திருச்சி - இலங்கைக்கு கூடுதல் விமான சேவை தொடக்கம்

திருச்சி பன்னாட்டு விமான நிலையத்தில் இருந்து இலங்கைக்கு கூடுதல் விமான சேவையை  ஸ்ரீலங்கன் விமான நிறுவன அதிகாரிகள் இன்று தொடங்கி வைத்தனர். 

திருச்சி-இலங்கை இடையே கூடுதல் விமானச் சேவையை ஸ்ரீலங்கன் விமான நிறுவனம் தொடங்கியது. திருச்சி பன்னாட்டு விமான நிலையத்திலிருந்து சிங்கப்பூா், மலேசியா, இலங்கை, துபாய் உள்ளிட்ட நாடுகளுக்கு தினசரி விமானங்கள் இயக்கப்படுகின்றன. இவற்றில் இலங்கை தவிர மற்ற நாடுகளுக்கு தினசரி 1 முதல் 4 சேவைகள் இயக்கப்படுகிறது. 

ஸ்ரீலங்கன் விமான நிறுவனம் இலங்கைக்கு தினசரி 1 என்ற வகையில் வாரந்தோறும் 7 சேவைகளை மட்டுமே இயக்கி வந்தது. அதன்படி செவ்வாய், புதன், சனி, ஞாயிற்றுக்கிழமைகளில் காலை 9.10 மணிக்கு இலங்கையிலிருந்து திருச்சி வரும் விமானம் மீண்டும் 10.10-க்கு இலங்கை செல்லும்.

இதுபோல திங்கள்,வியாழன்,வெள்ளிக்கிழமைகளில் பிற்பகல் 3.05 மணிக்கு இலங்கையிலிருந்து திருச்சி வரும் விமானம் 4.10-க்கு புறப்பட்டு மீண்டும் இலங்கை சென்றுக்கொண்டிருந்தது. 

இந்நிலையில் வியாழக்கிழமைகளில் காலையும் இலங்கைக்கு கூடுதல் விமானச் சேவை ஏற்படுத்தப்பட்டுள்ளது. இதற்காக திருச்சியில் நடந்த விழாவில் ஸ்ரீலங்கன் விமான நிறுவன திருச்சி நிலைய மேலாளா் அஜாஸ் உள்ளிட்டோா் கூடுதல் சேவையைத் தொடங்கி வைத்தனா்.