News Highlights: பள்ளிகள் திறக்கும் சாத்தியம் இப்போது இல்லை- செங்கோட்டையன்

திமுக தலைவர் மு.க.ஸ்டாலின், வெங்காயத்திலும் ஊழல் வேண்டாம். அனைவருக்கும், நியாய விலையில் வெங்காயம் கிடைக்க நடவடிக்கை தேவை என்று வலியுறுத்தியுள்ளார். இது குறித்து மு.க.ஸ்டாலின் தனது ட்விட்டரில், “வெங்காயம் கிலோ ரூ.130! நெல்மணிகள் நனைந்து விவசாயிகளும், #OnionPrice-ஆல் தாய்மார்களும் கண்ணீர் விட களிநடம் போடுகிறது அதிமுக அரசு! வேளாண் சட்டங்களால் பதுக்கல் அதிகமாகும்; விலை ஏறும்! வெங்காயத்திலும் ஊழல் வேண்டாம்! அனைவருக்கும், நியாய விலையில் வெங்காயம் கிடைக்க நடவடிக்கை தேவை!” என்று ட்வீட் செதுள்ளார்.

வெங்காயம் கிலோ ரூ.130!

நெல்மணிகள் நனைந்து விவசாயிகளும், #OnionPrice-ஆல் தாய்மார்களும் கண்ணீர் விட களிநடம் போடுகிறது அதிமுக அரசு!

வேளாண் சட்டங்களால் பதுக்கல் அதிகமாகும்; விலை ஏறும்!

வெங்காயத்திலும் ஊழல் வேண்டாம்! அனைவருக்கும், நியாய விலையில் வெங்காயம் கிடைக்க நடவடிக்கை தேவை! pic.twitter.com/m9ESefKyQE

— M.K.Stalin (@mkstalin) October 21, 2020

தமிழகத்தில் இன்று ஒரே நாளில் புதிதாக 3,086 பேருக்கு கொரோனா வைரஸ் தொற்று உறுதி செய்யப்பட்டுள்ளது. மாநிலத்தில், கொரோனா பாதிப்பால் இன்று 39 பேர் உயிரிழந்ததாக தமிழக சுகாதாரத்துறை தெரிவித்துள்ளது.

தமிழக பள்ளிக்கல்வித்துறை அமைச்சர் செங்கோட்டையன், “தமிழகத்தில் பள்ளிகளை தற்போது திறப்பதற்கான சாத்தியக்கூறுகள் இல்லை” என்று தெரிவித்துள்ளார்.

புதிய கல்விக் கொள்கையை அமல்படுத்துவதற்கான பணிகளை துவக்கியது பல்கலைக்கழக மானியக் குழு. தமிழகத்தில் பள்ளி கல்வி குறித்து ஆராய அமைக்கப்பட்ட குழு ஒரு கூட்டம் மட்டுமே நடத்தி இருக்கிறது. ஒரு ஆண்டுக்குப் பிறகே இறுதி முடிவு எடுக்கப்படும் என தெரிவிக்கப்பட்டிருந்தது. பொதுமக்கள் கருத்துகள் அடிப்படையில் புதிய கல்வி கொள்கையை இறுதி செய்யும் பணி தீவிரம். உயர்கல்வி நிறுவனங்கள் நிர்வாக சீரமைப்பு பணிகளை ஆரம்பிக்குமாறு பல்கலைக்கழக மானிய குழு உத்தரவு. 

நான் பாஜக-வில் இணையப் போகிறேனா என்ற கேள்விக்கே இடமில்லை. எனக்கென்று ஒரு அமைப்பு உள்ளது. விஜய் மக்கள் இயக்கம் தேவைப்படும் போது அரசியல் கட்சியாக மாறும் என எஸ்.ஏ.சந்திரசேகர் தெரிவித்துள்ளார். 

தொடக்க வேளாண் கூட்டுறவு வங்கிகளில் விவசாய கடன் பெறுவதற்கு மத்திய கூட்டுறவு வங்கிகளில் கணக்கு துவங்கும் நடைமுறையை துரிதப்படுத்துவது எப்படி? கணக்கு தொடங்க என்ன நடைமுறை ஏற்படுத்தப்படும் என்பது குறித்து விளக்கமளிக்க தமிழக அரசுக்கு சென்னை உயர் நீதிமன்றம் உத்தரவு

தமிழகத்தில் கடைகள் திறப்பு நேரம் அதிகரிப்பு. இரவு 10 மணி வரை கடைகளை திறக்க அனுமதியளித்து முதலமைச்சர் எடப்பாடி பழனிசாமி உத்தரவிட்டுள்ளார். 

டெல்லி அணியுடன் நடைப்பெற்ற போட்டியின் போது ஏற்பட்ட காயத்தால், வெஸ்ட் இண்டீஸ் திரும்புகிறார் சி.எஸ்.கே அணியின் ஆல்ரவுண்டர் பிராவோ. இனி வரும் போட்டிகளில் அவர் விளையாட மாட்டார் என சி.எஸ்.கெ நிர்வாகம் அறிவித்துள்ளது.

காவல்துறையில் பணிக்காலத்தில் காலமான காவல்துறை மற்றும் அமைச்சக பணியாளர்களின் வாரிசுகள் 1,562 பேருக்குக் கருணை அடிப்படையில், தகவல் பதிவு இணை இயக்குநர் பணியிடங்களுக்கான ஆணைகளை இன்று முதல்வர் பழனிசாமி வழங்கினார்.

மருத்துவ மாணவர் சேர்க்கையில் அரசுப் பள்ளி மாணவர்களுக்கு 7.5% உள் ஒதுக்கீடு விவகாரத்தில் அதிமுக அரசுடன் இணைந்து போராட திமுக தயாராக இருப்பதாக திமுக தலைவர் மு.க.ஸ்டாலின் தெரிவித்துள்ளார்.

திரைப்படங்களுக்கான மத்திய அரசு விருது அறிவிக்கப்பட்டிருக்கிறது. இந்த விருதுக்காக லட்சுமி ராமகிருஷ்ணன் இயக்கத்தில் உருவான 'ஹவுஸ் ஓனர்' மற்றும் பார்த்திபன் இயக்கத்தில் உருவான 'ஒத்த செருப்பு' ஆகிய இரண்டு தமிழ்த் திரைப்படங்கள் தேர்வு செய்யப்பட்டிருக்கின்றன.

சமீப காலமாகத் தமிழ்நாட்டில் வெங்காய விலை 100 ரூபாய் வரை அதிகரித்து வந்த நிலையில், இன்று சென்னையில் உள்ள பண்ணை பசுமை காய்கறி கடைகளில் ஒரு கிலோ வெங்காயம் ரூ.45-கான விற்பனை திட்டத்தை அமைச்சர் செல்லூர் ராஜு தொடங்கி வைத்தார்.

ஒவ்வொரு ஆண்டும் அக்டோபர் 21-ம் தேதி காவலர்கள் வீரவணக்க நாள் அனுசரிக்கப்படுகிறது. இதனைத் தொடர்ந்து இன்று காவல்துறையினர் சார்பில் டிஜிபி அலுவலக வளாகத்தில் முதலமைச்சர் எடப்பாடி பழனிசாமிக்கு அணிவகுப்பு மரியாதை நடைபெற்றது. பிறகு, வீர காவலர்கள் நினைவுறுவ கற்சின்னங்களை இபிஎஸ் திறந்து வைத்தார். இந்த நிகழ்ச்சியில் அமைச்சர்கள் செங்கோட்டையன், எஸ்.பி.வேலுமணி, தங்கமணி, ஜெயக்குமார், கே.பி.அன்பழகன், தமிழகக் காவல்துறை டிஜிபி திரிபாதி, சென்னை பெருநகர காவல் ஆணையர் மகேஷ்குமார் அகர்வால் ஆகியோர் கலந்துகொண்டனர். கடந்த ஓராண்டில் மட்டும் 183 காவலர்கள் பணியின் போது உயிரிழந்துள்ளனர் என்பது குறிப்பிடத்தக்கது.

இதுவரை 7 ஆண்டுகள் மட்டுமே ஆசிரியர் தகுதித்தேர்வு (TET) சான்றிதழ் செல்லும் என்றிருந்த விதியை மாற்றி ஆயுள் முழுவதும் இனி பயன்படுத்தலாம் என தேசிய ஆசிரியர் கல்விக் குழுமம் (NCTE) அறிவித்திருக்கிறது.

தேனி மாவட்ட திமுகவினரால் ஏற்பாடு செய்யப்பட்ட விழாவில், காணொளி மூலம் பங்கேற்ற திமுக தலைவர் ஸ்டாலின், எதிர்க்கட்சியின் ஆட்சியை விமர்சித்துள்ளார். "தாங்கள் பதவிக்கு வரக் காரணமாக இருந்த ஜெயலலிதாவுக்கே நன்றி இல்லாதவர்களாக இருக்கும்போது, எடப்பாடி பழனிசாமியும் பன்னீர்செல்வமும் எப்படி தமிழ்நாட்டு மக்களுக்கு நன்றி உள்ளவர்களாக இருப்பார்கள். இவர்களுக்கு மக்களைப் பற்றி எந்தக் கவலையும் கிடையாது" என்று குற்றம் சாட்டியுள்ளார்.

வங்கக் கடலில் புதிய காற்றழுத்த தாழ்வுப் பகுதி உருவாகியிருப்பதால், தமிழகத்தில் பெரும்பாலான மாவட்டங்களில் மழை பெய்யும் எனச் சென்னை வானிலை ஆய்வு மையம் தெரிவிக்கிறது. அடுத்த 24 மணிநேரத்தில் சேலம் மற்றும் தர்மபுரி மாவட்டங்களில் கனமழை பெய்வதற்கு வாய்ப்பிருப்பதாகவும் சென்னை மற்றும் அதன் சுற்றுவட்டாரத்தில் வானம் மேகமூட்டத்துடனும் ஒரு சில இடங்களில் லேசான மழை பெய்வதற்கு வாய்ப்பு இருப்பதாகவும் குறிப்பிட்டிருக்கிறது.

தமிழகத்தில் அரசுப் பள்ளி மாணவர்களுக்கு இலவச நீட் பயிற்சி வகுப்புகள், நவம்பர் 1-ம் தேதி முதல் தொடங்கப்படவுள்ளது. கொரோனா காரணமாக, இந்த வகுப்புகள் அனைத்தும் ஆன்லைன் தளத்தில் நடைபெறும்.

அடுத்த இரண்டு முதல் மூன்று மாதங்களில் வெங்காயம் தொடர்ந்து விலை உயர்ந்ததாக இருக்கும் என்று வர்த்தகர்கள் எச்சரித்து வந்த சூழலில் தற்போது எகிப்து நாட்டிலிருந்து சென்னை கோயம்பேடு சந்தைக்கு 135 டன் வெங்காயம் இறக்குமதி செய்யப்பட்டிருக்கிறது. இதனை 50 முதல் 60 ரூபாய் வரை விற்பனை செய்ய இருப்பதாக வியாபாரிகள் கூறியுள்ளனர்.