முதல்வர் மு.க.ஸ்டாலின் தலைமையிலான அரசு தனது முதல் பட்ஜெட்டை நேற்று வெள்ளிக்கிழமை தாக்கல் செய்தது. 2021-22 ஆம் ஆண்டிற்கான திருத்தப்பட்ட வரவு-செலவுத் திட்டத்தில், மாநிலத்தின் தலைநகரான சென்னைக்கு அரசாங்கம் பல அறிவிப்புகளை வெளியிட்டுள்ளது.
தமிழக அரசின் பட்ஜெட் நேற்று வெள்ளிக்கிழமை அன்று தாக்கல் செய்யப்பட்டது. கலைவாணர் அரங்கத்தில் நடைபெற்ற சட்ட மன்ற கூட்டத்தில் நிதி அமைச்சர் பி.டி.ஆர்.பழனிவேல் தியாகராஜன் பட்ஜெட்டை தாக்கல் செய்தார். இதில் தமிழக அரசாங்கத்தின் முக்கிய திட்டமான ‘சிங்கார சென்னை 2.0’ ‘சுத்தமான மற்றும் பசுமையான’ சென்னைக்காக தொடங்கப்படும் என்று நிதியமைச்சர் அறிவித்தார். இந்த திட்டத்தை செயல்படுத்த அரசு 500 கோடி ரூபாய் ஒதுக்கியுள்ளது.
நிதி அமைச்சர் பழனிவேல் தியாகராஜன் தனது பட்ஜெட் உரையில், சென்னை மாநகரத்தின் சுவர்கள், சுவரொட்டிகள் இல்லாமல் இருக்கும் என்று கூறினார். பொது இடங்களில் சுவர்களை சிதைக்கும் சுவரொட்டிகளை அகற்ற சென்னை மாநகராட்சி எடுத்து வரும் முன்முயற்சியின் பின்னணியில் இந்த அறிவிப்புகள் வருகின்றன.
சென்னையில் கணேசபுரம் சுரங்கப்பாதை, கொன்னூர் உயர் சாலை-ஸ்ட்ரஹான்ஸ் சாலை மற்றும் தெற்கு உஸ்மான் சாலை என மூன்று இடங்களில் ரூ .335 கோடி மதிப்பீட்டில் புதிய மேம்பாலங்கள் மற்றும் பாலங்கள் கட்டப்படும் என்று நிதி அமைச்சர் அறிவித்தார்.
கோடம்பாக்கத்திலிருந்து பூந்தமல்லி வரை சென்னை மெட்ரோ சேவைகள் ஜூன் 2025 க்குள் தொடங்கும் என்றும் நிதி அமைச்சர் கூறினார். டிசம்பர் 2026 க்குள் மெட்ரோவின் இரண்டாம் கட்ட திட்டத்தை நிறைவு செய்வதாக அரசாங்கம் உறுதியளித்துள்ளது. மேலும், விமான நிலையத்திலிருந்து தாம்பரம் வழியாக கிளம்பாக்கம் பேருந்து நிலையம் வரை கட்டம் -1 நீட்டிப்பு விரைவில் முடிக்கப்பட உள்ளது.
சென்னை நகரத்தின் அனைத்து கூடுதல் பகுதிகளுக்கும் மொத்தமாக ரூ .2,056 கோடி செலவில் ‘பாதாள சாக்கடை’ அமைப்பை வழங்குவதாக அரசாங்கம் உறுதியளித்துள்ளது. இந்த திட்டம், சென்னையில் உள்ள நீர்நிலைகளில் கழிவுநீர் வெளியேறுவதைத் தடுக்க, மொத்தம் ரூ .2,371 கோடி செலவில் தீவிரமாக செயல்படுத்தப்படும் என்று அறிவிக்கப்பட்டுள்ளது.
கிருஷ்ணா நதி நீரை ஆந்திராவில் இருந்து குழாய் வழியாக சென்னையின் நீர்த்தேக்கங்களுக்கு அனுப்புவதற்கான சாத்தியக்கூறு அறிக்கை தயாரிக்கப்பட உள்ளது.
உலக வங்கி மற்றும் ஆசிய உள்கட்டமைப்பு முதலீட்டு வங்கியின் உதவியுடன் சென்னை நகர கூட்டுத் திட்டமும் விரைவில் தொடங்கப்பட உள்ளது.
பட்ஜெட்டில், சென்னையில் உள்ள செம்மொழி தமிழாய்வு நிறுவனத்தை புதுப்பிக்க அரசு நடவடிக்கை எடுக்கும் என்று குறிப்பிடப்பட்டுள்ளது. 2010 ஆம் ஆண்டு முதல் வழங்கப்படாத கலைஞர் மு.கருணாநிதி செம்மொழி தமிழ் விருது இனிமேல் ஒவ்வொரு ஆண்டும் ஜூன் 3 ஆம் தேதி ரூ .10 லட்சம் ரொக்கப் பரிசாக வழங்கப்படும்.
காசிமேடு மீன்பிடி துறைமுகம் சென்னை துறைமுக அறக்கட்டளையுடன் இணைந்து ரூ .150 கோடி செலவில் மேம்படுத்தப்படும். மீன்பிடி துறைமுகங்கள் மற்றும் மீன்பிடி தளங்களை நிர்மாணிப்பதற்காக பட்ஜெட்டில் மொத்தம் ரூ .433.97 கோடி ஒதுக்கப்பட்டுள்ளது. மீன்பிடி தளங்களை மேம்படுத்த ரூ .143.46 கோடி ஒதுக்கப்பட்டுள்ளது.
தொழில்துறையின் பாதுகாப்பை மேம்படுத்த, நந்தம்பாக்கம் மற்றும் கவனூரில் இரண்டு கட்டங்களாக ஃபின்டெக் நகரத்தை உருவாக்க பட்ஜெட்டில் திட்டமிடப்பட்டுள்ளது. முதல் கட்டமாக நந்தம்பாக்கத்தில் ரூ .165 கோடி மதிப்பீட்டில் ஃபின்டெக் நகரம் உருவாக்கப்படும்.
"தமிழ் இந்தியன் எக்ஸ்பிரஸின் அனைத்து செய்திகளையும் உடனுக்குடன் டெலிகிராம் ஆப்பில் பெற https://t.me/ietamil
/indian-express-tamil/media/agency_attachments/33Ho9XHwZawzDekwDLnu.png)
Follow Us/tamil-ie/media/media_files/uploads/2021/08/Stalin-Budget-1200.jpeg)