அறிவுரை அவசியமில்லை... வாழ்த்து மட்டும் போதும்: துணை முதல்வர் பதவி குறித்து கனிமொழி கருத்து!

தமிழ்நாடு அமைச்சரவையில் மாற்றம் செய்யப்பட்டுள்ள நிலையில், விளையாட்டு மற்றும் இளைஞர் மேம்பாட்டுத்துறை அமைச்சராக இருக்கும் உதயநிதி ஸ்டாலின், துணை முதல்வராக பொறுப்பெற்க உள்ளார். அவருக்கு வாழ்த்துக்களை தெரிவித்துள்ள தி.மு.க. எம்.பி கனிமொழி, இது குறித்து தனது கருத்துக்களையும் தெரிவித்துள்ளார்.

தமிழக அரசியலில், கடந்த 2021-ம் ஆண்டு ஆட்சியை கைப்பற்றிய தி.மு.கவில், முதல்முறையாக சட்டமன்ற உறுப்பினராக தேர்வான முதல்வர் ஸ்டாலினின், மகன் உதயநிதி ஸ்டாலின், 2022-ம் ஆண்டு அமைச்சராக பொறுப்பேற்ற நிலையி்ல், 2024-ம் ஆண்டு துணை முதல்ராக தேர்வு செய்யப்பட்டுள்ளார். தமிழக அரசின் சார்பில், நேற்று (செப்டம்பர் 28) அமைச்சரவையில் மாற்றம் செய்ய ஆளுனருக்கு கடிதம் கொடுக்கப்பட்டது.

இது குறித்து ஆளுனர் மாளிகை வெளியிட்டிருந்த அறிவிப்பில், உயர்கல்வித்துறை அமைச்சராக இருந்த பொன்முடி வனத்துறை அமைச்சராக மாற்றம் செய்யப்பட்டுள்ள நிலையில், தலித் சட்டமன்ற உறுப்பினராக கோ.வி.செழியன், உயர்கல்வித்துறை அமைச்சராக பொறுப்பேற்க உள்ளதாக குறிப்பிடப்பட்டுள்ளது. அதேபோல் கட்சி மற்றும் ஆட்சியில்,உதயநிதியின் செல்வாக்கை உறுதிப்படுத்தும் வகையில் அவருக்கு துணை முதல்வர் பதவி வழங்கப்பட்டுள்ள நிலையில், சென்னை ராஜ்பவனில் பதவியேற்பு விழா இன்று நடைபெறுகிறது.

இது குறித்து பேசியுள்ள, தி.மு.க எம்.பியும், அக்கட்சியின் துணை பொதுச்செயலாளருமான கனிமொழி கூறுகையில், துணை முதலமைச்சராக யாரை தேர்ந்தெடுக்க வேண்டும் யார் பொறுப்பேற்க வேண்டும் என்பது முதலமைச்சர் மு.க.ஸ்டாலின் எடுக்க வேண்டிய முடிவு. முதலமைச்சர் மு.க.ஸ்டாலின் அமைச்சர் உதயநிதி ஸ்டாலினுக்கு அந்த வாய்ப்பை பொறுப்பை வழங்கி இருக்கிறார். துணை முதலமைச்சர் உதயநிதி ஸ்டாலின் மிகச்சிறப்பாக செயல்பட வேண்டும்.அவருக்கு என்னுடைய வாழ்த்துகள் என்று கனிமொழி கூறியுள்ளார்.

மேலும உதயநிதி ஸ்டாலினுக்கு நான் அறிவுரை கூற வேண்டிய அவசியம் இல்லை. யாருக்கு பதவி கொடுக்க வேண்டும் என்பதை முதல்வர் ஸ்டாலின் முடிவு செய்ததான் பதவியை கொடுத்துள்ளார். அதனால் யாருக்கும் அறிவுரை சொல்ல வேண்டிய தேவை இல்லை. அடுத்து என்ன செய்ய வேண்டும் என்பது அவருக்கே தெரியும். அதனால் வாழ்த்துக்களை மட்டுமே தெரிவித்துக் கொள்கிறேன். துணை முதல்வர் உதயநிதி ஸ்டாலின் மட்டுமல்லாமல், புதிதாக பொறுப்பேற்க உள்ள அமைச்சர்களுக்கும் எனது வாழ்த்துக்கள் என்று கூறியுள்ளார். 

தமிழ்நாட்டின் துணை முதலமைச்சராகப் பொறுப்பினை ஏற்கும் நிலையில், முத்தமிழறிஞர் கலைஞர் அவர்களுடைய சி.ஐ.டி.காலனி இல்லத்துக்குச் சென்று, கலைஞர் அவர்களின் திருவுருவப்படத்துக்கு மலர் தூவி மரியாதை செய்தோம். கழக நாடாளுமன்றக்குழுத் தலைவர் - கழகத் துணைப் பொதுச்செயலாளர் அத்தை @KanimozhiDMK… pic.twitter.com/vGhiNO2kPg

— Udhay (@Udhaystalin) September 29, 2024

இதனிடையே துணை முதல்வராக பொறுப்பேற்க உள்ள, அமைச்சர் உதயநிதி ஸ்டாலின் எம்.பி. கனிமொழியை நேரில் சந்தித்து வாழ்த்து பெற்றுள்ளார். இது தொடர்பான புகைப்படங்கள் இணையத்தில் வைரலாகி வரும் நிலையில், பலரும் தங்களது கருத்துக்களை தெரிவித்து வருகின்றனர்.