தாசில்தார் வாகனத்தை மறித்து பட்டா கேட்ட கிராம மக்கள்; திருச்சி அருகே பரபரப்பு

திருச்சி மாவட்டத்தில் பல்வேறு பகுதிகளிலும் உங்களுடன் ஸ்டாலின் முகாம் நடைபெற்று வருகிறது. அந்த வகையில் இன்று (அக்டோபர் 31) திருவெறும்பூர் அருகே நடைபெற்ற உங்களுடன் ஸ்டாலின் முகாமில் தாசில்தார் வாகனத்தை மறித்து பொதுமக்கள் பட்டா கேட்டதால் பரபரப்பு ஏற்பட்டது. 

திருவெறும்பூர் ஊராட்சி ஒன்றியம் கீழ முல்லக்குடி ஊராட்சி, காந்திபுரம் பகுதியில் இன்று உங்களுடன் ஸ்டாலின் சிறப்பு முகாம் நடைபெற்றது. இந்த முகாமிற்கு அமைச்சர் அன்பில் மகேஷ் பொய்யாமொழி, முன்னாள் எம்.எல்.ஏ கே.என் சேகரன், முன்னாள் மாவட்ட கவுன்சிலர் கே.எஸ்.எம் கருணாநிதி ஆகியோர் கலந்துகொண்டு முகாமினை தொடங்கி வைத்து சென்றனர். 

அப்பொழுது அப்பகுதியை சேர்ந்த மக்கள் தங்களுக்கு சாலை வசதி, வடிகால் வசதி, கடந்த 50 ஆண்டுகளாக பட்டாக்கள் வழங்கவில்லை என்பதை வலியுறுத்தி அப்பகுதி சாலையில் முள் செடிகளை வெட்டி போட்டு சாலை மறியல் போராட்டத்தில் ஈடுபட்டனர். அப்பொழுது அங்கு வந்த போலீசார் உங்களின் கோரிக்கையை நடக்கும் முகாமில் தெரிவியுங்கள், மற்றபடி சாலை மறியல் செய்தால் சட்டப்படி உங்கள் மீது நடவடிக்கை எடுக்க நேரிடும் என்று அறிவுறுத்தினர். 

இந்நிலையில் அப்பகுதிக்கு வந்த திருவெறும்பூர் தாசில்தார் தனலட்சுமியின் வாகனத்தை அப்பகுதி மக்கள் மறித்தனர். நாங்கள் பல ஆண்டுகளாக பட்டா கேட்டு கோரிக்கை வைத்தும் அதனை அரசு நிர்வாகம் செய்து கொடுப்பதில்லை, அடிப்படை வசதிகளும் செய்து கொடுப்பதில்லை என்று ஆதங்கத்துடன் கூறி முறையிட்டனர். தாசில்தார் நடவடிக்கை எடுப்பதாக கூறியதை அடுத்து அவரது வாகனத்தை விடுவித்தனர். தாசில்தார் வாகனத்தை திடீரென முற்றுகையிட்டு பொதுமக்கள் போராட்டத்தில் ஈடுபட்டதால் அங்கு பரபரப்பு ஏற்பட்டது. 

அதே வேளையில் அப்பகுதிக்கு வந்த தொகுதி அமைச்சரான அன்பில் மகேஷ் பொய்யாமொழியும் தங்களின் கோரிக்கையை வந்து கேட்கவில்லை, தங்களை கண்டுகொள்ளவும் இல்லை என்றும் அப்பகுதி மக்கள் குற்றச்சாட்டு வைத்தது குறிப்பிடத்தக்கது.

க.சண்முகவடிவேல்