ஆயுத பூஜை மக்கள் நெரிசலை தவிர்க்க தாம்பரம் போலீஸ் அதிரடி: 'கனரக வாகனங்களுக்கு இதுதான் ரூட்

செப்டம்பர் 30 அன்று ஆயுதபூஜை பண்டிகையை முன்னிட்டு அதிகமான போக்குவரத்து நெரிசல் ஏற்படக்கூடும் என்பதால், தாம்பரம் நகர காவல்துறை, சென்னை பெருநகர காவல்துறை மற்றும் ஆவடி காவல் ஆணையரகம் இணைந்து, கலைஞர் நூற்றாண்டு பேருந்து நிலையத்தை நோக்கிய போக்குவரத்து இயக்கம் சீராக நடைபெறவும், நகரம் முழுவதும் நெரிசல் ஏற்படாமல் தடுக்கும் வகையில் ஒரு விரிவான போக்குவரத்து மேலாண்மைத் திட்டத்தை வெளியிட்டுள்ளது.

மக்கள் தங்கள் சொந்த ஊர்களுக்குச் சீரான முறையில் செல்ல வசதியாக இருக்க வேண்டும் என்பதற்காக, மதுரவாயல் மற்றும் பூந்தமல்லி போன்ற முக்கிய சந்திகளில் கனரக வாகனங்களை மாற்றுப் பாதையில் இயக்கப்படும் என்று போலீசார் தெரிவித்துள்ளனர். சென்னை மற்றும் ஆவடி பகுதிகளுக்குள் செல்லும் கனரக வாகனங்கள் பூந்தமல்லியில் திருப்பி விடப்படுகின்றன; இவை கிராண்ட் வெஸ்டர்ன் டிரங்க் (GWT) சாலை வழியாக ஸ்ரீபெரும்புதூர், காஞ்சிபுரம், திருவண்ணாமலை மற்றும் திருக்கோவிலூர் வழியாக சென்று ஜிஎஸ்டி சாலையை அடையும்.

அதேபோல், மதுரவாயல் வழியாக வரும் மற்றும் தாம்பரம் ஜிஎஸ்டி சாலையை நோக்கி செல்லும் கனரக வாகனங்களும், ஸ்ரீபெரும்புதூர் மற்றும் காஞ்சிபுரம் வழியாக ஜிஎஸ்டி சாலையை அடையும் வகையில் மாற்றுப்பாதையில் இயக்கப்படுகின்றன.

காஞ்சிபுரத்திலிருந்து வாலாஜாபாத் வழியாக ஓட்டேரிக்கு செல்லும் கனரக வாகனங்கள், ஒரகடம் சந்திப்பில் திருப்பப்பட்டு ஸ்ரீபெரும்புதூர் வழியாக செல்லும் பாதையை பயன்படுத்த வேண்டும். இவை திருவண்ணாமலை மற்றும் திருக்கோவிலூர் வழியாக ஜிஎஸ்டி சாலையை அடையும். இந்த மாற்றுப்பாதைகள் செப்டம்பர் 30 அன்று முழு 24 மணி நேரமும் அமலில் இருக்கும்.

மேலும், அக்டோபர் 5,  2 மணி முதல் அக்டோபர் 6, 4 மணி வரை, செங்கல்பட்டில் இருந்து சென்னை நோக்கி செல்லும் கனரக வாகனங்கள் காஞ்சிபுரம் சாலை, வாலாஜாபாத், ஸ்ரீபெரும்புதூர் மற்றும் பெங்களூரு தேசிய நெடுஞ்சாலை வழியாக திருப்பி விடப்பட்டு சென்னைக்குள் அனுப்பப்படும். சிங்கபெருமாள் கோவில் வழியாக வரும் வாகனங்கள், சென்னை நோக்கி செல்லும் முன், ஒரகடம் மற்றும் ஸ்ரீபெரும்புதூர் வழியாக மாற்றப்படுவதை போலீசார் அறிவித்துள்ளனர்.

இரும்புலியூர் பாலம் அருகில் வாகனங்கள் சிக்கித் தவிக்கும் நிலை உருவாகியுள்ளதால், போக்குவரத்து நெரிசலைத் தவிர்க்க வண்டலூர் வெளிவட்டச் சாலை வழியாக வாகனங்கள் திருப்பி விடப்படுகின்றன. விழாக் காலத்தைய போக்குவரத்து கூட்டத்தை நிர்வகித்து நெரிசலை குறைக்கும் நோக்கில், தாம்பரம் நகர காவல்துறை ஜிஎஸ்டி சாலை, கிளாம்பாக்கம் பேருந்து நிலையம், கிழக்கு கடற்கரை சாலை, பழைய மகாபலிபுரம் சாலை உள்ளிட்ட முக்கிய சாலைகளில் பலத்த பாதுகாப்பு நடவடிக்கைகளை எடுத்துள்ளது.

பயணிகள் நெரிசலைக் குறைக்க ஜிஎஸ்டி சாலையை தவிர்த்து, பாண்டிச்சேரி, கடலூர், சிதம்பரம், சீர்காழி, நாகப்பட்டினம், திருவாரூர் மற்றும் மயிலாடுதுறை போன்ற மாவட்டங்களுக்கு செல்லும் பயணிகள் ஓஎம்ஆர் மற்றும் ஈசிஆர்  வழிகளை பயன்படுத்துமாறு அறிவுறுத்தப்படுகிறார்கள். மேலும் சாலை போக்குவரத்தை சீரமைக்க, சீரான இடைவெளியில் சிறப்பு உள்ளூர் ரயில்கள் இயக்கப்படுகின்றன. மக்கள் அதிக அளவில் ரயில் சேவைகளை பயன்படுத்த ஊக்குவிக்கப்படுகிறார்கள்.

இதற்குடன், செப்டம்பர் 26 முதல் 30 ஆம் தேதி வரை கேசிபிடி மற்றும் கிளாம்பாக்கம் பேருந்து நிலையங்களில் மொத்தம் 2,430 சிறப்பு பேருந்துகள் இயக்கம் செய்ய திட்டமிடப்பட்டுள்ளது.