தென் தமிழகத்தில் நீடிக்கும் மிதமான மழை: ஆரஞ்சு அலர்ட் மஞ்சள் அலர்ட்டாக குறைப்பு

தமிழகத்தில் அடுத்து பருவமழை தொடங்க உள்ள நிலையில், தற்போதே பல மாவட்டங்களில் பரவலாக மழை பெய்து வருகிறது. குறிப்பாக, தென் தமிழகத்தின் பல்வேறு மாவட்டங்களில் நேற்று (திங்கள்கிழமை) பரவலாக மழை பெய்தது. திண்டுக்கல், கன்னியாகுமரி, தென்காசி, தேனி மற்றும் திருநெல்வேலி ஆகிய மாவட்டங்களில் பெய்த இந்த மழையின் காரணமாக கடும் வெயிலின் வெப்பம் தணிந்து அப்பகுதி குளிர்ச்சியடைந்தது.

இதனிடையே, இந்திய வானிலை ஆய்வு மையம் (IMD) நேற்று வெளியிட்ட அறிவிப்பில், திண்டுக்கல், கன்னியாகுமரி, தென்காசி, தேனி மற்றும் திருநெல்வேலி ஆகிய மாவட்டங்களுகு ஏற்கனவே அறிவிக்கப்பட்ட ஆரஞ்சு அலர்ட் இன்று (செவ்வாய்க்கிழமை) மற்றும் நாளை (புதன்கிழமை) மஞ்சள் அலர்ட்டாக குறைத்துள்ளது. இருப்பினும், மழைக்கான வாய்ப்பு இன்னும் இருப்பதால் பொதுமக்கள் கவனத்துடன் இருக்க வேண்டும் என்று அறிவுறுத்தப்பட்டுள்ளது.

இந்நிலையில், கடந்த 24 மணி நேரத்தில் பதிவான மழையின் அளவு குறித்து வானிலை ஆய்வு மையம் வெளியிட்டுள்ள தகவலின்படி, தேனி மாவட்டம் பெரியாறில் அதிகபட்சமாக 6 சென்டிமீட்டர் மழை பதிவாகியுள்ளது. அதனைத் தொடர்ந்து திருநெல்வேலி மாவட்டம் ஊத்து மற்றும் கன்னியாகுமரி மாவட்டம் பாலமோர் ஆகிய பகுதிகளில் 5 சென்டிமீட்டர் மழை பதிவாகியுள்ளது. 

அதேபோல், கன்னியாகுமரி, தேனி, தென்காசி மற்றும் திருநெல்வேலி மாவட்டங்களின் பல பகுதிகளில் 2 முதல் 4 சென்டிமீட்டர் வரையிலும், திண்டுக்கல் மாவட்டம் கொடைக்கானல் உள்ளிட்ட சில பகுதிகளில் 1 முதல் 2 சென்டிமீட்டர் வரையிலும் மழை பதிவாகியுள்ளது. தொடர் மழையின் காரணமாகவும், மேலும் கனமழை பெய்ய வாய்ப்புள்ளதாகவும் எச்சரிக்கை விடுக்கப்பட்டுள்ளது.

மழை எச்சரிக்கையின் காரணமாக, தென்காசி மாவட்ட நிர்வாகம் முன்னெச்சரிக்கை நடவடிக்கையாக குற்றாலம் பகுதியில் உள்ள அனைத்து முக்கிய அருவிகளிலும் பொதுமக்கள் குளிப்பதற்கு தற்காலிக தடை விதித்துள்ளது. கடலோர மாவட்டங்களான கன்னியாகுமரி, திருநெல்வேலி மற்றும் அதனை ஒட்டியுள்ள தூத்துக்குடி மாவட்டங்களில் பலத்த காற்று வீசுவதால் மீனவர்கள் கடலுக்கு மீன்பிடிக்கச் செல்ல வேண்டாம் என்று அறிவுறுத்தப்பட்டுள்ளனர். இதன் காரணமாக இப்பகுதிகளில் பெரும்பாலான விசைப்படகுகள் மற்றும் நாட்டுப்படகுகள் கடலுக்குச் செல்லவில்லை.

கன்னியாகுமரி மாவட்ட ஆட்சியர் ஆர். அலகுமீனா நேற்று அனைத்து துறை அதிகாரிகளுடன் தென்மேற்கு பருவமழைக்கான ஆயத்த நடவடிக்கைகள் குறித்து ஆலோசனை நடத்தினார். அப்போது அவர், மாவட்டத்தில் உள்ள அனைத்து குளங்கள் மற்றும் நீர்நிலைகளிலும் 80% மட்டுமே நீரை நிரப்ப வேண்டும் என்றும், 100% நிரம்பிய நீர்நிலைகளில் இருந்து உபரி நீரை உடனடியாக வெளியேற்ற வேண்டும் என்றும் நீர்வரத்து கால்வாய்களில் உள்ள அடைப்புகளை நீக்க தூர்வாரும் பணிகளை விரைந்து முடிக்கவும் அதிகாரிகளுக்கு உத்தரவிட்டார்.

கடந்த காலங்களில் அதிக பாதிப்புகளை சந்தித்த பகுதிகளை தொடர்ந்து கண்காணிக்கவும், தேவைப்பட்டால் நிவாரண முகாம்கள் அமைப்பதற்காக பள்ளிகள் போன்ற இடங்களை தயார் நிலையில் வைத்திருக்கவும் அதிகாரிகளுக்கு அறிவுறுத்தல்கள் வழங்கப்பட்டன. இதற்கிடையே, மதுரை மாநகரில் நேற்று லேசான தூறலும், சாரல் மழையும் பெய்தது.

இந்திய வானிலை ஆய்வு மையத்தின் தகவலின்படி, வியாழன் மற்றும் வெள்ளிக்கிழமை ஆகிய இரு தினங்களுக்கு தென்காசி, திருநெல்வேலி மலைப்பகுதிகள் மற்றும் கன்னியாகுமரி மாவட்டங்களுக்கு ஆரஞ்சு அலர்ட் எச்சரிக்கையும், தேனி மற்றும் திண்டுக்கல் மாவட்டங்களுக்கு மஞ்சள் அலர்ட் எச்சரிக்கையும் விடுக்கப்பட்டுள்ளது குறிப்பிடத்தக்கது.