அக்டோபர் 14-ம் தேதி கூடுகிறது தமிழ்நாடு சட்டப்பேரவை - சபாநாயகர் அப்பாவு அறிவிப்பு

தமிழ்நாடு சட்டப்பேரவை விதி 26 (1)-ன் கீழ் சட்டப்பேரவைக் கூட்டம் அக்டோபர் 14-ம் தேதி செவ்வாய்க்கிழமை காலை 9.30 மணிக்கு தலைமைச் செயலகத்தில் உள்ள பேரவை மண்டபத்தில் கூடுகிறது என்று சபாநாயகர் அப்பாவு கூறினார். 

தமிழ்நாடு சட்டப்பேரவையின் 2025-ம் ஆண்டுக்கான முதல் கூட்டம் ஜனவரி 6-ம் தேதி ஆளுநர் உரையுடன் தொடங்கியது. ஆனால், இந்த கூட்டத்தில் பங்கேற்ற ஆளுநர் ஆர்.என். ரவி, தனது உரையை வாசிக்காமலேயே சட்டப்பேரவையை விட்டு வெளியேறினார். ஆளுநரின் நடவடிக்கை பரபரப்பை ஏற்படுத்தியது. இதைத்தொடர்ந்து, ஆளுநர் உரைக்கு நன்றி தெரிவிக்கும் தீர்மானத்தின் மீதான விவாதம் 4 நாட்கள் நடைபெற்றது.

இதைத்தொடர்ந்து, தமிழ்நாடு சட்டப்பேரவையில், மார்ச் 14-நம் தேதி 2025-2026-ம் ஆண்டுக்கான பொது பட்ஜெட்டை நிதியமைச்சர் தங்கம் தென்னரசு தாக்கல் செய்தார். இதையடுத்து, மார்ச் 15-ம் தேதி வேளாண் பட்ஜெட் தாக்கல் செய்யப்பட்டது. மார்ச் 17-ம் தேதி முதல் 21-ம் தேதி வரை இந்த 2 பட்ஜெட்டுகள் மீதான பொது விவாதம் நடைபெற்றது. மார்ச் 24-ம் தேதி முதல் ஏப்ரல் 29-ந்தேதி வரை துறை வாரியாக மானியக்கோரிக்கை விவாதம் நடைபெற்றது. இதைத் தொடர்ந்து, சட்டப்பேரவைக் கூட்டம் தேதி குறிப்பிடாமல் ஒத்திவைக்கப்பட்டது.

இந்த நிலையில், அக்டோபர் 14-ம் தேதி தமிழ்நாடு சட்டப்பேரவை கூடுகிறது என்று சபாநாயகர் மு.அப்பாவு செவ்வாய்க்கிழமை தெரிவித்தார். இது தொடர்பாக, சென்னை தலைமை செயலகத்தில் சபாநாயகர் மு.அப்பாவு செய்தியாளர்களிடம் கூறியதாவது:  “சட்டப்பேரவை விதி 26 (1)-ன் கீழ் பேரவைக் கூட்டம் அக்டோபர் 14-ம் தேதி செவ்வாய்க்கிழமை காலை 9.30 மணிக்கு தலைமைச் செயலகத்தில் உள்ள பேரவை மண்டபத்தில் கூடுகிறது. அன்றைய தினம் முன்னாள் எம்.எல்.ஏ.க்கள் 8 பேரின் மறைவுக்கு இரங்கல் தெரிவிக்கப்பட உள்ளது. வால்பாறை எம்.எல்.ஏ. அமுல் கந்தசாமி மறைவுக்கு இரங்கல் தீர்மானம் நிறைவேற்றப்பட உள்ளது. மேலும், 2025-2026-ம் ஆண்டுக்கான கூடுதல் செலவினத்திற்கான நிதிக்கு அனுமதி அளிக்கப்படும். எத்தனை நாட்கள் கூட்டம் நடைபெறும் என்பது குறித்து அன்றைய தினம் அலுவல் ஆய்வுக்குழு கூடி முடிவு செய்யப்படும்” என்று கூறினார்.