என்னோட ஆசீர்வாதம் எப்பவுமே இருக்கு... த.வெ.க. மாநாடு பற்றி விஜயின் தந்தை எஸ்.ஏ.சி ரியாக்‌ஷன்

தமிழ் சினிமாவில் உச்ச நட்சத்திரமாக வலம் வரும் நடிகர் விஜய் 'தமிழக வெற்றிக் கழகம்' என்ற புதிய கட்சியை கடந்த ஆண்டு பிப்ரவரி மாதத்தில் தொடங்கினார். வருகிற 2026 சட்டமன்ற தேர்தலில் விஜயின் த.வெ.க கட்சி போட்டியிட போவதாகவும் அறிவித்த நிலையில், தொடர்ந்து டெல்லியில் உள்ள இந்திய தேர்தல் ஆணையத்தில் கட்சியின் பொதுச் செயலாளரான புஸ்ஸி ஆனந்த் கட்சியை பதிவு செய்தார்.

இதன்பிறகு, கடந்தாண்டு ஆகஸ்ட் மாதத்தில்  பனையூரில் உள்ள கட்சி அலுவலகத்தில் தனது கட்சியின் கொடியை ஏற்றி வைத்தார். இந்த நிகழ்ச்சியில் ‘தமிழன் கொடி பறக்குது’ என்ற கட்சியின் பாடலையும் வெளியிட்டார். இதனைத் தொடர்ந்து, அதே மாதம் 27 ஆம் தேதி விழுப்புரம் மாவட்டம் விக்கிரவாண்டி வி சாலையில் விஜய் தமிழக வெற்றிக் கழகம் கட்சியின் முதல் மாநில மாநாட்டை நடத்தினார். 

இந்த மாநாட்டில் விஜய் பேசியது தமிழக அரசியலில் பரபரப்பாக பேசப்பட்டது. இந்நிலையில், விஜய் தலைமையிலான தமிழக வெற்றிக் கழகத்தின் 2-வது மாநில மாநாடு மதுரை பாரபத்தியில் நேற்று முன்தினம் வியாழக்கிழமை நடைபெற்றது. இந்த மாநாட்டில் தமிழகம் முழுவதும் இருந்து ஏராளமான தொண்டர்கள் பங்கேற்று இருந்தனர். மாநாட்டில் பேசிய விஜய் மத்தியில் ஆளும் பா.ஜ.க, மாநிலத்தில் ஆளும் தி.மு.க. எதிர்க்கட்சியான அ.தி.மு.க உள்ளிட்ட கட்சிகளையும் அதன் தலைவர்களையும் விமர்சித்தார். அவரது விமர்சனங்களுக்கு தற்போது அந்ததந்த கட்சிகளின் தலைவர்கள் பதிலடி கொடுத்து வருகிறார்கள். 

இதனிடையே, மதுரையில் நடைபெற்ற தமிழக வெற்றிக் கழகத்தின் 2-வது மாநில மாநாட்டில் விஜய் பெற்றோர்கள் கலந்து கொண்டனர். இந்நிலையில், மாநாட்டில் பங்கேற்ற த.வெ.க. தலைவர் விஜயின் தந்தை எஸ்.ஏ.சந்திரசேகர் நேற்று இரவு சென்னை திரும்பினார். அப்போது, எஸ்.ஏ.சந்திரசேகரிடம் மாநாடு குறித்து செய்தியாளர்கள் கேள்வி எழுப்பினர். 

அப்போது பதிலளித்துப் பேசிய எஸ்.ஏ.சந்திரசேகர், "ரொம்ப சந்தோஷமா இருந்தாரு. நல்லா இருந்தது மாநாடு. ரெஸ்பான்ஸ் நல்லா இருந்தது. நல்லா கூட்டம். என்னோட ஆசீர்வாதம் எப்பவுமே இருக்கும்." என்று தெரிவித்தார்.