Tamil Nadu News Today Updates: சென்னை திரும்பும் மக்களுக்கு சுங்கச்சாவடி அனுமதி இன்று இலவசம்!

பிரதமர் மோடியின் உரையை மாணவர்கள் கேட்க, நாளை அனைத்து ஏற்பாடுகளும் தயாராக இருக்க வேண்டும் என மாவட்ட முதன்மைக் கல்வி அலுவலர்களுக்கு பள்ளி கல்வித்துறை உத்தரவிட்டுள்ளது.

ஆப்பிரிக்க கடற்பகுதி அருகே கடற்கொள்ளையர்களால் சிறைபிடிக்கப்பட்ட இந்தியர்கள் 19 பேர் நைஜீரிய கடற்பகுதியில் விடுவிக்கப்பட்டனர்.

துணை குடியரசுத் தலைவர் வெங்கையா நாயுடு தனடு டுவிட்டர் பக்கத்தில், முதல்வர் பழனிசாமி தனது ஆதாரமான விவசாயத்தை மறக்காமல் இருப்பது பாராட்டுக்குரியது என்று நெற்பயிருடன் முதல்வர் பழனிசாமி இருக்கும் புகைப்படத்தை பகிர்ந்து துணை ஜனாதிபதி வெங்கையா நாயுடு டுவிட் செய்துள்ளார்.

Pleased to see Chief Minister of Tamil Nadu, Shri Edappadi K. Palaniswami working in fields as a farmer, who will never forget his roots. It may be symbolic but it inspires people. Everyone should focus on making agriculture profitable and sustainable. This is the need of hour. pic.twitter.com/cmcnKWaIHU

— Vice President of India (@VPSecretariat) January 19, 2020

புதுக்கோட்டை மாவட்டம், ஜெகதாப்பட்டினத்தில் இருந்து சுமார் 96 விசைப்படகுகளில் தமிழக மீனவர்கள் நேற்று மீன்பிடிக்க கடலுக்கு சென்றனர். படகில் சென்ற மீனவர்கள் பாரதி, அசோக், சக்திகுமார், மணி ஆகிய நான்கு பேரும் நெடுந்தீவு அருகே மீன் பிடித்துக்கொண்டிருந்தபோது அவர்களுடைய விசைப்படகு திடீரென கடலுக்குள் மூழ்கியது. சம்பவ இடத்திற்கு வந்த இலங்கை கடற்படையினர் 4 தமிழக மீனவர்களையும் சிறைபிடித்து காங்கேசன் துறைமுகத்துக்கு கொண்டு சென்றனர்.

துக்ளக் இதழ் 50-ம் ஆண்டு நிறைவு விழாவில் பேசிய நடிகர் ரஜினிகாந்த், பெரியார் குறித்து தவறான தகவலை கூறியதற்காக அவர் மன்னிப்பு கேட்க வேண்டும் இல்லாவிட்டால் அவருடைய வீடு 23-ம் தேதி முற்றுகை - முற்றுகையிடப்படும் என தந்தை பெரியார் திராவிடர் கழகம் அறிவித்துள்ளது.

வாட்ஸ் அப்பில் வீடியோ, புகைப்படம் அனுப்புவதில் சிக்கல் ஏற்பட்டுள்ளது. இதனால், வாட்ஸ் அப் பயனர்கள் சிரமப்பட்டு வருகின்றனர். இந்த சிக்கல் குறித்து வாட்ஸ் அப் நிர்வாகம் இதுவரை எந்த விளக்கமும் அளிக்கவில்லை; இதன் காரணமாக #Whatsappdown என்ற ஹேஷ்டேக் டுவிட்டரில் ட்ரெண்ட் ஆகி வருகிறது

திமுக தலைவர் மு.க.ஸ்டாலின், ஹைட்ரோகார்பன் திட்டத்தை அனுமதிக்க மாட்டோம் என நாளை கூடும் தமிழக அமைச்சரவைக் கூட்டத்தில் கொள்கை முடிவு எடுக்க வேண்டும். சுற்றுச்சூழல் அனுமதி பெறத்தேவையில்லை என்ற புதிய உத்தரவை மத்திய அரசு உடனே திரும்பப்பெற வேண்டும் என்று தெரிவித்துள்ளார்.

விடுதலை சிறுத்தைகள் கட்சியைச் சேர்ந்த விழுப்புரம் எம்.பி ரவிக்குமார் முதல்வருக்கு எழுதியுள்ள கடிதத்தில், கன்னியாகுமரியில் விவேகானந்தர் பாறைக்கு மின்விளக்கு அலங்காரம் இருக்கும்போது, வள்ளுவர் சிலையை பராமரிக்காதது பாரபட்சமானது. வள்ளுவர் சிலையை பராமரித்து மின்விளக்குகளை உடனே சீரமைக்க வேண்டும் என்று வலியுறுத்தியுள்ளார்.

குடியுரிமை சட்டத்தை அமல்படுத்த மாட்டோம் என மாநில அரசுகள் சொல்வது சட்டத்திற்கு புறம்பானது. இந்த சட்டத்திற்கு எதிர்ப்பு தெரிவித்து மாநில சட்டசபைகளில் நிறைவேற்றியுள்ள தீர்மானங்களால் எவ்வித பாதிப்புமில்லை என்று அமைச்சர் நிர்மலா சீத்தாராமன் தெரிவித்துள்ளார்.

சிறப்பு எஸ்.ஐ. வில்சன் கொலை வழக்கில் குற்றவாளிகளுக்கு உதவிய உசைன் ஷெரீப் கைது செய்யப்பட்டுள்ளார்.  ஷெரீப்பை, பெங்களூருவில் குற்றவாளிகள் தங்க இடம் கொடுத்ததாக உசைன் என்பவரும் கைது செய்யப்பட்டுள்ளார்.

அ.தி.மு.க ஒருங்கிணைப்பாளரும், துணை முதல்வருமான ஓ.பி.எஸ் சபரிமலை சென்றுள்ளார். இருமுடி கட்டி  தேனியில் இருந்து சபரிமலைக்குச் சென்றுள்ளார். அவருடன் குடும்ப உறுப்பினர்கள் யாரும் செல்லவில்லை. அதிகாலை அவர் சபரிமலையில் சாமி தரிசனம் செய்துள்ளார். மாலை அவர் மீண்டும் தேனி திரும்புவார் என்று கூறப்படுகிறது.

குடியுரிமை திருத்த சட்டத்தை எதிர்ப்பவர்கள் அனைவரும் தேச விரோதிகள் என்று பாரதிய ஜனதா கட்சி தேசிய செயலாளர் ஹெச்.ராஜா தெரிவித்துள்ளார்.

தஞ்சை பெரிய கோயிலில் தமிழில் குடமுழுக்கு நடத்தப்பட வேண்டும் என்று, அரசுக்கு திமுக தலைவர் ஸ்டாலின் கோரிக்கை விடுத்திருந்தார். இந்நிலையில், சென்னை திருமங்கலம் பகுதியில் நடைபெற்ற நிகழ்ச்சியில் பத்திரிகையாளர்களை சந்தித்த அமைச்சர் பாண்டியராஜன் கூறியதாவது, தமிழில் குடமுழுக்கு நடத்தப்பட வேண்டும் என்ற கோரிக்கை ஏற்கனவே அரசின் பரிசீலனையில் உள்ளது. ஸ்டாலின் எல்லா விஷயங்களிலும் அரசியல் ஆதாயம் தேட முயற்சிப்பதாக அவர் கூறினார்.

தமிழகத்தில் அதிக அளவு 2,000 ரூபாய் கள்ளநோட்டுகள் பறிமுதல் செய்யப்பட்டுள்ளதாக தெரியவந்துள்ளது.

2018 ஆம் ஆண்டில் நாட்டில் மொத்தமாக 54 ஆயிரத்து 776 போலி இரண்டாயிரம் ரூபாய் நோட்டுகள் பறிமுதல் செய்யப்பட்டிருக்கிறது. அதில், 12 ஆயிரத்து 560 போலி இரண்டாயிரம் ரூபாய் நோட்டுகள் தமிழ்நாட்டில் பறிமுதல் செய்யப்பட்டிருக்கிறது. அடுத்ததாக மேற்கு வங்கத்தில் 9 ஆயிரத்து 615 போலி இரண்டாயிரம் ரூபாய் தாள்களும்,‌ கர்நாடகாவில் 6 ஆயிரத்து 750 ரூபாய் போலி தாள்களும், டெல்லியில் 6 ஆயிரத்து 457 போலி ரூபாய் தாள்களும் பறிமுதல் செய்யப்பட்டிருக்கின்றன. மிசோரமில் 3 ஆயிரத்து 494 போலி இரண்டாயிரம் ரூபாய் தாள்களும், குஜராத்தில் 2 ஆயிரத்து 722 ரூபாய் போலி தாள்களும் பறிமுதல் செய்யப்பட்டிருக்கின்றன.

சென்னையில் பெட்ரோல் நேற்றைய விலையில் இருந்து 18 காசுகள் குறைந்து ஒரு லிட்டர் ரூ.78.01 ஆகவும், டீசல், நேற்றைய விலையில் இருந்து 17 காசுகள் குறைந்து ஒரு லிட்டர் ரூ.72.33 ஆகவும் உள்ளது. இந்த விலை இன்று காலை முதல் அமலுக்கு வந்தது.

சென்னையில் போலியோ சொட்டு மருந்து முகாமை தொடங்கிவைத்தார் முதல்வர் பழனிசாமி.  தமிழகத்தில் 43,051 மையங்களில் 70.5 லட்சம் குழந்தைகளுக்கு போலியோ சொட்டு மருந்து தர ஏற்பாடு செய்யப்பட்டுள்ளது.