொடுத்தனர்.

"இது 80% அறிவியல் மற்றும் 20% கலை" என்று மதுரை காமராஜ் பல்கலைக்கழகத்தின் மரபியல் துறை பேராசிரியர் ஜி. குமரேசன் கூறினார். இவர், மண்டை ஓடுகளின் படங்களை ஸ்கேன் செய்து லிவர்பூலுக்கு அனுப்பியவர். வடிவமைக்கப்பட்ட முகங்கள், டி.என்.ஏ தரவுகளுடன் இணைந்து, சங்க காலத்தில் வாழ்ந்த தமிழர்களின் மூதாதையர்களை கண்டறிய உதவும் என்றும் அவர் தெரிவித்தார்.

கீழடி அகழாய்வின் பழமை குறித்து மத்திய, மாநில அரசுகளுக்கு இடையே நீண்டகாலமாக ஒரு விவாதம் இருந்து வருகிறது. கடந்த மாதம், 2015-16 ஆம் ஆண்டில் கீழடியில் சங்க கால கட்டமைப்பை வெளிக்கொணர்ந்து, அந்த தளத்தை கி.மு 8 ஆம் நூற்றாண்டைச் சேர்ந்தது என்று குறிப்பிட்ட தொல்லியல் ஆய்வாளர் கே. அமர்நாத் ராமகிருஷ்ணனை, அவரது அறிக்கையை திருத்தும்படி இந்திய தொல்லியல் ஆய்வுத் துறை (ASI) கேட்டுக் கொண்டது. கீழடி, கி.மு 3 ஆம் நூற்றாண்டிற்கு மேல் பழமையானது அல்ல என்று பெயரிடப்படாத நிபுணர்கள் கூறியதாக ASI குறிப்பிட்டது.

நீதிமன்றங்கள் தலையிட்ட பிறகு, 2018 ஆம் ஆண்டில் ASI-யிடமிருந்து அகழாய்வுப் பொறுப்பை ஏற்றுக்கொண்ட தமிழ்நாடு அரசு தொல்லியல் துறை, கீழடியில் கி.மு 6 ஆம் நூற்றாண்டுக்கும் கி.பி 2 ஆம் நூற்றாண்டுக்கும் இடைப்பட்ட 29 கதிரியக்க கார்பன் டேட்டுகளை பெற்றுள்ளது.

மதுரை காமராஜ் பல்கலைக்கழக ஆராய்ச்சியாளர்கள், அமெரிக்காவின் ஹார்வர்ட் பல்கலைக்கழகத்தின் மரபியல் துறையுடன் இணைந்து கொந்தகை புதைகுழிகளில் இருந்து எடுக்கப்பட்ட டி.என்.ஏ-வை பகுப்பாய்வு செய்து வருகின்றனர். "கொந்தகை மற்றும் கீழடியின் பண்டைய குடியிருப்பாளர்களின் இடம்பெயர்வு வழிகள் மற்றும் கலவையை புரிந்து கொள்ள, ஏராளமான டி.என்.ஏ குறிப்பான்களை பெற்று உலகளாவிய மக்களுடன் ஒப்பிட பணி நடைபெற்று வருகிறது" என்று குமரேசன் கூறினார்.

கொந்தகையில் அகழாய்வு செய்யப்பட்ட ஈமத்தாழிகளின் உள்ளடக்கங்களை ஆய்வு செய்த பின்னர், பெரும்பாலான எலும்புக்கூடு எச்சங்கள் சுமார் 50 வயதுடையவர்களுடையது என்று ஆராய்ச்சியாளர்கள் மதிப்பிட்டனர். புனேவில் உள்ள டெக்கான் கல்லூரியின் வீணா முஷ்ரிஃப் திரிபாதி, கொந்தகை மற்றும் கொடுமணலில் உள்ள எலும்பு எச்சங்களை ஆய்வு செய்தார். "பல் தேய்வு முறைகள், மூட்டுவலி புண்கள் இருப்பு மற்றும் எலும்பின் பொதுவான அளவு போன்ற பல அளவுகோல்கள் வயதை பற்றி நமக்குச் சொல்ல முடியும்" என்று அவர் கூறினார்.

"கொந்தகையில் 11 எலும்புக்கூடு எச்சங்களுக்கு மட்டுமே உயரம் மதிப்பிடுவது சாத்தியமாகும். முழு கொந்தகை மக்கள்தொகையின் உயரத்தை அளவிட இது போதுமானதாக இல்லாவிட்டாலும், ஆண்களின் சராசரி உயரம் 170.82 செ.மீ (5 அடி 7 அங்குலம்) ஆகவும், பெண்களின் சராசரி உயரம் 157.74 செ.மீ (5 அடி 2 அங்குலம்) ஆகவும் இருந்தது. இது கொடுமணலில் ஐந்து எலும்புக்கூடு எச்சங்களில் உயரம் மதிப்பிடப்பட்டதோடு ஒப்பிடக்கூடியது" என்று அவர் கூறினார்.

இடுப்பு எலும்பு மற்றும் மண்டை ஓட்டு உருவ அமைப்பின் அடிப்படையில் எலும்புக்கூடு எச்சங்களின் பாலினத்தை ஆராய்ச்சியாளர்கள் அடையாளம் காண்கின்றனர். "முகங்களை வடிவமைப்பது உலகம் முழுவதும் பொதுவானது என்றாலும், தென்னிந்தியாவில், நாங்கள் கீழடியில் இதை முதல் முறையாக முயற்சி செய்துள்ளோம்" என்று தமிழ்நாடு தொல்லியல் துறைக்கு ஆலோசகரான தொல்லியல் ஆய்வாளர் கே. ராஜன் தெரிவித்தார்.