மதுரை ஆதீனம் பதவி விலக வேண்டும்: தம்புரான் மனு

மதுரை ஆதீனத்தின் மீது குற்ற வழக்கு உள்ள நிலையில் அவர் பதவி விலக வேண்டும் என்றும், அதே நேரத்தில் தன்னை அடுத்த ஆதீனராக நியமிக்க வேண்டும் என்றும் மதுரை ஆதீன மட ஸ்ரீமத் விஷ்வலிங்க தம்புரான் மாவட்ட ஆட்சியரிடம் மனு அளித்துள்ளார்.

இதுகுறித்து அவர் அளித்த மனுவில் கூறியதாவது:- 

மதுரை ஆதீன மடத்தின் தம்புரானாக 2018 ஜூலை மாதம் முதல் பணியாற்றி வருகிறேன். தற்போது 293-வது ஆதீனத்தின் கீழ் தம்புரானாக பணிபுரிகிறேன். 292-வது குருமகாசந்நிதானம் விருப்பப்படி அடுத்த ஆதீனராக நான் வரவேண்டும். ஆனால், தற்போதைய ஆதீனம் அந்தக் கட்டளையை நிறைவேற்றாமல் வேறு ஒருவருக்கு பட்டம் சூட்டத் திட்டமிட்டுள்ளார்.

எனவே, தருமபுரம் ஆதீனத்துடன் ஆலோசித்து, 292-வது குருமகாசந்நிதானத்தின் விருப்பத்தை நிறைவேற்ற வேண்டும். மேலும், மதுரை ஆதீனத்தின் மீது குற்ற வழக்கு உள்ளதால் அவர் பதவி விலக வேண்டியது அவசியம். மதுரை ஆதீனம் நியமனத்தில் இந்து சமய அறநிலையத் துறை தலையிட்டு, 292-வது குருமகாசந்நிதானம் விருப்பப்படி என்னை அடுத்த வாரிசாக நியமிக்க வேண்டும்.

இவ்வாறு அதில் தெரிவிக்கப்பட்டுள்ளது. 

ஏற்கனவே, இந்தக் கோரிக்கையை வலியுறுத்தி கடந்த 31-ம் தேதி மதுரை 292-வது ஆதீனத்தின் சமாதி முன்பாக தர்ணா போராட்டத்தில் ஈடுபட்டதும் குறிப்பிடத்தக்கது.