பராமரிப்பு பணி: மைசூரு - தூத்துக்குடி ரயில் சேவையில் மாற்றம் - தெற்கு ரயில்வே அறிவிப்பு

பராமரிப்பு பணிகள் காரணமாக மைசூரு - தூத்துக்குடி ரயில் சேவையில் மாற்றம் செய்யப்பட்டுள்ளதாக தெற்கு ரயில்வே அறிவித்துள்ளது. ரயில் சேவையில் செய்யப்பட்டுள்ள மாற்றங்கள் வருமாறு:

தெற்கு ரயில்வே வெளியிட்டுள்ள செய்திக்குறிப்பில் கூறப்பட்டுள்ளதாவது, “பெங்களூரு பையப்பனஹள்ளி யார்டில் பாதுகாப்பு மற்றும் சிக்னல் பராமரிப்பு பணிகள் காரணமாக சில ரயில்களின் சேவையில் மாற்றம் செய்யப்பட்டுள்ளது. அதன்படி, மைசூரு-தூத்துக்குடி தினசரி எக்ஸ்பிரஸ் ரயில் (16236) இன்று (புதன்கிழமை) கே.எஸ்.ஆர். பெங்களூரு, யஷ்வந்தபுரம், பானசவாடி, கார்மேலரம் வழியாக இயக்கப்பட உள்ளது.

காரைக்கால்-எஸ்.எம்.வி.டி. பெங்களூரு எக்ஸ்பிரஸ் ரயில் (16530) இன்று பெல்லந்தூர் சாலை, எஸ்.எம்.வி.டி. இடையே பகுதியாக ரத்து செய்யப்பட உள்ளது. பங்காருபேட்டை-கே.எஸ்.ஆர். பெங்களூரு 'மெமு' ரயில் (16521) இன்று கே.ஆர்.புரம், கே.எஸ்.ஆர். பெங்களூரு இடையே பகுதியாக ரத்து செய்யப்பட உள்ளது.

பெங்களூரு கண்டோன்மென்ட்-சிக்பள்ளாப்பூர் 'மெமு' ரயில் (வண்டி எண்: 06538), சிக்பள்ளாப்பூர்-பெங்களூரு 'மெமு' ரயில் (06532), பங்காருபேட்டை-எஸ்.எம்.வி.டி. பெங்களூரு 'மெமு' ரயில் (06527) ஆகியவை இன்று (புதன்கிழமை) ரத்து செய்யப்படுகிறது. எஸ்.எம்.வி.டி. பெங்களூரு-பங்காருபேட்டை 'மெமு' ரயில் (06528) நாளை (வியாழக்கிழமை) ரத்து செய்யப்படுகிறது” எனத் தென்னக ரயில்வே வெளியிட்ட செய்திக் குறிப்பில் குறிப்பிடப்பட்டுள்ளது.

செய்தி: க.சண்முகவடிவேல்