Tamil News Update: தீபாவளி முடிந்து கிளாம்பாக்கம் வரும் பயணிகளுக்காக சிறப்பு ரயில் இயக்கம்

பெட்ரோல் டீசல் விலை நிலவரம்: இந்தியாவில் கடந்த 227 நாட்களாக மாற்றம் இல்லாத பெட்ரோல் டீசல் விலை 228-வது நாளாக இன்றும் மாற்றம் இல்லாமல், ஒரு லிட்டர் பெட்ரோல் விலை ரூ100.75-க்கும், டீசல் விலை ரூ92.34-க்கும், கேஸ் விலை ரூ90.50-க்கும் விற்பனை செய்யப்படுகிறது.

சென்னையில் உள்ள முக்கிய ஏரிகளின் நீர் நிலவரம்

3300 மில்லியன் கன அடி கொள்ளளவு கொண்ட புழல் ஏரியில் நீரிருப்பு 2463 மில்லியன் கன அடியாக உள்ளது. 1081 மில்லியன் கன அடி கொள்ளளவு கொண்ட சோழவரம் ஏரியில் நீரிருப்பு 100 மில்லியன் கன அடியாக உள்ளது. 500 மில்லியன் கன அடி கொள்ளளவு கொண்ட கண்ணன்கோட்டை - தேர்வாய்கண்டிகை ஏரியில் நீரிருப்பு 312 மில்லியன் கன அடியாக உள்ளது.

சிறப்பு ரயில் இயக்கம்

தீபாவளி முடிந்து சென்னை கிளாம்பாக்கம் வரும் பயணிகளுக்கு சிறப்பு ஏற்டாக, வரும்  4ம் தேதி காட்டாங்குளத்தூரில் இருந்து தாம்பரத்திற்கு சிறப்பு மின்சார ரயில்கள் இயக்கப்பட உள்ளது.

“தமிழ் இந்தியன் எக்ஸ்பிரஸின் அனைத்து செய்திகளையும் உடனுக்குடன் டெலிகிராம் ஆப்பில் பெற https://t.me/ietamil“

Oct 31, 2024 21:34 IST
இசைஞானி இளையராஜாவின் சிம்பொனி இசை ஜன. 26ல் வெளியீடு
இசைஞானி இளையராஜா: “அனைவருக்கும் தீபாவளி வாழ்த்துகள். இந்த நன்னாளில் லண்டனில் எனது சிம்பொனி இசையை ரெக்கார்ட் செய்தேன்; சிம்பொனி இசை அடுத்த ஆண்டு ஜனவரி 26-ம் தேதி வெளியிடப்படும் என்பதை உலகெங்கிலும் உள்ள இசை ஆர்வலர்களுக்கு மகிழ்ச்சியுடன் தெரிவித்துக்கொள்கிறேன்” என்று தெரிவித்துள்ளார்.



Oct 31, 2024 21:15 IST
பட்டாசு வெடித்து தீபாவளி கொண்டாட்டம்; புகைமூட்டமாக மாறிய சென்னை மாநகரம்
தீபாவளி பண்டிகை நாளான இன்று சென்னையில் பட்டாசு வெடித்து கொண்டாடப்பட்டது. இதனால், சென்னை மாநகரம் புகைமூட்டமாக மாறியது. 



Oct 31, 2024 20:04 IST
நவம்பர் முதல் வார இறுதியில் வங்கக் கடலில் உருவாகிறது காற்றழுத்தத் தாழ்வு பகுதி - வானிலை ஆய்வு மையம்
நவம்பர் முதல் வார இறுதியில் தென்மேற்கு வங்கக் கடலில் காற்றழுத்தத் தாழ்வு பகுதி உருவாகிறது. காற்றழுத்தத் தாழ்வு பகுதி தீவிரமடைந்து காற்றழுத்தத் தாழ்வு மண்டலமாக உருவாக வாய்ப்பு உள்ளது என்று வானிலை ஆய்வு மையம் தெரிவித்துள்ளது. தமிழகத்தை நோக்கி நகரும் காற்றழுத்தத் தாழ்வு மண்டலத்தால் நவம்பர் 7 -11-ம் தேதி மிக கனமழைக்கு வாய்ப்பு உள்ளது என்று இந்திய வானிலை ஆய்வு மையம் தெரிவித்துள்ளது.



Oct 31, 2024 19:58 IST
தமிழ்நாடு முழுவதும் தீபாவளி கொண்டாட்டம்; பட்டாசுகள் வெடித்து மக்கள் உற்சாகம்
தமிழ்நாடு முழுவதும் தீபாவளி கொண்டாட்டம் களைகட்டத் தொடங்கியது. மக்கள் பட்டாசுகளை வெடித்து உற்சாகமாகக் கொண்டாடி வருகின்றனர். 



Oct 31, 2024 19:57 IST
சேலத்தில் பட்டாசு தீப்பொறி விழுந்து பனியன் நிறுவன குடோனில் தீ விபத்து
சேலம் மாநகரின் களரம்பட்டி பகுதியில் பட்டாசு தீப்பொறி விழுந்து, பனியன் நிறுவன குடோனில் தீ விபத்து ஏற்பட்டது. ஓடு வேயப்பட்டிருந்ததால் குடோன் முழுவதும் தீ பரவியது. தீயணைப்பு வீரர்கள் தீயை அணைக்க போராடி வருகின்றனர்.



Oct 31, 2024 19:10 IST
ஐ.பி.எல் 2025 : ரோகித் சர்மாவை ரூ.16.30 கோடிக்கு தக்க வைத்தது மும்பை அணி
மும்பை அணி ரோகித் ஷர்மாவை ரூ.16.30 கோடிக்கு தக்க வைத்தது. பும்ராவை ரூ. 18 கோடிக்கும் சூர்யகுமார் யாதவ்வை ரூ. 16.35  கோடிக்கும் ஹர்திக் பாண்டியாவை ரூ. 16.35 கோடிக்கும் திலக் வர்மாவை ரூ. 8 கோடிக்கும் மும்பை இந்தியன்ஸ் அணி தக்கவைத்தது.



Oct 31, 2024 19:06 IST
ஐ.பி.எல் 2025 : விராட் கோலியைத் தக்க வைத்தது பெங்களூரு அணி
ஐ.பி.எல் அணிகள் தக்கவைத்த இந்திய வீரர்களிலேயே அதிக தொகையுடன் வீராட் கோலி முதலிடம் விராட் கோலியை ரூ. 21 கோடிக்கு ராயல் சேலஞ்சர்ஸ் பெங்களூரு அணி தக்கவைத்தது.



Oct 31, 2024 19:00 IST
ஹென்ரிச் க்ளாசனை ரூ. 23 கோடிக்கு தக்கவைத்தது ஐதராபாத் அணி 
2025 ஐ.பி.எல் சீசனுக்கு அதிகபட்ச தொகையாக தென்னாப்பிரிக்க வீரர் ஹென்ரிச் க்ளாசனை ரூ. 23 கோடிக்கு சர் ரைசர்ஸ் ஐதராபாத் அணி தக்கவைத்தது.



Oct 31, 2024 17:46 IST
ஐ.பி.எல் 2025 - தோனியை தக்கவைத்த சி.எஸ்.கே 
ஐ.பி.எல் 2025 தொடருக்கான மெகா ஏலத்திற்கு முன்னதாக சென்னை சூப்பர் கிங்ஸ் அணி தோனியை தக்கவைத்துள்ளது. 



Oct 31, 2024 17:05 IST
மின்சாரம் தாக்கி உயிரிழந்த எஸ்.ஐ: ஸ்டாலின் நிவாரணம் அறிவிப்பு
ராமநாதபுரம் மாவட்டம், பரமக்குடியில் மின்சாரம் தாக்கி உயிரிழந்த எஸ்.ஐ. குடும்பத்தினருக்கு ஆறுதல் மற்றும் நிதியுதவியினை தமிழ்நாடு முதலமைச்சர் மு.க.ஸ்டாலின் அறிவித்துள்ளார்.
இதுதொடர்பாக அவர் வெளியிட்டுள்ள செய்திக்குறிப்பில், "ராமநாதபுரம் மாவட்டம், பரமக்குடி நகர காவல் நிலையத்தில் உதவி ஆய்வாளராக (எஸ்.ஐ.) பணிபுரிந்துவந்த சரவணன் (வயது 36) த/பெ.வேலு என்பவர் இன்று 31.10.2024 அதிகாலை சுமார் 1.00 மணியளவில் பரமக்குடி நகரில் இரவு நேர ரோந்துப் பணியின்போது கீழே விழுந்த இருப்புக் கம்பத்தை அகற்றும்போது எதிர்பாராதவிதமாக மின்சாரம் தாக்கி உயிரிழந்தார் என்ற துயரமான செய்தியைக் கேட்டு மிகுந்த வருத்தமும் வேதனையும் அடைந்தேன். உதவி ஆய்வாளர் சரவணன் மறைவு தமிழ்நாடு காவல்துறைக்கும் அவரது குடும்பத்தினருக்கும் ஈடுசெய்ய முடியாத பேரிழப்பாகும்.
உதவி ஆய்வாளர் சரவணன் அவர்களை இழந்து வாடும் அவரது குடும்பத்தினருக்கும் அவருடன் பணியாற்றும் காவல் துறையினருக்கும் எனது ஆழ்ந்த இரங்கலையும் ஆறுதலையும் தெரிவித்துக் கொள்வதோடு, அவரது குடும்பத்தினருக்கு இருபத்தைந்து லட்சம் ரூபாய் நிவாரண நிதியாக வழங்கிடவும் உத்தரவிட்டுள்ளேன்." என்று முதல்வர் ஸ்டாலின் கூறியுள்ளார்.
 



Oct 31, 2024 16:18 IST
கிரிக்கெட் ஆடும் போது மாணவி உயிரிழப்பு 
கேரளாவில் கிரிக்கெட் விளையாடும் போது பந்து தலையில் விழுந்து காயமடைந்த மாணவி சிகிச்சை பலனின்றி உயிரிழந்த சம்பவம் பெரும் அதிர்ச்சியை ஏற்படுத்தியுள்ளது. 
10 நாட்களுக்கு முன், பள்ளியில் விளையாட்டு நேரத்தின் போது கிரிக்கெட் விளையாடிய மாணவியின் தலையில் பந்து விழுந்து படுகாயம் அடைந்துள்ளார்.
கோட்டக்கல் தனியார் மருத்துவமனையில் அனுமதிக்கப்பட்டு பின்னர் மும்பை மருத்துவமனையில் சிகிச்சையில் இருந்த நிலையில் உயிரிழந்துள்ளார். 



Oct 31, 2024 16:10 IST
பட்டாசு வெடித்து 82 பேர் காயம் - தீயணைப்புத் துறை தகவல்
மதியம் 12 மணி வரை தமிழகம் முழுவதும் பட்டாசு வெடித்து 82 பேர் காயம் என்று தீயணைப்புத் துறை தகவல் தெரிவித்துள்ளது. 
ஒரே ஒரு தீ விபத்தில் 5 ஆயிரம் ரூபாய் மதிப்பிலான பொருட்கள் சேதம் என்றும், பட்டாசு அல்லாமல் தமிழகம் முழுவதும் 11 இடங்களில் தீ விபத்து ஏற்பட்டுள்ளது என்றும் தீயணைப்புத் துறை தகவல் தெரிவித்துள்ள்ளது. 
 
 



Oct 31, 2024 16:03 IST
குமரியில் பைக் ரேஸ் - பைக்கை பறிமுதல் செய்த போலீஸ் 
கன்னியாகுமரியில் பைக் ரேஸில் ஈடுபட்ட 24 விலை உயர்ந்த வாகனங்களை காவல்துறையினர் பறிமுதல் ​செய்தனர். 



Oct 31, 2024 16:01 IST
டிரம்ப் குப்பை வண்டியில் சென்று தேர்தல்  பிரச்சாரம்
அமெரிக்க அதிபர் தேர்தல் பிரச்சராத்திற்காக குப்பை வண்டியில் ஏறி பிரச்சாரம் செய்துள்ளார் டிரம்ப். 



Oct 31, 2024 15:56 IST
நத்தம்: பட்டாசு அறையில் வெடி விபத்து
நத்தம் அருகே வெடி வெடிக்கும் ஆர்வத்தில் ஊதுபத்தியை பட்டாசு இருந்த அறையில் வைத்து சென்ற சிறுவர்களால், வெடி விபத்து ஏற்பட்டு, அறையில் இருந்த பொருட்கள் முற்றிலும் சேதம் அடைந்தது. 



Oct 31, 2024 14:00 IST
புதுக்கோட்டை எஸ்.பி. வந்திதா பாண்டேவிற்கு விருது
பெண் குழந்தைகளுக்கு எதிரான போக்சோ குற்றத்தில் துரித விசாரணையும் நடவடிக்கையும் எடுத்ததற்காக புதுக்கோட்டை எஸ்.பி. வந்திதா பாண்டேவிற்கு மத்திய உள்துறை அமைச்சகத்தின் விருது அறிவிக்கப்பட்டு உள்ளது



Oct 31, 2024 13:43 IST
அமரன் படத்தை பார்த்து பாராட்டிய ஸ்டாலினுக்கு நன்றி - சிவகார்த்திகேயன்
அமரன் படத்தை பார்த்து பாராட்டிய முதலமைச்சர் ஸ்டாலினுக்கு நன்றி. படத்தில் நிறைய இடங்களில் கைதட்டல்கள் வந்தது. மக்கள் `அமரன்' படத்தை பாராட்டி வருவது மகிழ்ச்சி அளிக்கிறது. அமரன்' படத்தை நிச்சயம் குழந்தைகள் பார்க்க வேண்டும். நிஜ சூப்பர் ஹீரோவின் கதை தான் `அமரன்' என சிவகார்த்திகேயன் தெரிவித்துள்ளார்



Oct 31, 2024 13:09 IST
சென்னையில் கனமழை பெய்ய வாய்ப்பு
சென்னையில் இன்று மிதமானது முதல் கனமழை வரை பெய்ய வாய்ப்பு உள்ளது என வானிலை ஆய்வு மையம் தெரிவித்துள்ளது



Oct 31, 2024 13:05 IST
தமிழ்நாட்டில் 19 மாவட்டங்களில் கனமழைக்கு வாய்ப்பு – வானிலை மையம்
தமிழ்நாட்டில் இன்று திண்டுக்கல், மதுரை, திருச்சி, கரூர், நாமக்கல், சேலம், ஈரோடு, தருமபுரி, அரியலூர், பெரம்பலூர், கடலூர், மயிலாடுதுறை, தஞ்சாவூர், புதுக்கோட்டை, சிவகங்கை, விருதுநகர், தென்காசி, திருநெல்வேலி மற்றும் கன்னியாகுமரி ஆகிய 19 மாவட்டங்களில் கனமழைக்கு வாய்ப்பு என வானிலை ஆய்வு மையம் தெரிவித்துள்ளது



Oct 31, 2024 12:32 IST
4 இந்திய நிறுவனங்கள் மீது அமெரிக்கா பொருளாதார தடை
உக்ரைனில் ரஷ்யாவின் போர் முயற்சிகளுக்கு உதவியதற்காக பத்துக்கும் மேற்பட்ட நாடுகளில் இருந்து நான்கு இந்திய நிறுவனங்கள் உட்பட சுமார் 400 நிறுவனங்கள் மற்றும் தனிநபர்கள் மீது அமெரிக்கா புதன்கிழமை பொருளாதாரத் தடைகளை விதித்துள்ளது. 



Oct 31, 2024 12:24 IST
தீபாவளி பண்டிகை; இறைச்சி கடைகளில் விற்பனை அமோகம்
தீபாவளியையொட்டி இறைச்சி கடைகளில் விற்பனை அமோக நடைபெற்று வருகிறது. அசைவ பிரியர்கள் வரிசையில் காத்திருந்து இறைச்சி வாங்கிச் செல்கின்றனர். பெரும்பாலான இடங்களில் ஆட்டுக் கறி 900 ரூபாய்க்கும், கோழிக்கறி 280 ரூபாய்க்கும் , நாட்டுக் கோழி 850 ரூபாய்க்கும் விற்பனையாகிறது



Oct 31, 2024 12:22 IST
தீபாவளி: காஞ்சிபுரம் காமாட்சி அம்மன் வீதி உலா
தீபாவளி திருநாளை முன்னிட்டு காஞ்சிபுரம் காமாட்சி அம்மன் வீதி உலா நடைபெற்றது. 50 ஆயிரம் சரவெடி வெடிக்க லட்சுமி சரஸ்வதி தேவிகளுடன் சிறப்பு அலங்காரத்தில் வீதி உலா நடந்தது. வழிநெடுகிலும் திரளான பக்தர்கள் அம்மனுக்கு கற்பூர ஆரத்தி எடுத்து வழிபாடு செய்தனர்



Oct 31, 2024 11:57 IST
தீபாவளி பண்டிகை; வடபழனி முருகன் கோயிலில் பக்தர்கள் சுவாமி தரிசனம்
தீபாவளி பண்டிகையையொட்டி வடபழனி முருகன் கோயிலில் பக்தர்கள் குடும்பத்தோடு வந்து சாமி தரிசனம் செய்து வருகின்றனர். பக்தர்கள் நீண்ட வரிசையில் காத்திருந்து சுவாமி தரிசனம் செய்து வருகின்றனர்



Oct 31, 2024 11:39 IST
தீபாவளிக்கு இத்தனை நாள் வாயே திறக்காதவர்கள் தற்போது வாழ்த்து சொல்கிறார்கள் - எல்.முருகன்
தீபாவளிக்கு இத்தனை நாள் வாயே திறக்காதவர்கள் தற்போது வாழ்த்து சொல்கிறார்கள். முதலமைச்சர் ஸ்டாலினும் வாழ்த்து சொல்வார் என்று எதிர்பார்க்கிறேன். தீபாவளிக்கு வாழ்த்து சொல்வதில் என்ன தயக்கம். அனைத்து திருவிழாக்களுக்கும் வாழ்த்து சொல்ல வேண்டும் என மத்திய இணையமைச்சர் எல்.முருகன் தெரிவித்துள்ளார்



Oct 31, 2024 11:37 IST
தீபாவளி பண்டிகை; சிவகாசியில் ரூ6,000 கோடிக்கு பட்டாசு விற்பனை
தீபாவளி பண்டிகையையொட்டி, சிவகாசியில் தயாரான பட்டாசுகள் நாடு முழுவதும் 6 ஆயிரம் கோடி ரூபாய்க்கு விற்பனையாகியுள்ளதாக தமிழ்நாடு பட்டாசு வணிகர்கள் கூட்டமைப்பினர் தெரிவித்துள்ளனர்



Oct 31, 2024 10:27 IST
ரூ.60 ஆயிரத்தை நெருங்கும் தங்கம் 
சென்னையில் தங்கம் விலை சவரனுக்கு 120 ரூபாய் அதிகரித்துள்ள. ஒரு சவரன் ஆபரணத் தங்கம் 59,640 ரூபாய்க்கு விற்பனை செய்யப்படுகிறது. தங்கம் விலை கிராமிற்கு 15 ரூபாய் உயர்ந்துள்ளது.



Oct 31, 2024 10:25 IST
த.வெ.க மாநாடு வெற்றி: நடிகர் விஜய்க்கு ரஜினிகாந்த் வாழ்த்து
நடிகர் விஜய் தனது முதல் அரசியல் மாநாட்டை வெற்றிகரமாக நடத்தியுள்ளார். அவருக்கு எனது வாழ்த்துக்கள் என்று நடிகர் ரஜினிகாந்த் கூறியுள்ளார்.



Oct 31, 2024 09:38 IST
சென்ரலில் இருந்து போடி சென்ற ரயிலில் என்ன நடந்தது?
சென்னை சென்ட்ரலில் இருந்து போடிநாயக்கனூர் செல்லும் பயணிகள் ரயில் நேற்றிரவு 10.30 மணியளவில் புறப்பட்டது. இன்று காலை 7.50 மணியளவில் மதுரை அருகே சென்றபோது எஞ்சினுக்கு அடுத்த பெட்டியின் சக்கரம் கழன்றுள்ளது. இதனால் உடனடியாக  ரயில் நிறுத்தப்பட்டது.
விபத்துக்குள்ளான ரயிலில் பயணித்த பயணிகள் உடனடியாக மாற்று ரயிலில் அனுப்பி வைக்கப்பட்டனர். மதுரை ரயில் நிலையத்தில் 5வது நடைமேடையில் இந்த ரயில் விபத்துக்குள்ளாகி நிற்பதால் சென்னையில் இருந்து வரும் மற்ற சிறப்பு ரயில்களின் போக்குவரத்தும் பாதிக்கப்பட்டுள்ளது.
இதனால் அவ்வழியாக செல்லும் ரயில்களை வேறு தடம் வழியாக மாற்ற ரயில்வே அதிகாரிகள் ஏற்பாடு செய்து வருகின்றனர். கழன்ற சக்கரத்தை மீண்டும் பொருத்தும் பணியில் ரயில்வே பணியாளர்கள் ஈடுபட்டு வருகின்றனர்.



Oct 31, 2024 09:13 IST
காற்றின் தரக்குறியீடு மோசம்: தமிழ்நாட்டில் ஆலந்தூர் முதலிடம்
தீபாவளி பண்டிகையை முன்னிட்டு பட்டாசு வெடிப்பதால், சென்னையில் 3 பகுதிகளில் காற்றின் தரக்குறியீடு மோசமாகியுள்ளதாக கூறப்பட்டுள்ள நிலையில், தமிழ்நாட்டில் அதிகபட்சமாக சென்னை ஆலந்தூரில், தரக்குறியீடு 248 ஆகவும், குமிடிப்பூண்டி, அருகம்பாக்கம் ஆகிய பகுதிகளில் 200-க்கு மேலும் பதிவாகியுள்ளது.



Oct 31, 2024 09:11 IST
தீபாவளி பண்டிகைக்காக 5.76 லட்சம் பேர் தங்களது சொந்த ஊருக்கு சென்றதாக தகவல்
தீபாவளி பண்டிகையை கொண்டாடுவதற்காக சென்னையில் இருந்து, கடந்த 3 நாட்களில் 5.76 லட்சம் பேர் தங்களது சொந்த ஊருக்கு பயணமாகியுள்ளனர். 10784 பேருந்துகள் இயக்கப்பட்டுள்ளதாக போக்குவரத்து துறை தெரிவித்துள்ளது,



Oct 31, 2024 09:09 IST
பிரதமர் மோடி தீபாவளி வாழ்த்து
நாட்டு மக்களுக்கு தீபாவளி வாழ்த்துக்கள். இந்த தெய்வீக தீபத்திருநாளில் அனைவரும் ஆரோக்கியமாகவும், மகிழ்ச்சியாகவும், வாழ வாழ்த்துகிறேன். மகாலட்சுமி மற்றும் விநாயக பெருமானின் அருள் அனைவருக்கும் கிடைக்கட்டும் என்று பிரதமர் நரேந்திரமோடி வாழ்த்து தெரிவித்துள்ளார்.



Oct 31, 2024 09:06 IST
தீபாவளி பண்டிகை முடிந்து சென்னை திரும்புவோருக்காக சிறப்பு ரயில் இயக்கம்
தீபாவளி முடிந்து சென்னை திரும்புவோருக்கு வசதியாக, நவம்பர் 3-ந் தேதி பிற்பகல் 3 மணிக்கு ராமநாதபுரத்தில் இருந்து சிறப்பு ரயில் இயக்கப்பட உள்ளது. இந்த ரயில் இரவு 11.40 மணிக்கு தாம்பரம் வந்தடையும்.



Oct 31, 2024 08:59 IST
தீபாவளி சிறப்பு ரயில்களின் போக்குவரத்து பாதிப்பு
சென்னை சென்ரலில் இருந்து போடி செல்லும் ரயில் மதுரை அருகே செல்லும்பொது ரயிலின் சக்கரம் கழன்றதால் பாதியில் நிறுத்தப்பட்டது. இதன் காரணமாக தீபாவளியை ஒட்டி அவ்வழியாக இயக்கப்படும் சிறப்பு ரயில்களின் போக்குவரத்தும் பாதிக்கப்பட்டுள்ளது.



Oct 31, 2024 08:19 IST
தீபாவளி பண்டிகைக்கு சொந்த ஊர் சென்ற பொதுமக்கள்: வெறிச்சோடிய சென்னை
தீபாவளி கொண்டாட பொதுமக்கள் தங்கள் சொந்த ஊர் சென்றதால், சென்னையில் சாலைகள் வெறிச்சோடி காணப்படுகிறது. தீபாவளியை கொண்டாட சென்னையில் இருந்து சொந்த ஊர்களுக்கு 13 லட்சம் பேர் பயணமாகியுள்ளளது. இதனால் அண்ணா சாலை, பூந்தமல்லி நெடுஞ்சாலை, ஜி.எஸ்.டி சாலை உள்ளிட்ட பிரதான சாலைகள் வெறிச்சோடின.



Oct 31, 2024 07:37 IST
சென்னையில் 3 இடங்களில் காற்றின் தரக்குறியீடு மோசமாக உள்ளதாக தகவல்
தீபாவளி பண்டிகையை முன்னிட்டு பட்டாசு வெடிக்கப்பட்டு வரும் நிலையில், சென்னையில் 3 இடங்களில் காற்றின் தரக்குறியீடு மோசமான நிலையில் உள்ளதாக, மத்திய மாசு கட்டுப்பாட்டு வாரியம் தெரிவித்துள்ளது, இதில் காலை 7 மணி நிலவரப்படி மணலியில் 254, அருகம்பாக்கத்தில் 210, பெருங்குடியில் 201-ஆக காற்றின் தரக்குறியீடு உள்ளது.



Oct 31, 2024 07:34 IST
அடுத்த 3 மணி நேரத்தில் 9 மாவட்டங்களுக்கு மழை வாய்ப்பு
சென்னை, திருவள்ளூர், காஞ்சிபுரம், தஞ்சாவூர், செங்கல்பட்டு, திருவாரூர், நாகப்பட்டினம், மயிலாடுதுறை, கடலூர் ஆகிய மாவட்டங்களில், அடுத்த 3 மணி நேரத்தில் கனமழைக்கு வாய்ப்பு உள்ளதாக வானிலை ஆய்வு மையம் அறிவித்துள்ளது.



Oct 31, 2024 07:32 IST
பரமக்குடி எஸ்.ஐ மின்சாரம் தாக்கி பலி
தேவர் ஜெயந்தியை முன்னிட்டு பல்வேறு இடங்களில் வைக்கப்பட்டிருந்த பேனர்களை அகற்றும் பணியில் ஈடுபட்டிருந்த பரமக்குடி எஸ்.ஐ.சரவணன், மின்சாரம் தாக்கி உயிரிழந்தார்.