தமிழ்நாடு, கேரளா-வில் 15 ரயில்களுக்கு ஆக.18 முதல் புதிய நிறுத்தங்களுக்கு அனுமதி - தெற்கு ரயில்வே அறிவிப்பு

தமிழ்நாடு, கேரளா ரயில்வே வழித்தடங்களில் இயக்கப்படும் 15 ரயில்களுக்கு ஆகஸ்ட் 18 முதல் புதிய நிறுத்தங்களுக்கு தெற்கு ரயில்வே அனுமதி அளித்துள்ளது.

தெற்கு ரயில்வே சார்பில் திருவனந்தபுரம் கோட்ட தலைமை அலுவலகம் வெளியிட்டுள்ள செய்திக்குறிப்பில் கூறியிருப்பதாவது:

ஆகஸ்ட் 18 முதல் நாகர்கோவில் - கோயம்புத்தூர்-நாகர்கோவில் எக்ஸ்பிரஸ் ரயிலுக்கு சிங்கநல்லூர், இருகூர், ஆரல்வாய்மொழி, மேலப்பாளையம் ஆகிய ரயில் நிலையங்களில் 1 நிமிட நிறுத்தம் அனுமதிக்கப்பட்டுள்ளது என்று அறிவிக்கப்பட்டுள்ளது.

இதேபோல, மதுரை - புனலூர் - மதுரை எக்ஸ்பிரஸ் ரயில் நாங்குநேரி, ஆரல்வாய்மொழியிலும், சென்னை - குருவாயூர் எக்ஸ்பிரஸ் ரயில் ஹரிப்பாட்டிலும், குருவாயூர் - சென்னை எக்ஸ்பிரஸ் ஹரிப்பாடு, சிறையின் கீழ் நிலையத்திலும், தன்பாத் - ஆலப்புழா எக்ஸ்பிரஸ் குடியாத்தம், வாணியம்பாடியிலும், பாலக்காடு - திருச்சிராப்பள்ளி ரயில் சிங்கநல்லூரிலும் 1 நிமிட நிறுத்தம் அனுமதிக்கப்பட்டுள்ளது என்று அறிவிக்கப்பட்டுள்ளது.

இதே போல, நிலம்பூர்ரோடு - கோட்டயம் - நிலம்பூர் ரோடு எக்ஸ்பிரஸ் ரயில் மேலாற்றூர், பட்டிகாடு, குலுக்கல்லூர் நிலையங்களிலும் 1 நிமிடம் நின்று செல்லும் என்று அறிவிக்கப்பட்டுள்ளது.

திருவனந்தபுரம் சென்ட்ரல் - வேரவல் எக்ஸ்பிரஸ் குயிலாண்டி, பய்யனூர் நிலையத்திலும், காரைக்கால் - எர்ணாகுளம் - காரைக்கால் ரயிலுக்கு ஒற்றபாலத்திலும், நிலம்பூர் ரோடு - திருவனந்தபுரம் வடக்கு எக்ஸ்பிரஸ் ரயில் திருவல்லாவிலும், மங்களூரு - திருவனந்தபுரம் எக்ஸ்பிரஸ் திருவல்லாவிலும், கவுரா - கன்னியாகுமரி எக்ஸ்பிரஸ் ரயில் கொடைக்கானல் ரோட்டிலும் ஆகஸ்ட் 18-ம் தேதி முதல் புதிய நிறுத்தங்களுக்கு அனுமதிக்கப்பட்டுள்ளது என்று என்று அறிவிக்கப்பட்டுள்ளது.

இதேபோல, நாகர்கோவில் - காந்திதாம் பிஜி எக்ஸ்பிரஸ் ரயில் ஆகஸ்ட் 19-ம் தேதி (புறப்படும்) முதல் குயிலாண்டி, பய்யனூர், காஞ்சன் காடு நிலையத்திலும், கன்னியாகுமரி - கவுரா எக்ஸ்பிரஸ் ரயில் ஆகஸ்ட் 23-ம் தேதி முதல் கொடைக்கானல் ரோட்டிலும், புதுச்சேரி - கன்னியாகுமரி எக்ஸ்பிரஸ் ரயில் 24-ம் தேதி முதல் வள்ளியூர் நிலையத்திலும் நிறுத்தம் அனுமதிக்கப்பட்டு உள்ளது” என்று தெற்கு ரயில்வே அறிவித்துள்ளது.