வாக்காளர் பட்டியலில் பெயர் விடுபட்டிருந்தால் என்ன செய்ய வேண்டும்? தேர்தல் ஆணையர் விளக்கம்

நாடு முழுவதும் 2-ம் கட்ட வாக்காளர் பட்டியல் சிறப்பு தீவிர திருத்தம் தொடங்கப்பட இருப்பதாக தேர்தல் ஆணையம் தெரிவித்துள்ளது. தமிழ்நாடு உட்பட10 மாநிலங்கள், 2 யூனியன் பிரதேசங்கள் என 12 இடங்களில் 2-ம் கட்ட வாக்காளர் பட்டியல் திருத்தம் நடத்தப்பட உள்ளது. போலி பெயர்கள், இறந்தவர்களின் பெயர்களை நீக்குவதற்காக சிறப்பு தீவிர திருத்தம் நடத்தப்படுவதாக இன்று டெல்லியில் நடைபெற்ற செய்தியாளர் சந்திப்பில் தலைமைத் தேர்தல் ஆணையர் ஞானேஷ் குமார் தெரிவித்தார். இந்த 2-ம் கட்டத் திருத்தப் பணியில் சுமார் 51 கோடி வாக்காளர்களின் விவரங்கள் புதுப்பிக்கப்படும் எனத் தேர்தல் ஆணையம் தெரிவித்துள்ளது.

திருத்தப் பணி நடைபெறும் மாநிலங்கள் மற்றும் காலக்கெடு

வாக்காளர் பட்டியல் சிறப்புத் தீவிரத் திருத்தம் (SIR) நடைபெறவுள்ள 12 மாநிலங்கள் மற்றும் யூனியன் பிரதேசங்களின் முழுப் பட்டியலைத் தேர்தல் ஆணையம் வெளியிட்டுள்ளது. இந்தப் பட்டியலில் உள்ள மாநிலங்களில் வாக்காளர் பட்டியல் இன்றிரவு (அக்.27) முதல் முடக்கப்படும் என்றும் அறிவிக்கப்பட்டுள்ளது. சிறப்பு தீவிர திருத்தம் நடைபெறும் மாநிலங்கள்/யூனியன் பிரதேசங்கள்:

இந்த செய்தியை ஆங்கிலத்தில் படிக்க

தமிழ்நாடு, கேரளா, மேற்கு வங்கம், புதுச்சேரி (2026 தேர்தல் நடைபெறும் இடங்கள்)

அந்தமான் நிகோபார், சத்தீஸ்கர், கோவா, குஜராத், லட்சத்தீவு, மத்தியப் பிரதேசம், ராஜஸ்தான், உத்தரப் பிரதேசம்.

விதிவிலக்கு: அடுத்த ஆண்டு தேர்தல் நடைபெறவிருக்கும் அசாம் மாநிலத்தில் மட்டும், தேசிய குடிமக்கள் பதிவேடு (NRC) பணிகள் நடைபெறுவதால், இந்தப் பட்டியலில் இருந்து விலக்கப்பட்டுள்ளது.

சிறப்புத் தீவிரத் திருத்தப் பணி (SIR) அட்டவணை

சிறப்புத் தீவிரத் திருத்த 2-ம் கட்டப் பணிகளுக்கான விரிவான அட்டவணையைத் தேர்தல் ஆணையம் வெளியிட்டுள்ளது.

அதிகாரிகளுக்குப் பயிற்சி - அக்.28 முதல் நவ.3, 2025 வரை

வீடு வீடாகச் சென்று கணக்கெடுப்புப் பணி - நவ.4 முதல் டிச.4, 2025 வரை

வரைவு வாக்காளர் பட்டியல் வெளியீடு - டிச.9, 2025

கோரிக்கைகள் மற்றும் ஆட்சேபனைகளைப் பதிவு செய்தல் - டிச.9, 2025 முதல் ஜன.8, 2026 வரை

கோரிக்கைகள் மற்றும் ஆட்சேபனைகள் மீதான விசாரணை - டிச.9, 2025 முதல் ஜன.31, 2026 வரை

இறுதி வாக்காளர் பட்டியல் வெளியீடு - பிப்.7, 2026

வாக்காளர் பட்டியலில் ஏற்படும் மாற்றங்கள் என்ன?

வாக்காளர் பட்டியல் சிறப்புத் தீவிர திருத்தம் என்பது தேர்தல் ஆணையம் வாக்காளர் பட்டியலைச் செம்மைப்படுத்தும் விரிவான செயலாகும். கடைசியாக 21 ஆண்டுகளுக்கு முன்னர் (2002-2004) இந்தப் பணி நடைபெற்றது. வாக்காளர்கள் இடம்பெயர்தல், ஒன்றுக்கு மேற்பட்ட இடங்களில் பதிவு செய்தல், இறந்த வாக்காளர்களின் பெயர்களை நீக்காமல் இருப்பது, மற்றும் வெளிநாட்டினர் தவறாகச் சேர்க்கப்படுதல் போன்ற காரணங்களால் பட்டியலில் தவறுகள் நிகழ்கின்றன.

இந்தக் குறைகள் அனைத்தும் நீக்கப்பட்டு, புதிய வாக்காளர்கள் சேர்க்கப்படுவார்கள். இறந்தவர்கள், இடம்பெயர்ந்தவர்கள் மற்றும் இரட்டிப்பாகப் பதிவு செய்யப்பட்டவர்கள் போன்ற போலி வாக்காளர்கள் நீக்கப்படுவார்கள். சட்டத்தின்படி, ஒவ்வொரு தேர்தலுக்கு முன்னரும் அல்லது தேவைக்கேற்பவும் வாக்காளர் பட்டியல் திருத்தப்பட வேண்டும். இந்தக் குறைகள் நீக்கப்பட்டு, பட்டியல் புதிதாக உருவாக்கப்படும்.

சிறப்புத் தீவிரத் திருத்தப் பணியில் ஈடுபடும் அதிகாரிகள்

தேர்தல் ஆணையத்தின்படி, சராசரியாக ஒரு வாக்குச்சாவடியில் சுமார் 1,000 வாக்காளர்கள் உள்ளனர். சாவடி நிலை அலுவலர் (BLO) ஒவ்வொரு வாக்குச்சாவடிக்கும் ஓர் அலுவலர் நியமிக்கப்படுவார். வாக்காளர் பதிவு அலுவலர் (ERO) ஒவ்வொரு சட்டமன்றத் தொகுதிக்கும் ஓர் ERO (துணைப் பிரிவின் நடுவர் நிலை அதிகாரி) நியமிக்கப்படுவார். இவர் வரைவுப் பட்டியலைத் தயாரிப்பது, கோரிக்கைகள் மற்றும் ஆட்சேபனைகளைப் பெறுவது, இறுதிப் பட்டியலை வெளியிடுவது போன்ற பணிகளைச் செய்வார். ஒவ்வொரு தாலுகா அல்லது வட்டாரத்திற்கும் (Block) உதவி வாக்காளர் பதிவு அலுவலர்கள் நியமிக்கப்படுவார்கள்.

வாக்காளர் பட்டியல் சிறப்புத் தீவிர திருத்தப் பணிகளில் உள்ள 10 ஸ்டெப்ஸ்

முன்-கணக்கெடுப்பு: வாக்காளர் பதிவு அலுவலர், வாக்குசாவடி நிலை அலுவலர் அதிகாரிகளுக்குப் பயிற்சி அளிப்பது; சாவடி நிலை அலுவலர்கள் முந்தைய பட்டியலுடன் படிவங்களை ஒப்பிட்டுப் பார்ப்பது.

அரசியல் கட்சிகளின் பங்களிப்பு: அரசியல் கட்சிகளின் பூத் லெவல் ஏஜெண்டுகளுக்குப் பயிற்சி அளித்து, அவர்கள் சிறப்பு திருத்த தீவிர பணியைக் கண்காணிக்க அனுமதி அளிப்பது.

கணக்கெடுப்புப் பணி: வாக்குசாவடி நிலை அலுவலர்கள் கணக்கெடுப்புப் படிவங்களை அச்சிட்டு விநியோகித்தல், சரிபார்த்தல் மற்றும் அவற்றை இணைத்தல்.

வரைவுப் பட்டியல் வெளியீடு: கணக்கெடுப்புப் படிவங்களைப் பெற்ற அனைத்து வாக்காளர்களும் வரைவுப் பட்டியலில் சேர்க்கப்படுவர். விடுபட்டவர்கள் ஆன்லைன் மூலம் பட்டியலில் சேர்க்கப்படலாம்.

அறிவிப்பு வெளியீடு: பட்டியலில் சேர்க்க முடியாத வாக்காளர்களுக்கு அறிவிப்புகள் அனுப்பப்படும். அவர்களது ஆவணங்கள் மறுசரிபார்ப்பு செய்யப்படும்.

கோரிக்கைகள்/ஆட்சேபனைகள் பெறுதல்: எந்தவொரு வாக்காளரும் அல்லது அரசியல் கட்சிகளின் முகவரும் ஆட்சேபனைகள் அல்லது கோரிக்கைகளைத் தாக்கல் செய்யலாம்.

கோரிக்கைகள் மீதான விசாரணை: மாவட்ட ஆட்சியர் அல்லது தலைமைத் தேர்தல் அதிகாரி (CEO) கோரிக்கைகள் மற்றும் ஆட்சேபனைகளை விசாரித்து முடிவெடுப்பார்.

தன்னார்வலர்கள் நியமனம்: வாக்காளர்கள் இந்தப் பணியில் எந்தவிதமான தொந்தரவுகளுக்கும் ஆளாகாமல் இருப்பதை உறுதிசெய்ய, தேர்தல் ஆணையம் தன்னார்வலர்களை நியமிக்கும்.

வாக்குச்சாவடிகளின் பகுத்தறிவு (Rationalisation): எந்த வாக்குச்சாவடியிலும் 1,200 வாக்காளர்களுக்கு மேல் இருக்கக்கூடாது என்பதை உறுதி செய்தல்.

இறுதி வாக்காளர் பட்டியல் வெளியீடு: அனைத்துப் பணிகளும் முடிந்த பிறகு, பிப்ரவரி 7, 2026 அன்று இறுதிப் பட்டியல் வெளியிடப்படும்.

வாக்காளர் பட்டியல் சிறப்பு தீவிர திருத்தத்திற்கு தேவையான ஆவணங்கள்

மத்திய அல்லது மாநில அரசுப் பணியாளர்களுக்கு வழங்கப்பட்ட அடையாள அட்டை அல்லது ஓய்வூதியத் தொகை ஆவணம்.

இந்திய அரசால் வழங்கப்பட்ட அடையாள அட்டை அல்லது சான்றிதழ்.

ஆதார் அட்டை (குடியுரிமைக்குச் செல்லுபடியாகாது, ஆனால் அடையாளச் சான்றாகச் சமர்ப்பிக்கலாம்).

பிறப்புச் சான்றிதழ், பாஸ்போர்ட், கல்விச் சான்றிதழ்கள்.

திறமையான அதிகாரியால் வழங்கப்பட்ட நிரந்தர வசிப்பிடச் சான்றிதழ் (PRC).

சமூகச் சான்றிதழ்கள் (OBC/SC/ST).

தேசிய குடிமக்கள் பதிவேட்டின் சான்றிதழ் (பொருந்தும் இடங்களில்).

அரசாங்கத்தால் வழங்கப்பட்ட நிலம் அல்லது வீட்டிற்கான ஒதுக்கீட்டுச் சான்றிதழ்.

உள்ளூர் அதிகாரிகளால் தயாரிக்கப்பட்ட குடும்பப் பதிவேடு.