புறநகர் ரயில்களில் ஒழுங்கீன செயல்களைத் தவிர்க்க தெற்கு ரயில்வே அறிவுறுத்தல்: மீறினால் தண்டனை!

புறநகர் ரயில்களில் ஒழுக்கமற்ற செயல்களைத் தவிர்க்கவும், நாகரிகம், தூய்மை மற்றும் பாதுகாப்பு ஆகியவற்றை உறுதிப்படுத்தவும் பயணிகளுக்கு தெற்கு ரயில்வேயின் சென்னை கோட்டம் வேண்டுகோள் விடுத்துள்ளது. விதிகளை மீறுவோருக்குத் தண்டனை விதிக்கப்படும் என்றும் எச்சரித்துள்ளது.

பயணிகளின் ஒழுங்கீனச் செயல்கள்:

தெற்கு ரயில்வே வெளியிட்ட அறிக்கையில், புறநகர் ரயில்களில் சில பயணிகளின் செயல்பாடுகள் சக பயணிகளுக்கு அசௌகரியத்தை ஏற்படுத்துவதாகச் சுட்டிக்காட்டப்பட்டுள்ளது. குறிப்பாக, பின்வரும் செயல்கள் கண்டிக்கத்தக்கவை:

இருக்கைகளில் கால்களை வைத்தல்

சில பயணிகள் காலி இருக்கைகள் மீது தங்கள் கால்களை வைப்பதால், அந்த இருக்கைகள் அசுத்தமாவதுடன், மற்றவர்கள் பயன்படுத்த முடியாமல் போகின்றன.

இடம் பிடித்தல்

ரயிலில் ஏறும் நண்பர்கள் அல்லது உறவினர்களுக்காக இருக்கைகளை முன்பே பிடித்து வைத்திருப்பதால், முதலில் வரும் பயணிகளுக்கு இருக்கை கிடைப்பதில்லை.

வாசல்களில் அமருதல்

பயணிகள் ரயில் பெட்டிகளின் நுழைவாயிலில் அமர்ந்து கொள்வதால், மற்றவர்கள் ரயிலில் ஏறுவதற்கும் இறங்குவதற்கும் இடையூறு ஏற்படுகிறது.

ஓடும் ரயிலில் ஏறுதல் 

ரயில் முழுமையாக நிற்பதற்கு முன்பே, இருக்கைகளைப் பிடிப்பதற்காக ஓடும் ரயிலில் ஏறுவதும், இறங்குவோருக்குத் தடையாக இருப்பதும் விபத்துகளை ஏற்படுத்துகின்றன.

ரயில்வேயின் முக்கிய அறிவுறுத்தல்கள்:

பயணிகள் இந்தச் செயல்களைத் தவிர்த்து, பாதுகாப்பான பயணத்தை உறுதி செய்ய, தெற்கு ரயில்வே சில முக்கிய விதிமுறைகளைப் பின்பற்றக் கோரியுள்ளது:

ரயில்களில் உள்ள இருக்கைகள் 'முதலில் வருபவருக்கே முன்னுரிமை' என்ற அடிப்படையில் மட்டுமே பயன்படுத்தப்பட வேண்டும். மற்றவர்களுக்காக இடம் பிடிப்பது தண்டனைக்குரிய குற்றமாகும்.

இருக்கைகள் மீது கால்களை வைப்பதும் சட்டப்படி தவறானது.

ரயில் பெட்டியின் வாசல்களில் அமருவது மிகவும் ஆபத்தானது. இது பயணிகளுக்கும், மற்றவர்களுக்கும் பெரிய பாதிப்பை ஏற்படுத்தலாம்.

அனைத்து ரயில் பயணிகளும் பொறுப்புடனும், கண்ணியத்துடனும் நடந்துகொண்டு, பாதுகாப்பான மற்றும் இனிமையான பயண அனுபவத்தைப் பெறுமாறு தெற்கு ரயில்வேயின் சென்னை கோட்டம் வலியுறுத்தியுள்ளது.