மானாமதுரை அருகே இளைஞர் தலையில் கல்லை போட்டு கொடூர கொலை: மது அருந்தும் போது தகராறா?

மானாமதுரை அருகே இளைஞர் தலையில் கல்லை போட்டு கொலை செய்த சம்பவம் பரபரப்பை ஏற்படுத்தியுள்ளது.

சிவகங்கை மாவட்டம் மானாமதுரை அருகே உள்ள திருப்பாச்சேத்தி ஆவரங்காடு கிராமத்தை சேர்ந்தவர் அழகுசுந்தரம் மகன் பழனிமுருகன் (30), இவர் அதே பகுதியில் ஆட்டோ ஓட்டி வருகிறார்.

இந்நிலையில் பழனிமுருகன், பிச்சைபிள்ளையேந்தல் கிராமம் அருகே மர்ம நபர்களால் தலையில் கல்லைபோட்டு கொலை செய்யப்பட்டு சடலமாக கிடந்துள்ளார். இதனை கண்ட அப்பகுதி மக்கள் திருப்பாச்சேத்தி காவல்துறையினருக்கு தகவல் தெரிவித்தனர்.

அதன்பேரில் உடனடியாக சம்பவ இடத்துக்கு வந்த காவல்துறையினர் பழனிமுருகன் உடலை மீட்டு பிரேத பரிசோதனைக்காக சிவகங்கை அரசு மருத்துவக்கல்லூரி மருத்துவமனைக்கு அனுப்பி வைத்தனர். தடயங்களை கைப்பற்றி விசாரணை மேற்கொண்டு வருகின்றனர்.

பழனிமுருகன் சிலருடன் அமர்ந்து மது அருந்தும் போது ஏற்பட்ட தகராறில் கொலை செய்யப்பட்டிருக்கலாம் என முதல்கட்ட தகவல் வெளியாகியுள்ளது. முழு விசாரனைக்கு பின்பே குற்றவாளி குறித்து தெரியவரும், என போலீசார் தெரிவித்துள்ளனர்.

இளைஞர் தலையில் கல்லைப்போட்டு கொலை செய்த சம்பவம் அப்பகுதியில் பெரும் பரபரப்பை ஏற்படுத்தியுள்ளது.

“தமிழ் இந்தியன் எக்ஸ்பிரஸின் அனைத்து செய்திகளையும் உடனுக்குடன் டெலிகிராம் ஆப்பில் பெற https://t.me/ietamil“