உரிய அனுமதி பெறாமல் நிகழ்ச்சி: சென்னையில் ஆர்.எஸ்.எஸ். தொண்டர்கள் 47 பேர் கைது- தி.மு.க. அரசைச் சாடிய தமிழிசை

சென்னை: நூற்றாண்டு விழாவைக் கொண்டாடும் வேளையில், உரிய அனுமதி பெறாமல் நிகழ்ச்சி நடத்தியதாகக் கூறி சென்னையில் 47 ஆர்.எஸ்.எஸ். (RSS) தொண்டர்களை காவல்துறையினர் கைது செய்த சம்பவம் பரபரப்பை ஏற்படுத்தியுள்ளது. இந்த நடவடிக்கைக்கு தமிழக பாஜக தலைவர் தமிழிசை செளந்தரராஜன் கடும் கண்டனம் தெரிவித்துள்ளார்.

ஆர்.எஸ்.எஸ். அமைப்பு தனது 100வது நூற்றாண்டு விழாவை ஒட்டி, விஜயதசமி தினமான நேற்று சிறப்பு நிகழ்வுகளை ஏற்பாடு செய்திருந்தது. அதன் ஒரு பகுதியாக, சென்னை போரூருக்கு அருகிலுள்ள அய்யப்பன்தாங்கல் அரசு மேல்நிலைப் பள்ளியில், ஆர்.எஸ்.எஸ். தொண்டர்கள் குரு பூஜை மற்றும் சாகா பயிற்சி அமர்வை நடத்தியுள்ளனர்.

இந்த நிகழ்வுக்குச் சென்னை காவல்துறையிடம் முன் அனுமதி பெறவில்லை என்று கூறி, போரூர் காவல்துறையினர் நிகழ்வில் கலந்துகொண்ட 47 பேரை கைது செய்தனர். பல ஆண்டுகளாக இந்த இடத்தில் நிகழ்வு நடத்தியுள்ளதாகவும், இம்முறை அனுமதி மறுக்கப்பட்டதாகவும் ஆர்.எஸ்.எஸ். தரப்பு தெரிவித்துள்ளது.

தி.மு.க. அரசுக்கு எதிராகக் கொதித்தெழுந்த தமிழிசை

ஆர்.எஸ்.எஸ். தொண்டர்கள் கைது செய்யப்பட்டதை தமிழிசை செளந்தரராஜன் கடுமையாக விமர்சித்துள்ளார். முதலமைச்சர் மு.க.ஸ்டாலின் தலைமையிலான தமிழக அரசுக்கு எதிராகக் குரலெழுப்பிய அவர், "தினசரி நடக்கும் சமூக விரோதச் செயல்கள், சீரழிந்து வரும் சட்டம்-ஒழுங்கு நிலைமைகள் ஆகியவற்றைப் பற்றி கவலைப்படாத தி.மு.க. அரசு, தேசிய, பாரம்பரியம், ஆன்மீகம் மற்றும் தேசபக்தி சார்ந்த கலாச்சார நிகழ்வுகளை மட்டும் கட்டுப்படுத்துகிறது.

இந்தக் கைது நடவடிக்கை கண்டிக்கத்தக்கது மற்றும் ஜனநாயக விரோதமானது. இது தி.மு.க.வின் தேச விரோத மனப்பான்மையைக் காட்டுகிறது’ என்றார்.

கைது செய்யப்பட்ட ஆர்.எஸ்.எஸ். தொண்டர்களைக் காவல் நிலையத்தில் சந்தித்த தமிழிசை, அவர்களுக்குத் தமது ஆதரவைத் தெரிவித்தார். பெண்கள் பாதுகாப்பு அச்சுறுத்தல் மற்றும் போதைப்பொருள் புழக்கம் போன்ற தீவிர சட்டம்-ஒழுங்கு பிரச்சினைகள் மாநிலத்தில் இருக்கும்போது, வெறும் 47 பேர் நடத்திய கலாச்சாரக் கூட்டத்திற்கு மட்டும் ஏன் அனுமதி தேவை என்று அவர் காவல்துறையினரிடம் கேள்வி எழுப்பினார். உடனடியாகக் கைது செய்யப்பட்டவர்களை விடுவிக்க வேண்டும் என்றும் அவர் வலியுறுத்தினார்.