திருச்சி விமான நிலையத்தில் ரூ.79 லட்சம் மதிப்பிலான கடத்தல் தங்கம் பறிமுதல்

திருச்சி சர்வதேச விமான நிலையத்தில் இருந்து வெளிநாடுகளுக்கு விமானங்கள் இயக்கப்பட்டு வருகிறது. இந்த விமானங்களில் தங்கம் கடத்தி வரும் சம்பவங்கள் சமீப காலாமாக அதிகரித்துள்ளது. குறிப்பாக துபாய், மலேசியா, சிங்கப்பூர் உள்ளிட்ட நாடுகளில் இருந்து வரும் பயணிகள் அதிக அளவில் தங்கத்தை கடத்தி வருகின்றனர்.

இதனை தடுக்கும் வகையில் சுங்கத்துறை அதிகாரிகளும், மத்திய வருவாய், வான் நுண்ணறிவு பிரிவு அதிகாரிகளும் தொடர் நடவடிக்கை எடுத்து வருகின்றனர். இந்த நிலையில் நேற்று மலேசிய தலைநகர் கோலாலம்பூர், சிங்கப்பூர் மற்றும் துபாய் உள்ளிட்ட நாடுகளில் இருந்து திருச்சி விமான நிலையத்திற்கு வந்த 3 விமானங்களின் பயணிகளை மத்திய வருவாய், வான் நுண்ணறிவுப் பிரிவு அதிகாரிகள் சோதனை செய்தனர்.

அப்போது சந்தேகத்திற்கிடமான வகையில் இருந்த 8 பயணிகளை தனியாக அழைத்து சென்று அவர்களை சோதனை செய்தனர். அப்போது அவர்களிடமிருந்து ரூ.79.12 லட்சம் மதிப்பிலான 1, 338 கிராம் தங்கத்தை அதிகாரிகள் பறிமுதல் செய்தனர்.
இந்த நிலையில் இந்த தங்கத்தை கொண்டு வந்தவர்கள் வாசனை திரவிய பாட்டில் மற்றும் பெண்களுக்கான கைப்பை ஆகியவற்றில் மறைத்து தகடு வடிவிலும், குச்சி வடிவிலும் எடுத்து வந்தது தெரிய வந்தது.

இதனைத் தொடர்ந்து தங்கத்தை பறிமுதல் செய்த சுங்கத்துறை அதிகாரிகள் தொடர் விசாரணை மேற்கொண்டு வருகின்றனர். இந்த சம்பவம் விமான நிலைய வட்டாரத்தில் பரபரப்பை ஏற்படுத்தி உள்ளது. திருச்சி விமான நிலைய சுங்கத்துறையினர், கோவை விமான நிலையத்தில் தங்கம் கடத்தலை தடுக்கும் வகையில் திடீர் சோதனையில் ஈடுபட்டனர்.

ஷார்ஜாவில் இருந்து ஏர் அரேபியா விமானம் கோவை விமான நிலையம் வந்தது. இந்த விமானத்தில் வந்த பயணிகளை திருச்சி சுங்கத்துறை அதிகாரிகள் சோதனை செய்தனர். அப்போது சந்தேகத்திற்கு இடமான வகையில் வந்த பயணி ஒருவரை தனியே அழைத்து சென்று சோதனை நடத்தினர். இதில் அவர் தனது உள்ளாடையில் மறைத்து தங்கம் கடத்தி வந்தது தெரியவந்தது. இதையடுத்து அவரிடம் இருந்து ரூ. 9 லட்சத்து 76 ஆயிரம் மதிப்பிலான 162. 76 கிராம் தங்கத்தை அதிகாரிகள் பறிமுதல் செய்தனர். தொடர்ந்து அந்த பயணியிடம், அதிகாரிகள் விசாரணை மேற்கொண்டு வருகின்றனர்.

செய்தி: க.சண்முகவடிவேல்

“தமிழ் இந்தியன் எக்ஸ்பிரஸின் அனைத்து செய்திகளையும் உடனுக்குடன் டெலிகிராம் ஆப்பில் பெற https://t.me/ietamil“