சுதந்திர போராட்ட வீரர்களை போற்றும் விஜய்; மாநாடு திடலில் வைக்கப்படும் குறியீடு!

தமிழக வெற்றிக்கழகம் கட்சியின் முதல் மாநில மாநாடு குறித்த எதிர்பார்ப்பு அதிகரித்து வரும் நிலையில், நாளுக்கு நாள் புதிய தகவல்களும் வெளியாகி வருகிறது. அந்த வகையில் தற்போது மாநாடு திடலில் வைக்கப்பட உள்ள சுதந்திரபோராட்ட வீர்ர்களின் புகைப்படங்கள் குறித்த தகவல் பலரின் கவனத்தை ஈர்த்து வருகிறது.

தமிழ் சினிமாவின் முன்னணி நடிகராக இருக்கும் விஜய், தான் சினிமாவில் உச்சத்தில் இருக்கும்போதே நடிப்பில் இருந்து விலகுவதாக தைரியமான ஒரு முடிவை எடுத்து அரசியல் கட்சி தொடங்கியுள்ளார். கைவசம் இருக்கும் படங்களை முடித்துவிட்டு அரசியல் பயணத்தில் அடியெடுத்து வைக்க உள்ளதாக அறிவித்துள்ள விஜய் தனது கட்சியின் முதல் மாநாடு தொடர்பான பணிகளில் தீவிரம் காட்டி வருகிறார். மறுபுறம் தளபதி 69 படத்தின் பணிகளும் நடைபெற்று வருகிறது.

விக்கிரவாண்டி வி.சாலை கிராமத்தில் நடைபெற உள்ள தமிழக வெற்றிக்கழகம் கட்சியின் முதல் மாநில மாநாட்டுக்கான பணிகள் தீவிரமாக நடைபெற்று வரும் நிலையில், அவ்வப்போது நள்ளிரவில் விஜய் மாநாடு தொடர்பான பணிகளை பார்வையிட வந்து செல்வதாக தகவல் வெளியாகி வருகிறது. அதேபோல் கட்சியின் பொதுச்செயலாளர் புஸ்ஸி ஆனந்த், விக்கிரவாண்டி வி.சாலை கிராமத்திலேயே தங்கி மாநாடு தொடர்பான பணிகளை பார்வையிட்டு வருகிறார்

இந்த மாநாட்டுக்கான பிரம்மாண்டமாக ராம்ப் வாக் மேடை அமைக்கப்பட்டுள்ள நிலையில், மேடைக்கு அருகில், காமராஜர், பெரியார் அம்பேத்கர் ஆகியோருக்கு நடுவில் விஜய் இருப்பது போன்ற படங்கள் வைக்கப்பட்டுள்ளது. இதன் முதல் விஜய் அரசியல் சித்தாந்த்தின் குறியீடாக இருக்கலாம் என்றும் கூறப்படுகிறது. இது தொடர்பான புகைப்படங்கள் இணையத்தில் வைரலாகி வரும் நிலையில், மேலும் மாநாடு பகுதியில் வைக்கப்பட உள்ள படங்கள் குறித்து தகவல் வெளியாகியுள்ளது.

அதன்படி தமிழ்நாட்டில் சுதந்திரத்திற்காக பாடுபட்ட, அழகு முத்துகோன், வேலு நாச்சியார், பெரும்பிடுகு முத்தரையர், சுந்தரவிங்கம், வீரபாண்டிய கட்டபொம்மன், ராஜராஜசோழன், தீரன் சின்னமலை, பூலித்தேவர், மருது சகோதரர்கள், ஒண்டிவீரன் ஆகியோருடன் சேர சோழ பாண்டியர்களின் படங்களும் இடம்பெறும் என்று தகவல் வெளியாகியுள்ளது. தற்போது இது தொடர்பான தகவல்கள் இணையத்தில் வைரலாகி வரும் நிலையில், பலரின் கவனத்தை ஈர்த்து வருகிறது.