முதல் மாநாட்டிற்கு தயாராகும் த.வெ.க; 2026 தேர்தலுக்கான முயற்சியில் சவால்களை எதிர்கொள்ளும் விஜய்

Arun Janardhanan 

2026 தமிழ்நாடு சட்டமன்றத் தேர்தலில் போட்டியிடும் முயற்சியில் தனது அரசியல் கட்சியை அறிவித்த சில மாதங்களுக்குப் பிறகு, "தளபதி" என்று அழைக்கப்படும் தமிழ்த் திரைப்பட சூப்பர் ஸ்டார் விஜய், செப்டம்பர் மாதம் தனது புதிய கட்சியின் முதல் அரசியல் மாநாட்டை நடத்தத் தயாராகி வருகிறார். திருச்சியில் நடைபெறும் இந்த நிகழ்வு அரசியல் பார்வையாளர்கள் மத்தியிலும் அவரது ரசிகர்கள் மத்தியிலும் சலசலப்பை ஏற்படுத்தியுள்ளது.

ஆங்கிலத்தில் படிக்க: Tamil star Vijay braces for challenges in bid for 2026 polls as his party gears up for maiden rally

விஜய்யின் கட்சியான தமிழக வெற்றிக் கழகத்தின் (TVK) தொடக்க மாநாட்டில் 2-3 லட்சம் மக்கள் திரள்வார்கள் என்று எதிர்பார்க்கப்படுகிறது, ஆனால் திரையரங்குகளில் அதிக பார்வையாளர்களைக் கொண்ட விஜய்க்கு இந்த எண்ணிக்கை வலிமையானதாகத் தெரியவில்லை. இருப்பினும், விஜய்யின் மிகப்பெரிய ரசிகர் பட்டாளத்தை அரசியல் தளத்திற்கு மாற்றுவதில் விஜய்யின் முதல் குறிப்பிடத்தக்க படி இதுவாகும், இதற்கு முன்பும் இதை பல திரைப்பட நட்சத்திரங்கள் முயற்சித்துள்ளனர், ஆனால் முடிவுகள் கலவையாக இருந்துள்ளன.

த.வெ.க ஏற்கனவே அதன் அடிப்படை வேலைகளைத் தொடங்கியுள்ளது, அதன் அமைப்பு கட்டமைப்பை அமைக்க முக்கிய மாவட்ட மற்றும் நகர செயலாளர்களை நியமித்தது. விஜய்யின் ரசிகர் மன்றமான விஜய் மக்கள் இயக்கத்தை அரசியல் கட்சியாக மாற்றும் பணியில் த.வெ.க ஈடுபட்டுள்ளது. தொண்டு சேவைகள், கல்வி முயற்சிகள், உணவு மற்றும் சக்கர நாற்காலி வழங்குதல், இரத்த தான முகாம்கள் மற்றும் குழந்தைகளுக்கான கல்வி வகுப்புகள் உள்ளிட்ட சமூகம் சார்ந்த செயல்பாடுகள் மூலம் விஜய் மக்கள் இயக்கம் 15 ஆண்டுகளாக தீவிரமாக செயல்பட்டு வருகிறது.

சினிமாவில் இருந்து அரசியலுக்கு விஜய்யின் மாறுதல் தமிழ்நாட்டின் அரசியல் நிலப்பரப்பில் குறிப்பிடத்தக்க மாற்றத்தைக் குறிக்கிறது, மேலும், திரையுலகில் இருந்து அரசியல் மேடைக்கு நகர்ந்து முதல்வர் அலுவலகம் வரை சென்ற ஒரே நட்சத்திரமான எம்.ஜி.ஆர் என்று அழைக்கப்படும் எம்.ஜி ராமச்சந்திரனுடன் தவிர்க்க முடியாத ஒப்பீடுகளை வரைகிறது. மற்ற நடிகர்களான விஜயகாந்த் மற்றும் கமல்ஹாசன் போன்றவர்களின் அரசியல் நுழைவுகளைப் போல் அல்லாமல், விஜய் தற்போது தமிழ் சினிமாவில் ஒரு உயர்மட்ட பதவியை வகிக்கிறார், இது எம்.ஜி.ஆர் மற்றும் அவருக்கு அடுத்து வந்த ரஜினிகாந்துடன் மட்டுமே ஒப்பிடத்தக்கது, ரஜினிகாந்த் அரசியலுக்கு வருவார் என்று நீண்ட காலமாக ஊகிக்கப்பட்டது, ஆனால் இறுதியில் 2020 இல் ரஜினிகாந்த் தனது லட்சியங்களை கைவிட்டார்.

இரண்டு திராவிடக் கட்சிகளான தி.மு.க மற்றும் அ.தி.மு.க ஆகியவை பாரம்பரியமாக ஆதிக்கம் செலுத்தும் தமிழக அரசியல் களத்தின் நிறுவப்பட்ட இயக்கவியலுக்கு சவால் விடுவதாக இருந்தால், விஜய் அரசியலில் நுழைவது பெரிய தாக்கத்தை ஏற்படுத்தும். அ.தி.மு.க.வின் நிலை, குறிப்பாக ஜெயலலிதாவுக்குப் பிந்தைய காலகட்டத்தில், பலவீனமாக இருக்கின்ற நிலையிலும், நடிகராகவும், திரைப்பட தயாரிப்பாளராகவும் இருந்து, அரசியல்வாதியாக மாறிய, முதல்வர் மு.க.ஸ்டாலினின் மகன் உதயநிதி, தி.மு.க.,வில் பெரிய பங்கு வகிக்கும் நேரத்திலும் நடைபெறும் விஜய்யின் அரசியல் நுழைவு தந்திரமானதாகவும் மற்றும் அரசியல் கணக்குகள் நிறைந்ததாகவும் தெரிகிறது.

விஜய்யின் இலக்கு தெளிவாக உள்ளது: தமிழகத்தின் 20%-30% வாக்காளர்கள் இருபெரும் திராவிட கட்சிகளுடன் உறுதியாக இணைந்திருக்கவில்லை. இந்த இடம், பெரியதாக இல்லாவிட்டாலும், கடந்த சில தசாப்தங்களாக பல தலைவர்கள் அதற்காக போட்டியிட்டுள்ளனர். 1996 இல், ஜி.கே மூப்பனாரின் தமிழ் மாநில காங்கிரஸ் அதை சிறிய காலம் ஆக்கிரமித்தது, அதைத் தொடர்ந்து 2005 இல் கேப்டன் விஜயகாந்த், தனது தேசிய முற்போக்கு திராவிடக் கழகத்தின் மூலம் குறிப்பிடத்தக்க ஆனால் குறுகிய கால தாக்கத்தை ஏற்படுத்தினார். தமிழ் தேசியத்தை வலியுறுத்தும் இயக்குனர் சீமானின் நாம் தமிழர் கட்சி, மற்றும் கமல்ஹாசனின் மக்கள் நீதி மய்யம், மற்றும் பா.ஜ.க.,வின் சமூக பொறியியல் சோதனைகள் மூலம் அண்ணாமலையின் ஆக்கிரமிப்பு முயற்சிகள் ஆகியவை மற்ற எடுத்துக்காட்டுகள், இருப்பினும் தமிழகத்தில் திராவிட ஆதிக்கத்தில் கணிசமான பாதிப்பை ஏற்படுத்த முடியவில்லை.

ஆனாலும், தமிழ்நாட்டு அரசியலில் வெற்றி என்பது வெறும் பிரபல அந்தஸ்தை விட அதிகமாக தேவைப்படுகிறது. வாக்காளர்கள் அதிநவீனமாக மற்றும் விவேகமாக உள்ள ஒரு மாநிலத்தில் கருத்தியல் முக்கிய பங்கு வகிக்கிறது என்பதை வரலாறு காட்டுகிறது. அரசியல் தலைமைக்கு வெற்றிகரமாக மாறிய ஒரே திரைப்பட நடிகர் எம்.ஜி.ஆர், தனது நட்சத்திர பலத்தால் மட்டுமல்ல, திராவிட சித்தாந்தத்தில் ஆழமாக வேரூன்றியவர் என்பதாலும் வெற்றி பெற முடிந்தது.

இதே போன்ற கருத்தியல் அடிப்படை இல்லாமல், கேப்டன் விஜயகாந்த், கமல்ஹாசன் போன்ற மற்ற நடிகர்கள் தங்களது சினிமா புகழை அரசியல் அதிகாரமாக மாற்ற போராடினார்கள். விஜய்யின் சித்தாந்தம், அவரது கட்சியின் அறிவிப்பில் குறிப்பிடப்பட்டுள்ளபடி, தமிழ் கலாச்சாரத்தில் மதிக்கப்படும் திருக்குறளில் உள்ள உலகளாவிய மனிதநேயத்திலிருந்து பெறப்பட்டதாகத் தெரிகிறது. கருணை, அகிம்சை மற்றும் வாழ்க்கைக்கான மரியாதை ஆகியவற்றில் அவரது கவனம் வாக்காளர்களிடம் எதிரொலிக்கக்கூடிய மதிப்புகளை எதிரொலிக்கிறது, ஆனால் அவை ஒரு ஒத்திசைவான அரசியல் மாற்றமாக செய்யப்படுமா என்பதைப் பார்க்க வேண்டும்.

விஜய்க்கு இருக்கும் முக்கிய சவால், அவரது பரந்த ரசிகர் பட்டாளத்தை ஒரு அரசியல் சக்தியாக மாற்றுவது மட்டுமல்லாமல், நம்பகமான கட்சி கட்டமைப்பை உருவாக்குவதிலும் உள்ளது. தீவிர அரசியலில் இருந்து ஓய்வு பெற்ற சில முன்னாள் தி.மு.க மற்றும் அ.தி.மு.க தலைவர்கள் மற்றும் ஓய்வுபெற்ற ஐ.ஏ.எஸ் மற்றும் ஐ.பி.எஸ் அதிகாரிகள் உட்பட சாத்தியமான கூட்டணி கட்சிகளுடன் விஜய் பேச்சுவார்த்தை நடத்தி வருவதாக அவருக்கு நெருக்கமான வட்டாரங்கள் ஒப்புக்கொள்கின்றன. எனினும், அனுபவம் வாய்ந்த அரசியல் செயற்பாட்டாளர்கள் இல்லாதது அவரது கட்சிக்கு குறிப்பிடத்தக்க பலவீனமாக இருக்கலாம். திராவிட இயக்கத்தின் ஆதரவைப் பெற்ற எம்.ஜி.ஆரைப் போலல்லாமல், அல்லது கட்சித் தொடக்கங்களின் மூலம் அவர்களுக்கு வழிகாட்டவும் வழிநடத்தவும், அனுபவசாலிகளைக் கொண்ட விஜயகாந்த், கமல்ஹாசன் போன்றவர்கள் போலல்லாமல், விஜய் கட்சிக்கு இப்போது தெரிந்த அரசியல் முகங்கள் இல்லை.

த.வெ.க செய்தித் தொடர்பாளர் ஆர்.ராம்குமார் கூறுகையில், விஜய் மக்கள் இயக்கத்தில் 75,000 கிளைகள் உள்ள மற்றும் தற்போது 18.75 லட்சம் உறுப்பினர்கள் உள்ளனர் என்றார். மேலும், "நாங்கள் அதை த.வெ.க.,வாக மாற்றுகிறோம், சமீபத்திய ஆன்லைன் உறுப்பினர் இயக்கம் 75 லட்சம் புதிய உறுப்பினர்களைக் கொண்டு வந்தது, 2 கோடி இலக்கு. த.வெ.க.,வின் கட்டமைப்பு அனைத்து 234 சட்டமன்ற தொகுதிகளிலும் பரவியுள்ளது, நகர்ப்புற மையங்கள் முதல் தொலைதூர கிராமங்கள் வரை சென்றடைகிறது,” என்று ராம்குமார் கூறினார்.

விஜய்யின் நட்சத்திர பிரபலம் பாரம்பரிய எல்லைகளைக் கடந்து செல்கிறது. கிராமப்புறங்களிலும் நகர்ப்புறங்களிலும், இளைஞர்கள் மற்றும் பெரியவர்கள் மத்தியில், சாதி மற்றும் மத வேறுபாடுகளுக்கு அப்பாற்பட்ட அவரது பிரபலம், அவரின் அரசியல் செயல்பாடுகளுக்கு ஒரு பரந்த தளத்தை அளிக்கிறது.

விஜய்க்கு நெருக்கமான வட்டாரங்கள், அவரது கட்சியின் முதல் மாநாட்டிற்கு திருச்சியை ஒரு சாத்தியமான இடமாக தேர்ந்தெடுப்பதற்கு பல காரணங்களை மேற்கோள் காட்டினர். தமிழ்நாட்டில் மையமாக அமைந்துள்ள இப்பகுதி, வலுவான கிறிஸ்தவ மரபு மற்றும் மக்கள்தொகையைக் கொண்டுள்ளது, மேலும் விஜய் தனிப்பட்ட உறவுகளைக் கொண்ட உடையார் மற்றும் பிள்ளை சமூகங்கள் உட்பட பல்வேறு சமூகங்களைக் கொண்டுள்ளது. எதிர்கால தேர்தல்களில் விஜய்க்கு இது ஒரு சாத்தியமான தொகுதியாக கூட இருக்கலாம் என்று வட்டாரம் கூறுகிறார்.

விஜய் ஒரு கிறிஸ்தவர் என்றாலும், திரையுலகில் உள்ள பலரைப் போலவே, அவர் கோயில்களுக்குச் செல்வதையோ அல்லது இந்து சடங்குகளில் கலந்து கொள்வதையோ வெறுக்கவில்லை. அவரது சிறுபான்மை கிறிஸ்தவப் பின்னணி சில பார்வையாளர்களுக்கு ஆர்வமாக இருந்தாலும், இதன்மூலம் அவரது அரசியல் அடையாளத்தை வரையறுப்பது சாத்தியமில்லை. உடையார் சமூகத்தில் உள்ள அவரது வேர்கள், இலங்கை வம்சாவளியைச் சேர்ந்த ஒரு தமிழ்ப் பெண்ணை அவர் திருமணம் செய்துகொண்டது, அவரை குறிப்பிட்ட வட்டத்திற்குள் சுருக்கும் முயற்சிகளை மேலும் தடுக்கும்.

ஆனால், விஜய் தனது பொதுத் தொடர்புகளில் கருணாநிதி, ஜெயலலிதா அளவிற்கு இல்லை. எம்.ஜி.ஆருக்கு இருந்த எந்த இயக்கமும் அவருக்கு இல்லை. விஜய்யிடம் இருக்கும் ஒரே சக்தி வாய்ந்த ஆயுதம் அவரது சந்தேகத்திற்கு இடமில்லாத நட்சத்திரம் மற்றும் விசுவாசமான இளம் ரசிகர்கள், இது அவரை எம்.ஜி.ஆர் மற்றும் ரஜினிகாந்திற்கு அடுத்ததாக வைக்கிறது. அரசியலின் சிக்கலான உலகில் அடியெடுத்து வைக்கும்போது, விஜய் ஒரு சூப்பர் ஸ்டாராக மட்டுமல்லாமல், தமிழ்நாடு அடிக்கடி தேடிக்கொண்டிருக்கும் ஒருங்கிணைக்கும், வலிமையான தலைவராக தன்னால் இருக்க முடியும் என்பதை நிரூபிக்கும் கடினமான பணியை எதிர்கொள்கிறார்.

“தமிழ் இந்தியன் எக்ஸ்பிரஸின் அனைத்து செய்திகளையும் உடனுக்குடன் டெலிகிராம் ஆப்பில் பெற https://t.me/ietamil“