2 நாட்களில் விலகும் தென்மேற்குப் பருவமழை; இந்த வாரம் வடகிழக்குப் பருவமழை தொடங்க வாய்ப்பு - வானிலை ஆய்வு மையம்

இந்த ஆண்டு, தென்மேற்குப் பருவமழை இயல்பான நீண்ட கால சராசரியை (எல்.பி.ஏ) விட 108% அதிகமாக முடிவடைந்தது. வடகிழக்கு இந்தியாவின் சில பகுதிகளைத் தவிர மற்ற எல்லாப் பகுதிகளிலும் மழை இயல்பாகவோ அல்லது அதிகமாகவோ பெய்திருந்தது.

ஆங்கிலத்தில் படிக்க:

வடகிழக்குப் பருவமழை தொடக்கம்

வடகிழக்குப் பருவமழை இந்த வாரத்தின் நடுப்பகுதியில் தொடங்க வாய்ப்புள்ளது என்று இந்திய வானிலை ஆய்வு மையம் மேலும் கூறியுள்ளது.

“தென்னிந்தியத் தீபகற்பம், தெற்கு மற்றும் மத்திய வங்காள விரிகுடாப் பகுதிகளில் கிழக்கு மற்றும் வடகிழக்கு திசைக் காற்று வீசத் தொடங்குவதால், அடுத்த 2 நாட்களில் கிழக்குத் தீபகற்ப இந்தியாவில் வடகிழக்குப் பருவமழையின் செயல்பாடுகள் தொடங்க வாய்ப்புள்ளது” என்று இந்திய வானிலை ஆய்வு மையம் தெரிவித்துள்ளது.

தென்னிந்தியத் தீபகற்பம் கடந்த சில நாட்களாகப் பரவலான மழையைப் பெற்று வருகிறது. இது, வடகிழக்குப் பருவமழை முன்கூட்டியே தொடங்குவதற்குச் சாதகமான வளிமண்டல காரணிகளாக உள்ளன.

குளிர்காலப் பருவமழை என்றும் அழைக்கப்படும் வடகிழக்குப் பருவமழைக் காலத்தில் (அக்டோபர்-டிசம்பர்), தமிழ்நாடு, ராயலசீமா (ஆந்திரப் பிரதேசம்), ஏனாம் (புதுச்சேரி), புதுச்சேரி, கடலோர ஆந்திரப் பிரதேசம், தென் உள் கர்நாடகா, மற்றும் கேரளா ஆகிய பகுதிகள் மழை பெறுகின்றன.

கனமழை எச்சரிக்கை

வடகிழக்குப் பருவமழை தொடங்குவதைக் கருத்தில் கொண்டு, இந்திய வானிலை ஆய்வு மையம் அக்டோபர் 20 ஆம் தேதி வரை தமிழ்நாடு, கேரளா மற்றும் மாஹே பகுதிகளில் கனமழைக்கு எச்சரிக்கை விடுத்துள்ளது. தென் உள் கர்நாடகா, கடலோர ஆந்திரப் பிரதேசம், ஏனாம் மற்றும் ராயலசீமா ஆகிய பகுதிகளில் வியாழக்கிழமை வரை கனமழை பெய்ய வாய்ப்புள்ளது.