சாதி அடிப்படையில் கோயிலுக்குள் நுழைவதை தடுத்தால் வழக்கு: நீதிபதி ஆனந்த் வெங்கடேஷ் அதிரடி உத்தரவு

சாதி அடிப்படையிலான பாகுபாட்டை அனுமதிக்க முடியாது என்று திட்டவட்டமாக தெரிவித்த சென்னை உயர் நீதிமன்றம், அரியலூர் மாவட்டம், உடையார்பாளையம் தாலுகாவில் உள்ள புதுக்குடி அய்யனார் கோயிலுக்குள் பட்டியல் சாதியினர் நுழைய தடை இல்லாமல் இருப்பதை உறுதி செய்யுமாறு மாவட்ட காவல் கண்காணிப்பாளருக்கு இன்று (ஜூலை 17) உத்தரவிட்டது.

நீதிபதி என். ஆனந்த் வெங்கடேஷ், மாவட்ட காவல் கண்காணிப்பாளர் மற்றும் உடையார்பாளையம் வருவாய் கோட்டாட்சியர் ஆகியோர், சாதி பேதமின்றி அனைத்து தரப்பு மக்களும் கோயிலுக்குள் நுழைந்து, தற்போது நடைபெறும் ஆண்டு விழா உட்பட அனைத்து நேரங்களிலும் தெய்வத்தை வழிபட அனுமதிக்கப்படுவதை உறுதி செய்யுமாறு உத்தரவிட்டார்.

மேலும், ஒரு பிரிவினரை கோயிலுக்குள் நுழைய யாரேனும் தடுத்தால், சட்டத்தின்படி உரிய நடவடிக்கை எடுக்க வேண்டும் என்றும், சட்டம் ஒழுங்கிற்கு எந்தவித இடையூறும் ஏற்படாமல் காவல்துறை மற்றும் வருவாய்த்துறை அதிகாரிகள் உறுதி செய்ய வேண்டும் என்றும் நீதிபதி உத்தரவிட்டார்.

சட்டத்தின் 3வது பிரிவின் படி, எந்த சாதியைச் சேர்ந்தவராகவும் இருந்தாலும், ஒவ்வொரு இந்துவும் எந்தவொரு இந்துக் கோயிலுக்குள்ளும் நுழைந்து பிரார்த்தனை செய்ய உரிமை உண்டு என்று நீதிபதி அறிவுறுத்தினார்.

"சாதி அல்லது பிரிவின் அடிப்படையில் யாரேனும் ஒரு கோயிலுக்குள் நுழைய தடை செய்யப்பட்டால், அது குற்றச் செயலாக கருதப்படும். மேலும், சம்பந்தப்பட்ட நபர் (தடுப்பவர்) மீது வழக்கு தொடரப்படலாம் அல்லது சட்ட நடவடிக்கை எடுக்கப்படலாம்" என்று நீதிபதி உத்தரவிட்டார். மேலும், அரசு அதிகாரிகள் சட்டத்தை அதன் எழுத்துப்பூர்வ மற்றும் உணர்வுப்பூர்வமாக அமல்படுத்துவது கடமையாகும் என்றும் தெரிவித்தார்.

மனுதாரர் கூறியது என்ன?

மனுதாரர் தனது மனுவில், புதுக்குடி கிராமத்தில் உள்ள அய்யனார் கோயில் பல தசாப்தங்களாக இருந்து வருகிறது என்றும், அனைத்து சாதிகள் மற்றும் பிரிவுகளைச் சேர்ந்த கிராம மக்களும் நீண்ட காலமாக வழிபட்டு வருவதாகவும் தெரிவித்தார். இருப்பினும், 2019 ஆம் ஆண்டில், ஒரு குழுவினர் கோயில் வளாகத்தில் புதிய கோயில் கட்ட முடிவு செய்து, கோயில் நிர்வாகத்தைக் கைப்பற்ற முயன்றனர்.

பட்டியல் சாதியினரும் கட்டுமானத்திற்காக நிதி பங்களிப்புகளை செய்திருந்தாலும், அவர்கள் கோயிலுக்குள் நுழைய அனுமதிக்கப்படவில்லை. இது காவல்துறை மற்றும் வருவாய் அதிகாரிகளுக்கு பல புகார்களை அளிக்க வழிவகுத்தது. இருப்பினும், கொரோனா தொற்று காரணமாக இந்த புகார்களை நீண்ட காலமாக பின்தொடர முடியவில்லை.

இதனிடையே, குற்றஞ்சாட்டப்பட்ட குழுவினர் கோயில் வளாகத்தில் பட்டியல் சாதியினரால் வைக்கப்பட்டிருந்த அனைத்து சிலைகளையும் இடித்துத் தள்ளினர். பட்டியல் சாதியை சேர்ந்த நன்கொடையாளரின் பெயருடன் நிறுவப்பட்ட ஒரு பெரிய அய்யனார் சிலை கூட அகற்றப்பட்டு கோயில் கிணற்றில் வீசப்பட்டதாக மனுதாரர் குற்றம் சாட்டினார்.

புதுக்குடி அய்யனார் கோயிலில் இரும்புக் கேட் அமைக்கப்பட்டு, பட்டியல் சாதியினர் கேட் வெளியே இருந்து மட்டுமே வழிபட வேண்டிய கட்டாயம் ஏற்பட்டது என்றும் அவர் கூறினார். இத்தகைய பாகுபாடு இருந்தபோதிலும், சட்டம் ஒழுங்கு பிரச்சனைகளுக்கு அஞ்சி அரசு அதிகாரிகள் எந்தவிதமான நடவடிக்கையையும் எடுக்கவில்லை என்று அவர் கூறினார்.

மேலும், ஜூலை 16 முதல் 31 வரை நடைபெற உள்ள கோயில் தேர்த்திருவிழாவில் பட்டியல் சாதியினரை பங்கேற்க உத்தரவிடுமாறும் மனுதாரர் கோரினார்.